Zezi wi 'kpúʔɔ nɛ̀ tóri Misa nɛ̄ wè
3
1 Kire nɛ̄,
weli siinyɛninɛ,
Kulocɛliɛ wuulo bèle,
yeli bálì Kulocɛliɛ wi 'yeri ye pa kɛ́ nyìʔɛnɛ nī lèa,
yeri sɔ̀ngí Zezi wuʔu nɛ̄ gè,
wire ŋáà wī Kulocɛliɛ wi tundunwɔ wè nɛ́ ní kacuɔnrilɔ kàfɔli wè,
weli tɛ́ngɛlɛ koligo nī gè.
2 Wi 'puu siɛn ŋáà wi 'yɛli nɛ́ tɛ́ngɛlɛ ní Kulocɛliɛ yiʔɛ mɛ́ gè,
wire ŋáà wi 'wi tɛ́ngɛ Kulocɛliɛ baara nɛ̄ dè,
bɛ̀ Misa tíɛlɛ Kulocɛliɛ saʔa ki mìɛni nī gèb.
3 Ŋàa wi 'saʔa faan gè,
wi nɛ̂ kpuʔɔrɔ taa nɛ̀ tóri saʔa kire tíimɛ nɛ̄;
bɛ̀ míɛni ki yē Zezi wi yé kpuʔɔrɔ taa nɛ̀ tóri Misa nɛ̄ wè.
4 Nɛ́ ki cɛ́n saʔa ó saʔa muɔ nɛ nyaʔa gè,
siɛn wi 'ki faan,
nɛ̀ ki yaʔa ŋàa wi 'yɛrɛ ti mìɛni faan dè,
Kulocɛliɛ wī.
5 Misa wire wè,
wi 'puu tɛ́ngɛmɛ siɛn Kulocɛliɛ saʔa ki mìɛni nī gè;
wi 'puu baakuɔwɔ nɛ ki tìí siɛnrɛ dáà Kulocɛliɛ cî ga ba juu bè láʔa dèc.
6 Nɛ̀ sí ki yaʔa Kirisi wè,
Kulocɛliɛ Siɛnnyiɛnɛgɔnwɔ wè,
wi 'puu Jaafɔli,
nɛ́ ní tɛ́ngɛmɛ siɛn,
ŋàa wī tɛ́niwɛ Kulocɛliɛ saʔa nyùgo nɛ̄ gè.
Weli yē wi saʔa wuulo,
a weli 'weli tɛ́ngɛlɛ sɔ́migɔ lè nɛ̀ cò kpuʔɔ lè,
níɛ wìye nyíɛnɛ nɛ́ weli sɔ̀ngirɔ taʔadiʔɛ wuʔu ní gè.
Weri lúru Zezi mɛ́ wè we sí jíin ŋɔ́daala tiʔɛ nī gè
7 Ki sí n'gɛ,
majo bɛ̀ Kulocɛliɛ Pìle ni 'ti juu dè:
Pàngɛ gè,
a yeli 'Kulocɛliɛ nyasiɛnrɛ lúʔu dèd,
8 ye fǎga yeli funyɔ gbɛ̀n yèʔ majo bɛ̀ yeli 'ki kpíʔile cíimɛ lɛ̀lɛ nī lèʔ,
bɛ̀ yeli 'ki kpíʔile puuwelige cɛngɛ gè baa waama kùlo nī lèʔe.
9 Kire tiʔɛ nī gè yeli tobilo pe 'mi puu nɛ̀ wéli,
nɛ́ mi siʔɛ nɛ̀ wéli,
nɛ̀ ki yaʔa pe 'mi kakpiʔiligele nyaa gèle yiʔɛlɛ togosiinf.
10 Kire kɛnmɛ nɛ̄ a mi fungo ki sí yɛ̀ kire kɛ̀nnɛ náà siɛnnɛ kúrugu bèle,
a mi sí ki juu nɛ́ jo:
«Siɛnnɛ pálì bīɛlɛ,
pe funyɔ yi pùunní nɛ waa súuri;
piyè mi koligo cɛ́n gèʔ.»
11 Kire nɛ̄,
mi fundanʔanigɛ nī gè,
a mi 'kàli nɛ́ jo:
«Siɛnnɛ bálì piyě jíin púloʔ mi ŋɔ́daala tiʔɛ nī gèʔg.»
12 Siinyɛninɛ,
yeri yìye ciʔige díɛʔ,
kire ga buu yeli nī bèle wàa fungo fǎga piiʔ wi- kò sìndɛngɛwɛ bè láʔa Kulocɛliɛ wewiiwe nɛ̄ wèʔ.
13 Gìi gī baa gè,
yeli 'yɛli bèri lèbaanna kanʔa yìye mɛ́ cɛngɛ ó cɛngɛ,
bɛ̀ ki yē ŋɔ̀ wè,
pàngɛ gèh,
kire ga buu wàa fǎga tí kapiile ni- wi fáanniʔ wi- wi fungo gbɛ̀n gèʔ.
14 Nɛ́ ki cɛ́n weli nyɛ́nì kò Kirisi wi kodanʔanyɛninɛ wī,
a weli 'fɔ̀li nɛ̀ weli tɛ́ngɛlɛ cò lè kpuʔɔ wè nàa ni kíni nɛ̀ puu weli mɛ́ sélimɛ nɛ̄ bè,
nɛ̀ pɛ́nì nɔ̀ ki kúɔmɔ nɛ̄ bè.
15 Majo bɛ̀ ki yé juu nɛ́ jo:
Pàngɛ gè,
a yeli 'Kulocɛliɛ nyasiɛnrɛ lúʔu dè,
ye fǎga yeli funyɔ gbɛ̀n yèʔ majo bɛ̀ yeli 'ki kpíʔile cíimɛ lɛ̀lɛ nī lèʔi.
16 Kire 'jo,
báli sí bīɛlɛ bàli pe cé wi nyasiɛnrɛ lúʔu dè nɛ̀ ki yaʔa pe 'cíi Kulocɛliɛ nɛ̄ wè ?
Peli bɛ̀ʔ lé bàli Misa yé pe yiʔɛ kíni gè kire ga buu pe- yiri Ezipiti kùlo nī lè lé ?
17 Bíli sí kúrugu Kulocɛliɛ fungo ki cé yɛ̀ gè,
yiʔɛlɛ togosiin nī gèle ?
Peli bɛ̀ʔ lé,
bàli pe yé kapiʔile kpíʔile gèle,
a pe 'tuu nɛ̀ kùu waama kùlo nī lèj lé ?
18 A Kulocɛliɛ sí kàli nɛ́ jo:
Siɛnnɛ bálì piyě jíin mi ŋɔ́daala tiʔɛ nī gè púloʔk,
báli wuʔu sí wi 'puu nɛ nyu ?
Peli bɛ̀ʔ lé bàli pe yé cíi,
piyě lúʔu bèleʔl ?
19 Weli nɛ ki nyaʔa piyè gbɛ̀ nɛ̀ jíin Kulocɛliɛ ŋɔ́daala tiʔɛ nī gèʔ pe sìndɛngɛmɛ pire kɛnmɛ nɛ̄ bèʔ.