Jànvaa tɛnmɛfɔlilɔ bèle nɛ́ pe woli ni cúʔɔgɛnmɛ ní bè
2
1 Faʔa faʔa gè jànvaa siɛnjuulo 'puu Isirayɛliyé sunʔɔmɔ nī bè,
bɛ̀ míɛni ki yē ŋɔ̀ wè,
jànvaa tɛnmɛfɔlilɔ bága puu yeli nī.
Bàli bèle,
pe béri jànvaa tɛnmɛnɛ kanʔa lè nɛ́ síciliziɛnrɛ ní nàa ni bé cúʔɔmɔ nyɔ́gɔ bè siɛnnɛ nī bèle.
Pe bé cíi Kàfɔli nɛ̄ wè ŋàa wi 'pe fùgu nɛ̀ suɔ wè,
bé sí cúʔɔmɔ nyɔ́gɔ bè pìye nī fáari.
2 Siɛnnɛ sáamɛ bé taʔa pe núʔɔmɔ koligo nɛ̄ gè.
Kire jànvaa tɛnmɛfɔlilɔ bèle peli kɛnmɛ nɛ̄,
siɛnnɛ pe béri kányiʔɛ koligo teri gè.
3 Pe wali tàanma wuʔu nɛ̄ gè,
pe béri yeli fáanni de líi nɛ́ pe síciliziɛnrɛ ní dè.
Nɛ̀ ki yaʔa kiī faʔa pe kàyuʔujuu wori ti yé juu nɛ̀ yaʔa nɛ̀ pínɛ pe cúʔɔwori tiǐ ga kɛ́ bé pe yaʔaʔ.
4 Nɛ́ ki cɛ́n,
Kulocɛliɛ sì nyìʔɛnɛ tundunminɔ yaʔa bèle wiì pe wuʔɔʔ;
bàli pe yé kapiile kpíʔile lè,
a wi 'pe wáa kàwiʔi sícuugo nī gè,
puɔyaʔala yebiliwuɔlɔ nī lè.
Baa piyē nɛ kàyuʔujuujɛngɛ siri gèa.
5 Bɛ̀ míɛni sí ki yē,
wiì duniya péliwe yaʔa wè wiì wi wuʔɔʔ Nɔwe lɛ̀lɛ nī lèʔ,
a wi 'kàsakpiile tìrige lè kire lɛ̀lɛ siɛnnɛ nɛ̄ bèle,
peli bálì piyè puu nɛ fìʔɛ́ Kulocɛliɛ nɛ̄ wèʔ.
Nɛ̀ ki yaʔa a wi 'Nɔwe wire suɔ,
nɛ́ siɛnnɛ kɔlisiin ní bèle,
wire ŋáà wi 'puu nɛ sínmɛ wuʔu nyu gè duniya siɛnnɛ mɛ́ bèle.
6 Kulocɛliɛ wi 'kàyuʔu juu Sodɔmi nɛ́ Gomɔri kàaya nɛ̄ yè nɛ̀ yi cúʔɔ nɛ̀ yi sórigo nɛ́ kàsun ní a yi 'kò cúnʔɔ,
a kire 'kò fìɛ siɛnnɛ mɛ́ bèle bàli piyè 'puu nɛ fìʔɛ́ Kulocɛliɛ nɛ̄ wèʔ,
bè ki tìɛ pe nɛ̄ gàa ki bága pe taa wè.
7 Nɛ̀ ki yaʔa wi 'Lɔti píle wè nɛ̀ suɔ,
nɛ́ ki cɛ́n wi 'puu siɛnsinwɛ nɛ̀ fùrɔ nɛ̀ tóri siɛnnaasinzinminɛ bálì pe tánʔagɛnmɛ nɛ̄ bè bàa pi 'núʔɔ bè,
nɛ́ pe kanyaʔamirɛ wuʔu ní gè.
8 Kire siɛnsinwɛ wè,
wi 'puu tɛ́niwɛ kire siɛnnɛ sunʔɔmɔ nī bè;
cɛngɛ ó cɛngɛ wi fungo ki 'puu nɛ nyaʔami bɛ̀ wi 'puu nɛ pe kapiigbiʔiligele nyaʔa gèle níɛ ke wori lúru dè.
9 Kiī cɛ́ngɛ,
Kàfɔli wi 'ki cɛ́n kɛnmɛ bíì nɛ̄ wire bé gbɛ̀ pe píle bè suɔ kagbɛngɛ mɛ́ gè,
bàli bīɛlɛ pe 'pìye puɔ wi nɛ̄ wè,
bè sí kapiigbiʔilile tɛ́ngɛ bèle piyeyɛ,
bè pe wuʔɔ kàyuʔujuujɛngɛ gè.
10 Wi bé cɛ pe wuʔɔ wī,
bàli pe 'taʔa pe céri núʔɔmɔ nìge kele kúrugu gèle,
a piyē nɛ Kulocɛliɛ kàfɔligɔ faʔa gè.
Kire siɛnnɛ bálì bèle,
piyē nìɛnyiɛnigɛfɔlilɔ nɛ́ ní fungbɛnyɛfɔlilɔ,
pe wè nɛ fìʔɛ́ bè nyìʔɛnɛ fànʔafɔlilɔ tiʔɛlɛ bèleʔ.
11 Nyìʔɛnɛ tundunminɔ bèle,
ŋɔri nɛ́ fànʔa yē pe nī nɛ̀ tóri jànvaa tɛnmɛfɔlilɔ nɛ̄ bèle,
nɛ̀ ki yaʔa nyìʔɛnɛ tundunminɔ peli sì cɛ́nì nyìʔɛnɛ fànʔafɔlilɔ tiʔɛlɛ bèleʔ nɛ̀ kàyuʔu juu pe nɛ̄ʔ Kulocɛliɛ yiʔɛ mɛ́ gèʔ.
12 Jànvaa tɛnmɛfɔlilɔ bálì bèle,
peli yē bɛ̀ nyàʔayɛrɛ tíɛlɛ dàa mɛ́ sícilige wè yē gèʔ,
tire dáà ti 'sii peri ti cògí de kpúu dè.
Gàa piyè cɛ́n gèʔ,
kire piyē nɛ teri.
Peli bèle,
pe tíimɛ kapiʔile ke bága pe kpúu míɛni.
13 Pe bága pe kapiʔi sàri taa wè gàa pe 'kpíʔile gè.
Gàa ki 'pe dɛ́ni gè,
kire gī pe níɛ pe céri kanɛdanʔana kpínʔini gèle cɛnvugo nɛ̄.
A pe gbɛ̀ni pɛn yeli pínɛnyɛnigɛ lìile tiʔɛ nī gè,
pe níɛ fundaanra kpínʔini siɛnnɛ fáannigɛ wuʔu nɛ̄ gè.
Peli tíimɛ pɛnnɛ wuʔu ki nɛ̂ puu laabiri yɛgɛ nɛ́ ní fìɛrɛwuʔu.
14 Peli nyapigele keli yē bèri cɛlilɛ wéli bèle bèri pe caa bè kanuʔɔrɔ kpíʔile nɛ́ pe ní.
Peli nɛ̌ ga kapiʔile kpíʔile gèle bè tín nyaaʔ.
Bàli pe fìɛ nìre wáa tɛ́ngɛlɛ nī lèʔ,
pe nìɛ pe cògí pe gáriyɛ nɛ̄ yè.
Pe 'pe funyɔ gbòbori yè nɛ̀ yaʔa wali tàanma wuʔu nɛ̄ gè.
Piyē Kulocɛliɛ dɛ́ngɛ láara wè.
15 Bɛ̀ sí pe 'yiri kozinge nī gè a pe 'pùunni nɛ̀ taʔa Bozɔri jaa Balaamib wi koligo nɛ̄ gè,
wire ŋáà wī kolimɔ pi sàri wi yé wi dɛ́ni wè.
16 Nɛ̀ ki yaʔa wi sèfɛnnɛ ni 'nyuɔ múgu gè nɛ̀ juu nɛ́ wi ní bɛ̀ siɛn tíɛlɛ,
bè juu dìɛ wi nɛ̄ wi kacuʔɔlɔ wuʔu nɛ̄ gè.
A sèfɛnnɛ ni 'kire kanyaajuuwo wi kàala kakpiʔilile yérige lèc.
17 Kire jànvaa tɛnmɛfɔlilɔ bálì bèle,
piyē lawiʔile tíɛlɛ,
luʔɔ sí wè yigi ke nīʔ,
nɛ́ ní bɛ̀ nɛ̀wirile tíɛlɛ nàa káfaligbuʔɔ ki líi gè.
Kulocɛliɛ nyɛ́nì tiʔɛ káà yaʔa pe mɛ́ baa yebiliwuɔlɔ dɛ́ndɛn nī lè.
18 Piyē nɛ nyùgofun siɛnkpolido nyu dè bàli mɛ́ pe 'péli nɛ̀ pìye suɔ siɛnpuunninɔ mɛ́ bèle,
pe nɛ̂ pe fáanni nɛ̀ cò nɛ́ céri kanɛdanʔana núʔɔmɔ siɛnrɛ ní dè.
19 Kire tɛnmɛfɔlilɔ bálì pe nɛ̂ nyuɔ fɛ̀ni gè pe mɛ́ níɛ̀ jo pe bé kò pìyemɛ,
nɛ̀ ki yaʔa peli tíimɛ bèle,
piyē sùkulolo pe kanɛdanʔana nɛ̄ gèle gàli ke pe córi gèle.
Nɛ́ ki cɛ́n siɛn ó siɛn yē sùkulowo kaala náà nɛ̄ ni 'dàli wi nɛ̄ lè.
20 Bɛ̀ sí ki yē gè,
siɛnnɛ pálì yē baa,
bàli pe yé láʔa duniya núʔɔmɔ nɛ̄ bè lɛ̀lɛ líì nī pe yé weli Kàfɔli nɛ́ Suɔfɔli Zezi Kirisi cɛ́n wè.
A ki sí nyaa pe pɛ́nì yiri koligo nī gè nɛ̀ koli nɛ̀ jíin kire núʔɔmɔ nī bè bàa pi 'dàli pe nɛ̄ bè,
pe kɛnmɛ pi nɛ̂ ń'nɛ̀ pii pélibe nɛ̄ bè.
21 Ki cî pɔ́ri pe mɛ́ pe fǎga cé sínmɛ koligo cɛ́n gèʔ,
sɛ́ni pe 'ki cɛ́n bè sí ní koli láʔa fànʔa kajuulo nɛ̄ lè nàa Kulocɛliɛ yé kɛn pe mɛ́ lè.
22 Kàsiile ni kányiʔɛ ki nyɛ́nì fori pe nɛ̄ nàa ni 'ki juu nɛ́ jo:
Puun wi 'koli nɛ̀ kɛ́ wi tùguro kúrugu dèd nɛ́ míɛni:
Tanuu ŋáà wi 'gbéli wè,
wi 'koli nɛ̀ sɛ́nì wìi kòligo fàrigɛ nī gè.