Gàa ki bága de kpínʔini cɛnzɛnyɛ nī yè
3
1 Muɔ 'yɛli bè ki cɛ́n,
Timote,
cɛnzɛnyɛ nyáà yi báan yè,
làgbɛngɛlɛ bága puu baa.
2 Siɛnnɛ pe bága de pìye nyuɔmɔ yákuɔ caa,
dí wali wi sí pe dɛ́ni.
Pe bé puu nìɛnyiɛnigɛfɔlilɔ,
bèri pìye kpóri,
bèri Kulocɛliɛ teri wè.
Pe bé puu sìnluʔulo pe siivɔlilɔ kɔli mɛ́ gè,
nɛ́ kacɛ̀ngɛ sìnjɛ́nminɛ,
bè puu bàli pe wè nɛ tɔ́ri nɛ́ Kulocɛliɛ kele ní gèleʔ.
3 Pe bé puu dɛ́nigɛfunvɔlilɔ,
piyě de nyinimɛ tariʔ,
bèri siɛnnɛ sànʔá,
bè puu kpàricogo fùn,
nɛ́ fungbɛnyɛfɔlilɔ,
bè puu kacɛ̀ngɛ ki leguuloʔ.
4 Pe béri siɛnnɛ fáanni bèle bèri pe kanʔa pe leguulo mɛ́ bèle,
bè puu funwarigɛfɔlilɔ,
nàgbuʔɔrɔ ti bé ki yaʔa pe bé kò fúɔnnɔ.
Duniya wi tàanma pi bé pe dɛ́ni bè tóri Kulocɛliɛ nɛ̄ wèa.
5 Pe béri ki kpínʔini majo peli yē puɔlɔ Kulocɛliɛ nɛ̄ wè,
nɛ̀ ki yaʔa pe béri cìʔí tɛ́ngɛlɛ ni fànʔa nɛ̄ gè.
Ma láʔa kire siɛnnɛ bálì nɛ̄ bèle !
6 Pàli yē baa pe sunʔɔmɔ nī bàli pe jiin nɛ mári saaya nī yè.
Cɛlilɛ bálì pe 'fáanni madɛni bèle,
pe nìɛ pe cògí pe gáriyɛ nɛ̄ yè,
cɛlilɛ bálì pe 'nyì kapiʔile nɛ̄ gèle,
á kanɛdanʔana feliniʔɛyɛ yiī nɛ pe fíigi nɛ mári yè,
7 á piyē nɛ tɛnmɛnɛ caa súuri nɛ̀ ki yaʔa pe nɛ̌ jáa bè kányiʔɛ cɛ́n gèʔ.
8 Majo bɛ̀ ki yé buu faʔa gè,
bɛ̀ Janɛsi nɛ́ Janbirɛsib 'puu nɛ kìí nɛ́ Misa ní wè,
píra ŋáà nī wè,
siɛnnɛ bálì pe míɛni piyē nɛ kìí nɛ́ kányiʔɛ ní gè.
Pe sícilige ki nyɛ́nì koli,
pe tɛ́ngɛlɛ ni wè yafiɛnʔ.
9 A kire 'ki kɛn peli bèle,
piyě gbɛ̀ kɛ́ yiʔɛ mɛ́ʔ,
nɛ́ ki cɛ́n siɛnnɛ pe mìɛni bága pe ledomɔ wori cɛ́n dè,
majo bɛ̀ ki yé buu Janɛsi nɛ́ Janbirɛsi wuʔu nɛ̄ gè.
Pɔli nɛ Timote yɛrigi wè
10 Nɛ̀ ki yaʔa muɔ wè,
muɔ nyɛ́nì sɔ́migɔ nɛ̀ taʔa mi nɛ̄ mi tɛnmɛnɛ nī lè,
nɛ́ mi tánʔagɛnmɛ ní bè,
nɛ́ gìi mi nɛ cìrá bè kúɔ gè,
nɛ́ mi tɛ́ngɛlɛ ní lè,
nɛ́ mi funnyige ní gè,
nɛ́ mi dɛ́nigɛ ní gè,
nɛ́ mi lèbaanna ní lè.
11 Muɔ nyɛ́nì ki cɛ́n wuʔɔyɔ nyáà mi 'taa tɛ́ngɛlɛ wuʔu nɛ̄ gè nɛ́ mi fùrɔyɔ ní yè Antiyɔsi kàʔa nī gè,
nɛ́ Ikonɔmi kàʔa ní gè,
nɛ́ Liisitiri kàʔa nī gèc.
A mi 'yi kpàri nɛ̀ cò,
a Kàfɔli wi 'mi píle nɛ̀ suɔ yi mìɛni mɛ́.
12 Bɛ̀ ki yē gè,
bàli pe mìɛni pe caa bè kɛ́ yiʔɛ mɛ́ gè bè pe sìi puɔ wè Kulocɛliɛ nɛ̄ wè,
bè pe yaʔa pínɛnɛ nɛ́ Zezi Kirisi ní wè,
pe bé wuʔɔyɔ taa pe tɛ́ngɛlɛ kɛnmɛ nɛ̄ bè.
13 Nɛ̀ ki yaʔa siɛnpiile bèle nɛ́ jànvaafɔlilɔ ní bèle,
peli béri waa yiʔɛmɛ súuri kapiʔi nī gè.
Pe béri siɛnnɛ fáanni bèle de pùunní,
bèri pìye fáanni de pùunní peli tíimɛ bèle.
14 Gàa ki 'muɔ kúɔ gè,
ma nìre wáa tɛnmɛnɛ nī lè nàa muɔ 'taa lè bɛ̀ muɔ ki cɛ́n niī kányiʔɛ gè.
Muɔ nyɛ́nì ki cɛ́n ŋàa mɛ́ muɔ 'ni taa lèd.
15 Nɛ̀ ki líɛ baa muɔ pìire lɛ̀lɛ nī lè,
muɔ 'Kulocɛliɛ siɛnsɛbɛrɛ cɛ́n dè.
Ti bé gbɛ̀ sícilige kɛn gàa ki waa suɔlɔ mɛ́ lè a siɛn 'tɛ́ngɛ Zezi Kirisi nɛ̄ wèe.
16 Siɛnsɛbɛrɛ ti mìɛni 'yɛ̀ Kulocɛliɛ wire tíimɛ mɛ́f.
Tiī pɔ́ridɔ bè siɛn tɛnmɛ kányiʔɛ nɛ̄ gè,
bè siɛn yige wi pùunnidiʔɛ nī gè,
bè siɛn sìɛn wè,
bè wi tɛnmɛ sínmɛ koligo nɛ̄ gè.
17 Bɛ̀ sí ki bé puu dí Kulocɛliɛ siɛn wi sí sɔ́migɔ bè gbòbori yaʔa,
bè gbɛ̀ jáa bèri kacɛ̀ngbiʔiligele ke mìɛni kpínʔini.