Timote 'yɛli bèri Kulocɛliɛ siɛnrɛ jáari dè
4
1 Mi 'tɔ̀ni nɛ ki nyu nɛ gbɛ̀ngí muɔ mɛ́ Kulocɛliɛ yiʔɛ mɛ́ gè nɛ́ Zezi Kirisi yiʔɛ mɛ́ gè,
wire ŋáà wi bága kàyuʔu juu gè siɛnwiile nɛ̄ bèle nɛ́ kúbilo ní bèle cɛngɛ gíì wi bága pɛn wè,
bè pa wi kùlofɔligɔ tɛ́ngɛ gè:
2 mari Kulocɛliɛ siɛnrɛ jáari dè nɛ́ lèbaanna ní.
Mari ti nyu de gbɛ̀ngí de tìí pe nɛ̄ làjɛnnɛ nī lè nɛ́ làbiile ní lè.
Mari pe kolimɔ nyu bè pe nɛ̄,
mari lèbaanna nyɔ́gi pe nī.
Mari ki kpínʔini nɛ́ funnyige ní muɔ tɛnmɛnɛ ni mìɛni nī lè.
3 Nɛ́ ki cɛ́n lɛ̀lɛ láà bága pa nɔ̀,
siɛnnɛ piyě ní de caa de kányiʔɛ tɛnmɛnɛ lúru lèʔ.
Bɛ̀ pe ngbúʔulo ke bága de ki caa bèri tɛnmɛnɛ láà lúru nàa ni 'yɛli nɛ́ pe kanɛdanʔana ní gèle,
pe béri kire tɛnmɛfɔlilɔ bálì felile gbunʔuni bèle pìye táanni.
4 Pe bé ngbúʔulo tɔ́n gèle kányiʔɛ kɔli mɛ́ gè bè ke yiʔɛ bèri múʔurudo kele lúru gèle.
5 Nɛ̀ ki yaʔa,
muɔ Timote wè,
ma mìɛ cògɛnmɛ cɛ́n kele ke mìɛni nī gèle.
Mari lèbaanna nii wuʔɔgɔ lɛ̀lɛ nī lè,
mari Kataanna Siɛnrɛ jáari dè.
ʔaan,
-muɔ baara kúɔ dè ma forigo.
Pɔli wi 'nɔ̀ kàsɛnigɛ ki kúɔmɔ nɛ̄ bè
6 Gàa ki 'mi kúɔ wè,
mi sìi wi kúu nɛ waa wī,
wi bé sùʔu bè wo bɛ̀ kakuɔrɔ diviɛn tíɛlɛ Kulocɛliɛ mɛ́ wèa.
Mi lɛ̀lɛ ni 'nɔ̀ bè yiri duniya nī wè.
7 Mi 'cáanjɛ̀nrɛ cáan dè nɛ̀ mi kàsɛnigɛ kúɔ gèb.
Mi nyɛ́nì tɛ́ngɛlɛ cò lè.
8 Gàa ki 'kò m'mɛ́ gè,
kire gī kàsɛnigɛ ki tɔ̀ni wè,
gàa Kàfɔli wi 'tɛ́ngɛ m'mɛ́ gè,
kpuʔɔrɔ ndɔ̀ngɔ gáà gī sínnɛ wuʔu gèc.
Wire ŋáà wi kàyuʔu nyu gè nɛ síngi wè,
wire wi bé ki kɛn m'mɛ́ kire cɛngɛ gè,
kiì sí nyaa majo mi yákuɔ wīʔ;
bàli pe mìɛni bīɛlɛ Kirisi wi pɛn woli ni 'kpúʔɔ pe mɛ́ wè.
Kajuusɛngɛlɛ gèle
9 Mari ŋàʔaná ma pɛn náʔa m'mɛ́ fáari.
10 Bɛ̀ píra ŋáà duniya yɛrɛ ti 'Demasi dɛ́ni wè,
a wi 'mi yaʔa nɛ́ kɛ́ Tesaloniki kàʔa mɛ́.
Kiresan wire 'kɛ́ Galasi kùlo mɛ́,
a Tiiti 'kɛ́ Dalimasi tɛ́nimɛ nī.
11 Luku wire nigbe wī náʔa nɛ́ mi ní.
Ma Marikid kɔ́ri wè wiri báan nɛ́ muɔ ní,
nɛ́ ki cɛ́n wi bé gbɛ̀ jáa bè mi sáʔa Kulocɛliɛ baara nī dè.
12 Mi nyɛ́nì Tisiiki tórigo wè Efɛzi kàʔa mɛ́e.
13 A muɔ kɛ́nì báan wè,
mari báan nɛ́ mi burugbuʔɔ ní gè gàa mi 'yaʔa Turowasi kàʔa mɛ́ gè,
Karipusi saʔa nī gè.
Nɛ́ míɛni mari báan nɛ́ sɛbɛlɛ ní bèle,
bàli cɛ bīɛlɛ sɛ̀ngɛ wuulo bèle.
14 Alɛgizandiri wèf,
fɔ̀ninaguɔ wè,
wi nyɛ́nì kapiiniʔɛgɛlɛ kpíʔile mi nɛ̄.
Kàfɔli wi bé ki sàri wi mɛ́ nɛ̀ yɛli nɛ́ wi kakpiʔiligele ní gèleg.
15 -Mìɛ cò wi nɛ̄ díɛʔ,
nɛ́ ki cɛ́n wi nyɛ́nì weli siɛnrɛ kìɛ dè.
16 Tabelige nɛ̄ gè,
bà mi 'puu kàyuʔujuulo yiʔɛ mɛ́ gè bè juu mi kaala nɛ̄ lè,
siɛn sì 'puu baa nɛ́ mi níʔ,
pe mìɛni cé mi yaʔa.
Kulocɛliɛ wi- ki yaʔa pe nɛ̄.
17 Nɛ̀ sí ki yaʔa,
Kàfɔli wè,
wi 'puu nɛ́ mi ní,
a wi 'ŋɔri nyɔ́gɔ mi nī,
kire ga buu mi- gbɛ̀ jáa bè Kataanna Siɛnrɛ jáari dè fúɔ bè sa nɔ̀ ki láʔala nɛ̄ lè,
kire ga buu bàli pe mìɛni bèle pe wè Zuufulo bèleʔ peli- gbɛ̀ jáa bè ti lúʔu.
A wi 'mi suɔ jàri nyuɔ mɛ́ gèh.
18 Kàfɔli wi bága mi píle bè suɔ siɛnnɛ kapiigbiʔiligele ke mìɛni mɛ́,
bè mi suɔ kire ga buu mi- jíin wi kùlofɔligɔ nī gè baa nyìʔɛnɛ nī lè.
Wire nɛ̄ kpuɔmɔ pi 'yɛli súuri !
Ki- taa ki puu bɛ̀ !
Síɛrilɛ sɛnnɛ lè
19 Ma Pirisiili nɛ́ Akiilasii síɛri m'mɛ́,
nɛ́ Wonɛzifɔrij narigɛ ní gè.
20 Erasitik wi 'kò Korɛnti kàʔa mɛ́.
Turofiimi wè,
wi 'puu yaawa a mi 'wi yaʔa Milɛti kàʔa mɛ́.
21 Ma ŋàʔana ma sí pɛn sɛ́nì wiire lɛ̀lɛ ni- nɔ̀ lè.
Ebulusi wè,
nɛ́ Pudɛnsi ní wè,
nɛ́ Linusi ní wè,
nɛ́ Kulodiya ní wè,
nɛ́ weli siinyɛninɛ pe mìɛni ní bèle,
pe muɔ síɛri baa.
22 Kàfɔli wi- puu nɛ́ muɔ ní !
Kulocɛliɛ kpuʔɔrɔ ti- puu yeli ye mìɛni nɛ̄ !