Tìɛlɛ Sɛbɛ ŋáà Zan 'sɛbɛ wè
Tìɛlɛ
Siɛnrɛ ti sélimɛ tiʔɛ gè
1
1 Kele gálì mi je juu gèle,
Zezi Kirisi wi 'ke tìɛ mi nɛ̄;
ki 'nyaa Kulocɛliɛ wi 'ke kɛn mi mɛ́ mi- ke tìɛ wi baakuɔlɔ nɛ̄ bèle.
Ki kele gálì ke bága tóri sìfuugo wī.
A Zezi wi 'wi tundunwɔ tórigo wè,
nyìʔɛnɛ tundunwɔ wè,
a wi sɛ́nì ti yiʔɛ juu nɛ̀ tìɛ mi nɛ̄ mi Zan wè,
wi baakuɔwɔ wè.
2 A mi sí tɔ̀ni nɛ̀ ti juu nɛ̀ láʔa,
nɛ́ jo dí gìi ki mìɛni mi 'nyaa gè,
Kulocɛliɛ siɛnrɛ dī,
nɛ̀ pínɛ Zezi Kirisi wori dī ŋíʔɛgɛ.
3 A siɛn ŋíì nɛ Kulocɛliɛ kajuulo siɛnrɛ dáà wéli dè nɛ ti nyu dè,
á bìli nɛ ti lúru níɛ tári ti nɛ̄ dè,
dàa dī baa sɛbɛrɛ dè,
ki siɛnnɛ bèle,
pe wuʔu kiī tànʔa;
nɛ̀ taʔa gíi nɛ̄,
lɛ̀lɛ ni 'kò túɔn.
Síɛrilɛ lè tɛ́ngɛfɔlilɔ gbuʔulo kɔlisiin mɛ́ gèle
4,5 Mi Zan wè,
mi mi nyɛ́ni siɛnrɛ dáà nyu dè tɛ́ngɛfɔlilɔ gbuʔulo kɔlisiin mɛ́ gèle gàli gīɛlɛ baa Azii tɛ́nimɛ nī bè;
ki siɛnrɛ ti n'dɛ:
Kulocɛliɛ wè,
ŋàa wi yē wè,
nɛ́ kíni yē baa wè,
nɛ́ wi bága pɛn wè,
nɛ́ pìgele kɔlisiin gálì gīɛlɛ baa wi kùlofɔlilɔ kácunʔɔ ki yiʔɛ mɛ́ gè,
nɛ́ Zezi Kirisi ní wè wire ŋáà wī kijuufɔli wè nɛ́ yéri wi nyayerigele nī gèle wè,
pe- kpuʔɔrɔ nɛ́ yanyige kɛn ye mɛ́.
Zezi Kirisi wire wī péliwe wè nɛ̀ nyɛ́ nɛ̀ yiri kúbilo sunʔɔmɔ nī bè,
nɛ̀ pínɛ wire wī duniya kùlofɔlilɔ pe kàfɔli wè.
Wire ŋáà wī weli 'wi dɛ́ni á wi 'weli suɔ nɛ̀ yige weli kapiʔile nī gèle wi sìsiɛn kire fànʔa nɛ̄ gè,
6 nɛ̀ weli kpíʔile kùlofɔligɔ wuulo,
a weli 'kò kacuɔnrilɔ Kulocɛliɛ mɛ́ wè,
wi Tuu wè.
Kpuʔɔrɔ dè nɛ́ fànʔa ní gè,
ti 'yɛli wi nɛ̄ lɛ̀gɛlɛ ke mìɛni nī.
Ki- taa ki puu bɛ̀.
7 Ye nyaa,
wi bága de báan kàsadibarɛ nī dè
dí siɛnnɛ pe mìɛni bèle,
nɛ́ bìli pe cé wi súbulo bèle pe sí de wi nyaʔa.
Duniya siɛnnɛ feliye yi mìɛni bága de nyɛni de ki yáa kire lɛ̀lɛ nī lè.
ʔaan díɛ,
ki- taa ki puu bɛ̀a !
8 «Mi wī Alifa wè nɛ́ ní Omegab wè»,
Kàfɔli Kulocɛliɛ wi 'jo bɛ̀,
wire ŋáà wi yē wè,
nɛ́ ŋàa wi kíni nɛ yē wè,
nɛ́ ŋàa wi bága pɛn wè,
ŋàa wī Fànʔa ki mìɛni Kàfɔli wè.
Kulocɛliɛ wi 'Zan yiʔɛ mugu gè a wi 'Zezi nyaa wè
9 Mi Zan wè,
yeli siinyɛni wè,
mi yē nɛ pínɛ nɛ wuʔɔ nɛ́ yeli ní kùlofɔligɔ nī gè,
weli 'ki kpàri nɛ̀ cò nɛ́ kò pínɛnyɛnigɛ nɛ̄ gè nɛ́ Zezi ní wè.
Mi 'puu dàala láà nɛ̄ kuʔɔjii sunʔɔmɔ nī bè,
pe ni ye Patimɔsi,
Kulocɛliɛ siɛnrɛ ti juʔu kire kɛnmɛ nɛ̄ bè nɛ́ Zezi wori ti jáarigɛ kɛnmɛ nɛ̄ bè.
10 Kàfɔli wi cɛngɛ gè,
a Kulocɛliɛ Pìle ni 'mi yiʔɛ múgu gè,
a mi kɛ́nì juumɔ páà lúʔu kpuʔɔ mi kàduʔumɛ gè,
majo kàkpanʔa pe 'wíi.
11 Juumɔ pi siɛnrɛ ti n'dɛ:
«Gàa muɔ nɛ nyaʔa gàa gè,
-ki sɛbɛ ma tórigo tɛ́ngɛfɔlilɔ gbuʔulo kɔlisiin mɛ́ gèle baa kàaya nyáà mɛ́ yè,
yi n'yɛ:
Efɛzi,
Simirini,
Pɛrigami,
Tiyatiiri,
Saridi,
Fiiladɛlifii,
nɛ́ Lawodise.»
12 A mi 'yiʔɛ bè wéli,
ŋáa wi 'puu nɛ nyu nɛ́ mi ní wè.
Bà sí mi 'yiʔɛ wè,
nɛ̀ ki 'nyaa tiɛ fètindaʔaya kɔlisiin.
13 Fètindaʔaya nyáà yi kɔlisiin sunʔɔmɔ nī bè,
wàa 'puu baa nɛ ní Siɛn Pùɔ tíɛlɛc.
Wi cé burugbuʔɔ le,
nɛ́ ki puɔ sìndinge nī gè nɛ́ tiɛ màʔana ní.
14 Wi nyùgo gè nɛ́ wi nzìire ní dè,
ti 'puu nɛ fíligi pérepere,
wi nyapigele ní gèle majo kàsunnyige gī.
15 Wi tɔliyɔ yi 'puu nɛ nyíʔɛnɛ nɛ́ ní wɔligiyɔ bɛ̀ kányiɛrɛ tíɛlɛ cɛ̀nrɛ bɛ̀ pe cî ti nyɛgɛ vúguro kàsun nī gè,
wi yékpoli ní lè muɔ bé jo lakpoliyo yi nyɛ́ni cuulo.
16 Wi cé ŋɔgɔlɔ kɔlisiin cò wi kàliige nī gè.
Yiɛyɛ siin ŋɔsii tàanwa wáà 'puu wi nyuɔ nī gè sìɛnwɛ.
Wi kɛnmɛ pi 'puu majo bɛ̀ cɛngɛ ki cî nɛ wáari nɛ́ ki ŋɔri ti mìɛni ní dè.
17 Bà mi 'wi nyaa wè,
a mi 'tuu wi tɔliyɔ láara yè nɛ̀ kò bɛ̀ kpúu tíɛlɛ.
A wi sí wi kàliige taʔa gè mi nɛ̄ nɛ́ jo:
«Fàri fìʔɛ́ʔ,
mi wī péliwe wè nɛ́ ní sɛnwɛ wè.
18 Mi yē sìi nɛ̄.
Mi cé kùu,
ki sí n'gɛ,
mi yē sìi nɛ̄ súuri kúɔmɔ fùn,
nɛ̀ pínɛ kùu kɔ̀rikaanna lè nɛ́ kusiʔi kɔ̀rikaanna ní lè,
mi mɛ́ ke yē.
19 «Ma sí ki sɛbɛ,
gàa muɔ 'nyaa gè,
nɛ́ kele gílì gīɛlɛ baa gèle,
nɛ́ gàa ki bága kpíʔile gè.
20 Gìi gī kalarilɛ lè ŋɔgɔlɔ kɔlisiin wori dè,
gàli muɔ 'nyaa mi kiyɛ nī yè,
nɛ́ tiɛ fètindaʔaya kɔlisiin ní yè,
ki n'gɛ:
ŋɔgɔlɔ kɔlisiin keli 'nyaa tɛ́ngɛfɔlilɔ gbuʔulo kɔlisiin ke nyìʔɛnɛ tundunminɔ bèle;
fètindaʔaya kɔlisiin yire sí yī tɛ́ngɛfɔlilɔ gbuʔulo kɔlisiin gèle.»