Piɛri 2 3

Weli Kàfɔli wi pɛngɛnmɛ wori dè

1 Nɛ siinyɛninɛ, ki n'gɛ sɛbɛ siinwuu ŋáà mi 'sɛbɛ nɛ̀ tórigo yeli mɛ́ wè. Pe mìɛni siin nī bèle, mi nɛ ki caa bè yeli sɔ̀ngijɛnrɛ cúngo cúngo dè kire ga buu yeli de sɔ̀ngí de taʔa nɛ́ tɛnmɛnɛ ní lè nàa yeli 'taa lè. 2 Mi nɛ caa bè yeli sɔ̀ngirɔ tìrige dè siɛnrɛ nɛ̄ dè dàa pe yé juu dè faʔa faʔa gè, nɛ́ tire dáà weli nɛ́ Suɔfɔli Zezi wi 'juu nɛ̀ gbɛ̀ngɛ yeli mɛ́ dè nɛ́ wi ní bèle.

3 Gàa sí ki 'kpúʔɔ gè, ye- ki cɛ́n, cɛnzɛnyɛ nī yè, pàli bága pɛn bèri pìye nyíɛnɛ siɛnnɛ nɛ̄ bèle; pe bé taʔa pe kanɛdanʔana nɛ̄ gèle bé sí de yeli tíʔɛ. 4 Pe bé jo: «Zezi wi 'nyuɔ fɛ̀ni gè nɛ́ jo wire bé pɛn; gáa sí ki kɛ́nì wi nyafɛnigɛ taa gè ? Sé wi yē ? Nɛ́ ki cɛ́n, bà ki 'líɛ weli tobilo pe nyɛ́nì kùu bèle, kele ke mìɛni nɛ waa kanumɔ nɛ̄ bè nɛ̀ ki 'séli bà duniya wi yé faan wè !»

5 A kire siɛnnɛ piyē nɛ nyu mmɛ gè, pe nɛ̂ kɔ̀rirɔ ki nɛ̄ nɛ̀ fìʔɛ nɛ́ gàa ní gè: faʔa faʔa gè, Kulocɛliɛ yé nyìʔɛnɛ nɛ́ dàala faan lè nɛ́ wi siɛnrɛ ní dè, a wi 'dàala wàli lè nɛ̀ yige luʔɔ nī gè, nɛ́ luɔyɔ pínɛ yè tiɛnugo nī a luɔyɔ yi 'dàala màʔa lè nɛ̀ suʔu. 6 Kire kàduʔumɛ a wi 'laniʔɛgɛ tìrige gè nɛ̀ kire lɛ̀lɛ dàala tɔ́n lè nɛ̀ ni cúʔɔ. 7 Kire kanumɔ nɛ̄, Kulocɛliɛ siɛnrɛ kɛnmɛ nɛ̄ bè, nyìʔɛnɛ nɛ́ dàala náà ni 'kò píra ŋáà nī wè, lire yē tɛ́ngɛyaʔala kàsun mɛ́ gè, bèri siri gè nɛ́ siɛnnɛ pe cúʔɔwori ní dè, bàli pe wè nɛ fìʔɛ́ Kulocɛliɛ nɛ̄ wèʔ.

8 Nɛ siinyɛninɛ, kaala láà nigbe yē baa nàa nɛ̄ yeli sì yɛli bè fìʔɛ lèʔ: cɛngɛ nigbe kiī majo yiʔɛlɛ sirakogunɔ (1 000) gīɛlɛ Kàfɔli yiʔɛ mɛ́ gè, nɛ́ yiʔɛlɛ sirakogunɔ míɛni kiyē majo cɛngɛ nigbe gī. 9 Kàfɔli wiǐ je mɔgɔ bé wi nyafɛnigɛ fori gèʔ majo bɛ̀ pàli nɛ ki sɔ̀ngí gèʔ. ʔéʔe, wi nyɛ́nì wi fungo nyígi gè wī yeli kɔli mɛ́ gè. Wi wè nɛ caa wàa nigbe- pùunni yeli nīʔ, nɛ̀ ki yaʔa wiī nɛ ki caa siɛnnɛ pe mìɛni lɛ̀lɛ taa bè kàduʔu wáa pe kapiʔile mɛ́ gèle.

10 Nɛ̀ ki yaʔa ki bé pɛn bɛ̀ kàyuuwo tíɛlɛ. A ki cɛngɛ ki kɛ́nì nɔ̀ gè, nyìʔɛnɛ ni bé tùn kpuʔɔ bè nyɛgɛ bè tóri. Nyìʔɛnɛ yɛrɛ ti mìɛni bè súʔu bè cɛ́rigɛ. Dàala lè nɛ́ siɛnnɛ kakpiʔiligele ní gèle, ti mìɛni bé múgu yaʔa kàyuʔujuufɔli mɛ́ wè.

11 Bɛ̀ sí ki nyaa ti mìɛni bé nyɛgɛ bè tóri dè kɛnmɛ báà nɛ̄ bè, yeli sí yɛli bè puu siɛnnɛ bíli felile ? Yeli tánʔagɛnmɛ pi 'yɛli pi- puu tiɛlɛ fùn Kulocɛliɛ yiʔɛ mɛ́ gè bè ki tìɛ yeli nyɛ́nì yìye puɔ wi nɛ̄. 12 Bɛ̀ yeli nɛ Kulocɛliɛ wi cɛngɛ siri gè, ye- kɛnmɛ pi mìɛni kpíʔile yeri ŋàʔaná kire ga buu wi gbɛ̀ pɛn fáari. Kire cɛngɛ gè, nyìʔɛnɛ ni bé súʔu bè nyɛgɛ, dí nyìʔɛnɛ yɛrɛ ti sí nyɛgɛ kàsun káfugo nī gè.

13 Nɛ̀ ki yaʔa weli nɛ ki siri gàa nyuɔ Kulocɛliɛ wi 'fɛ̀ni gè, kire ki bága puu nyìʔɛnɛ fɔnnɔ lè nɛ́ dàala fɔnnɔ ní lè. Kire tiʔɛ ki bé puu sínmɛ kòridiʔɛ gè.

14 Kire nɛ̄, nɛ siinyɛninɛ, bè yeli yaʔa yeli de tire siri dè, ye- ŋàʔana ye kɛnmɛ pi mìɛni kpíʔile kire ga buu Kulocɛliɛ wi pa yeli nyaa cìilile nɛ́ ní kpɔlidiɛlɛ fùn, nɛ́ ní yanyige nɛ̄ nɛ́ wi ní.

15 Yeri sɔ̀ngí de taʔa nɛ́ Kàfɔli wi funnyige ní gè, gàa ki bé ki yaʔa dí yeli- suɔlɔ taa lè. Tire míɛni weli siinyɛni wè, wi 'ti juu nɛ̀ ti sɛbɛ nɛ̀ kɛn yeli mɛ́ nɛ́ sícilimɛ ní bàa Kulocɛliɛ 'kɛn wi mɛ́ wè. 16 Tire wuʔu nɛ̄ wi 'ki sɛbɛ wi sɛbɛlɛ pe mìɛni nī bèle, bà wiī nɛ siɛnrɛ dáà wuʔu nyu gè. Tàa kɔri sí yē gbɛ̀lidɛ bè ti cɛ́n; kanaasinjɛ́nminɛ pálì sí yē baa bàli piyè tɛnmɛnɛ taa lèʔ, piyē nɛ ti kɔri yiʔi wè nɛ nyu. Piyē nɛ ki kanumɔ kpínʔini bè nɛ́ tiɛyɛ yáà ní. Kire ki bága pɛn nɛ́ peli tíimɛ cúʔɔwori ní dè.

Siɛnsɛnrɛ dè

17 Kire nɛ̄, nɛ siinyɛninɛ, bɛ̀ mi nyɛ́nì ti juu nɛ̀ tìɛ yeli nɛ̄ wè, ye- yìye cò macɛ́n kire ga buu sìnzinminɛ bálì pe pùunnidiɛyɛ yi fǎga yeli líɛ yeli- sa fɔ̀n yeli yéridiʔɛ lìrige nī gè tɛ́ngɛlɛ nī lèʔ. 18 Kire nɛ̄ yeri waa yiʔɛmɛ súuri weli Zezi , weli Suɔfɔli, wi nɛ́ wi cɛ́nnɛ nī lè.

Kpuɔmɔ pi- puu wi wobo píra ŋáà nī wè nɛ́ lɛ̀gɛlɛ ke mìɛni nī !  !