4
1 Kulocɛliɛ wi 'nyuɔ fɛ̀ni weli mɛ́ nɛ́ jo weli bé gbɛ̀ jíin ŋɔ́daala nī lè nàa wi 'gbòbori weli mɛ́ lè;
ki nyafɛnigɛ ki tíin weli wuʔu.
Kire nɛ̄ weri wìye ciʔige kire ga buu wàa fáala fǎga kò yeli nī sìnjiin nīʔ.
2 Kire Kataanna Siɛnrɛ dáà dè,
ti 'juu weli mɛ́ majo bɛ̀ ti yé juu bìli mɛ́ bèle waama kùlo nī lè.
A pe sí cíi,
pìye tɛ́ngɛ ki siɛnrɛ nɛ̄ dèʔ,
kire nɛ̄ piyè tɔ̀ni taa ti nīʔ.
Nɛ́ ki cɛ́n piyè wúɔ nɛ́ bàli ní pe 'ti lúʔu nɛ́ tɛ́ngɛ ki siɛnrɛ nɛ̄ dèʔa.
3 Weli bálì we 'tɛ́ngɛ ki siɛnrɛ nɛ̄ dè,
weli we bé jíin kire ŋɔ́daala nī lè.
Gìi sí ki 'bìli kúɔ bèle,
a Kulocɛliɛ 'jo:
Mi fundanʔanigɛ nī gè,
a mi 'kàli nɛ́ jo:
«Siɛnnɛ bálì piyě jíin mi ŋɔ́daala tiʔɛ nī gè púloʔb.»
Bɛ̀ sí Kulocɛliɛ wi cé ki juu,
bà wi yé ŋɔ́daala gbòbori lè nɛ̀ yaʔa lɛ̀lɛ líì nī wi cé duniya faan wè nɛ̀ kúɔ wè.
4 Weli 'ki cɛ́n lire yé gbòbori nɛ̀ yaʔa nɛ́ ki cɛ́n Kulocɛliɛ 'juu cɛnyɛ kɔlisiinwuʔu nɛ̄ gè tiʔɛ káà nī siɛnsɛbɛrɛ nī dè nɛ́ jo:
A Kulocɛliɛ wi 'ŋɔ́ nɛ̀ taa wi baara ti mìɛni nɛ̄ dè cɛnyɛ kɔlisiinwuʔu nɛ̄ gèc.
5 Bè sí ní koli ki juu gè,
gàa weli 'juu nɛ̀ kúɔ sɛbɛ ŋáà nī wè:
«Siɛnnɛ bálì piyě jíin mi ŋɔ́daala tiʔɛ nī gè púloʔd.»
6 Bàli sí pe yé puu siɛnpelile nɛ̀ ŋɔ́daala Kataanna Siɛnrɛ dáà lúʔu dè,
piyè jíin ŋɔ́daala nī lèʔ pe sìnluʔumɔ pire kɛnmɛ nɛ̄ bè.
Kire nɛ̄ Kulocɛliɛ ŋɔ́daala niī bile súuri kire ga buu pàli gbɛ̀ jíin.
7 Kulocɛliɛ wi 'cɛngɛ káà tɛ́ngɛ,
kire gī pàngɛ gè,
bè jíin wi ŋɔ́daala nī lè.
Ki 'mɔgɔ,
kire kàduʔu mɛ́,
a wi kɛ́nì ki siɛnrɛ le dè Dawuda nyuɔ nī gè,
dàa weli 'juu nɛ̀ kúɔ sɛbɛ ŋáà nī wè:
Pàngɛ gè,
a yeli 'Kulocɛliɛ nyasiɛnrɛ lúʔu dè,
ye fǎga yeli funyɔ gbɛ̀n yèʔe.
8 Nɛ́ ki cɛ́n a ki yē Yesuwe yé jáa nɛ̀ pe nyɔ́gɔ ŋɔ́daala nī lè,
Kulocɛliɛ sì cî ní cɛngɛ káà wuʔu juuʔ.
9 Bɛ̀ sí ki yē gè,
cɛndɛnigɛ cɛngɛ gáà gī cɛnŋɔdaʔa gèf,
kiī nɛ tíin bile súuri Kulocɛliɛ wuulo mɛ́ bèle.
10 Ŋàa wi 'jíin ŋɔ́daala nī lè nàa Kulocɛliɛ 'gbòbori lè,
wi nɛ̂ ŋɔ́ nɛ̀ taa wi baara nɛ̄ dè.
Kire ŋɔ́daala náà niī bɛ̀ Kulocɛliɛ tíimɛ woli tíɛlɛ lè,
bà wi yé duniya faan wè nɛ̀ kúɔ wèg.
11 Kire nɛ̄,
we- gbɛ̀nmɛ le we jíin ŋɔ́daala náà nī lè,
kire ga buu wàa fǎga tuuʔ bè puu Isirayɛliyé tíɛlɛ bèle sìnluʔulo bèleʔ.
12 Nɛ́ ki cɛ́n Kulocɛliɛ nyasiɛnrɛ tiī wiire nɛ́ ní ŋɔri ní;
ti 'tɛ́ni nɛ̀ tóri nyuɔyɔ siin ŋɔnɔ nɛ̄.
Ti nɛ̂ jíin siɛn nī wè fúɔ nɛ̀ kɛ́ laamɛ nī nɛ̀ sɛ́nì fungo nɛ́ pìle láʔala dè tìi nɛ̄,
níɛ céri suʔudiɛyɛ nɛ́ kácedɔlimɔ láʔala bè tìi nɛ̄.
Ti nɛ̂ siɛn sɔ̀ngirɔ nɛ́ wi nyɛ́ni kele siʔɛ gèle bè ke wàlimɛ cɛ́n bè.
13 Yafaanra táà fáala wè bileʔ dàa ti 'làri Kulocɛliɛ nɛ̄ wèʔ.
Ti mìɛni yē cáanyaʔara wi yiʔɛ mɛ́,
wire ŋáà mɛ́ weli bé sa juu tìɛ wè.
KACUƆNRILƆ KAFƆLI KIRISI WI BAARA DE
(4.14–10.18)
Weli 'sìʔɛrɛ nɛ̀ kpɔni Kulocɛliɛ nɛ̄ wè
14 Kire nɛ̄,
bɛ̀ kacuɔnrilɔ kàfɔli yē weli mɛ́ ŋàa wi 'kpúʔɔ wè nɛ́ sùuri nyìʔɛnɛ nī lè,
Zezi wè,
Kulocɛliɛ Jaa wè,
we- weli tɛ́ngɛlɛ sɔ́migɔ lè we cò kpuʔɔ.
15 Nɛ́ ki cɛ́n weli kacuɔnrilɔ kàfɔli wè,
kiì nyaa majo wiǐ gbɛ̀ jáa bè nyinimɛ taa weli ŋɔrifun kele nɛ̄ gèleʔ.
Kire sì cɛ bɛ̀ʔ;
wi yé puuwelige taa kele ke mìɛni nī majo bɛ̀ weli míɛni nɛ puuweliye taʔa yè,
nɛ̀ ki yaʔa wiì kapiile kpíʔileʔ.
16 Kire nɛ̄ weri sìʔɛrɛ́ weri kpɔni Kulocɛliɛ kùlofɔligɔ kácunʔɔ nɛ̄ gè nɛ́ nàzorido ní;
kire tiʔɛ nī weli bé nyinimɛ nɛ́ kpuʔɔrɔ taa ti- weli sáʔa lɛ̀lɛ líì nī weli màakuu yē ti nɛ̄ dè.