Piɛri 2 1

Sɛbɛ siinwuu ŋáà Piɛri 'sɛbɛ wè

Piɛri siinwuu

Síɛrilɛ lè

1 Mi ŋáà wī Siimɔ wè, Zezi wi sùkulowo nɛ́ ní wi wè, mi nɛ sɛbɛ ŋáà tórigi wè bàli mɛ́ pe 'tɛ́ngɛlɛ taa lè nàa ni 'kpúʔɔ nɛ̀ nyuɔ lè nɛ́ nī nunɔ nɛ́ weli woli ní lè. Kire tɛ́ngɛlɛ náà ni 'taa Zezi Kirisi nī wè, weli Kulocɛliɛ nɛ́ weli Suɔfɔli, wi sínmɛ pire kɛnmɛ nɛ̄.

2 Kulocɛliɛ wi- nɛ́ yanyige kɛn gè yeli mɛ́ nìʔɛgɛ bɛ̀ yeli 'Kulocɛliɛ cɛ́n wè nɛ́ weli Zezi ní wè.

Weri liʔi tɛ́ngɛlɛ nī lè

3 Kulocɛliɛ wi 'wi fànʔa kɛn gè weli mɛ́ gàa ki 'yɛli gè kire ga buu weri weli sìi tári wè bè puu puɔlɔ Kulocɛliɛ nɛ̄ wè. Nɛ́ ki cɛ́n wi 'ki yaʔa a weli 'Kulocɛliɛ cɛ́n wè, ŋàa wi 'weli yeri wè, wi kpuɔmɔ kɛnmɛ nɛ̄ bè nɛ́ bɛ̀ wi 'nyuɔ nɛ̀ fori wè. 4 Bɛ̀ ki yē a wi 'lagbɛnrɛ kpuʔɔniʔɛrɛ kɛn dè weli mɛ́ dàa nɛ̄ wi yé nyuɔ fɛ̀ni gè, kire ga buu a yeli 'ti taa dè, yeli gbɛ̀ yìye píle bè suɔ duniya kanɛdanʔana mɛ́ gèle gálì ke 'pii gèle, kire ga buu weli kɛnmɛ pi 'yiʔɛ bè puu Kulocɛliɛ kɛnmɛ tíɛlɛ bè.

5 Ki sí n'gɛ, yeri ŋàʔaná kpuʔɔ ye kàa fàri yeli tɛ́ngɛlɛ nɛ̄ lè ye nyuɔ bè fori, bé ní Kulocɛliɛ cɛ́nnɛ fàri lè yeli nyuɔmɔ forilo nɛ̄ lè. 6 Cɛ́nmɛ nɛ̄ bè, ye- yìye cògɛnmɛ fàri bè baa. Yìye cògɛnmɛ nɛ̄ bè, ye- lèbaanna fàri lè baa. Lèbaanna nɛ̄ lè, yeli de yeli sìi tári wè bè puu puɔlɔ Kulocɛliɛ nɛ̄ wè. 7 Bà yeli nɛ yeli sìi tári wè bè puu puɔlɔ wi nɛ̄ wè, ye- wìyedɛnigɛ fàri gè baa. Wìyedɛnigɛ nɛ̄ gè, ye- ní siɛnnɛ pe mìɛni dɛ́nigɛ fàri gè baa. 8 A ki sí nyaa kire kacɛ̀ngɛlɛ gálì kiyē yeli mɛ́ gèle, a kiyē nɛ niʔɛgi nɛ waa yiʔɛmɛ gè, kiyě yeli yaʔaʔ yeli kò sàliyɛfɔlilɔʔ bè puu yasɛnrɛ fùnʔ; ke bé ki yaʔa yeli de waa yiʔɛmɛ weli Zezi wi cɛ́nnɛ wuʔu nɛ̄ gè.

9 Ŋàa mɛ́ tire wè yē dèʔ, wi wè nyaʔa cɛ̀ngɛʔ, wiī bɛ̀ fúɔn tíɛlɛ. Wi nɛ̂ fìʔɛ, wi nɛ̌ ní ki cɛ́nʔ Kulocɛliɛ yé wire kapiʔile jíge gèle nɛ̀ láʔa wire nɛ̄ʔ. 10 Nɛ̀ siinyɛninɛ, gìi sí gī baa gè, yeri ŋàʔaná kpuʔɔ yeri ki tìí yeli tánʔagɛnmɛ nɛ̄ bè dí Kulocɛliɛ nyɛ́nì yeli yeri nɛ̀ yeli nyíɛnɛ nɛ́ kɔ̀n. Nɛ́ ki cɛ́n a yeli nɛ kire kpínʔini gè, yeli sǐ de kúrugi de tun koligo nɛ̄ gè púloʔ. 11 Bɛ̀ sí ki yē gè, weli Zezi Kirisi, weli Suɔfɔli wè, wi bànguɔ kùlofɔligɔ kɔ̀ri ki bé múgu kpuʔɔ yeli mɛ́.

12 Kire kɛnmɛ nɛ̄ mi nɛ caa bè yeli sɔ̀ngirɔ tìrige dè súuri kele gálì nɛ̄ gèle, a ki nɛ́ cɛ́nì nyaa yeli 'ke cɛ́n nɛ̀ kúɔ wè, nɛ́ míɛni yeli yē puɔlɔ cɛ̀ngɛ kányiʔɛ nɛ̄ gè, gàa yeli 'taa gè. 13 Bè mi yaʔa sìi nɛ̄ wè duniya nī wè, mi 'ki nyaa ki nyɛ́nì yɛli mi de waa yiʔɛmɛ bèri yeli sɔ̀ngirɔ tìrigí dè yeli- kò nyɛminɛ. 14 Nɛ́ ki cɛ́n mi nyɛ́nì ki cɛ́n, a cɛ̀ri sìʔɛrɛ m'bé yiri mi céri nī dè, majo bɛ̀ weli Kàfɔli Zezi Kirisi wi 'ki fílige nɛ̀ juu m'mɛ́ gè. 15 Kire nɛ̄ m'bé kɛnmɛ pi mìɛni kpíʔile kire ga buu a mi kɛ́nì kùu wè, yeli de sɔ̀ngí de taʔa nɛ́ tɛnmɛnɛ náà ni mìɛni ní.

Weli yē Kirisi kpuɔmɔ pi nyaafɔlilɔ

16 Bɛ̀ ki yē gè, weli sì télige múʔurudo síciliziɛnrɛ nɛ̄ wīʔ bà weli 'puu nɛ weli Kàfɔli Zezi wi fànʔa nɛ́ wi pɛnnɛ wuʔu nyu gèʔ. Kire bɛ̀ʔ; weli tíimɛ yē wi kpuʔɔrɔ ti nyaafɔlilɔ wī. 17 Cɛngɛ gíì wi nɛ́ kpuɔmɔ taa bè Tuufɔli Kulocɛliɛ mɛ́ wè, weli tíimɛ 'puu baa nɛ̀ Kpuɔmɔ Kulocɛliɛ wi yékpoli lúʔu lè, nàa ni 'ki juu nɛ́ jo: «Ŋàa wire wī mi Jaa wè, ŋàa wi 'mi dɛ́ni wè; wi woli ni 'tɔ̀ni nɛ̀ kpúʔɔ m'mɛ́.» 18 Kire yékpoli náà ni 'yiri nī lè, a weli tíimɛ 'ni lúʔu, bà weli cé puu nɛ́ wi ní nyagurugo wàlidɛngɛgɛ nɛ̄ gè.

19 Nɛ̀ fàri tire nɛ̄, weli nyɛ́nì pe siɛnrɛ taa dè, tire dáà nɛ̄ weli bé gbɛ̀ tɛ́ngɛ kpuʔɔ dè. Ki 'yɛli yeli de líiye cáanri tire siɛnrɛ mɛ́ dè, nɛ́ ki cɛ́n tiī bɛ̀ fètinnɛ tíɛlɛ nàa ni nyí yebilige sunʔɔmɔ nī bè, fúɔ bè taa kpìɛnmɛ pi ba tuu, dí kpìɛnduumɛ ŋɔnɔ̀, Zezi Kirisi wè, wi de nyíʔɛnɛ yeli funyɔ nī yè.

20 Gàa yeli 'yɛli bè cɛ́n gè, kire gī gàa gè: siɛnjuuliɛwɛ siɛnrɛ dáà ti yē baa nī dè, siɛn wáà fáala sǐ gbɛ̀ ti kɔri cɛ́n wire tíimɛ yákuɔ wèʔ. 21 Nɛ́ ki cɛ́n Kulocɛliɛ siɛnjuuwo siɛnrɛ táà fáala sì juu siɛn nyɛ́ni kaala nɛ̄ wīʔ. Kire bɛ̀ʔ; lire ni 'puu nɛ siɛnnɛ yɛ̀gí bèle pe- Kulocɛliɛ siɛnrɛ nyu dè.