Timote 2 2

Zezi baakuɔcɛ̀nwɛ wè wuʔɔgɔ lɛ̀lɛ nī lè

1 Muɔ wè, mi pùɔ, ma ŋɔri nyɔ́gɔ mìɛ nī, kɛnmɛ nɛ̄ bè dàa weli 'taa dè bɛ̀ weli yē pínɛnɛ nɛ́ Zezi Kirisi ní wè. 2 Tɛnmɛnɛ náà muɔ 'taa mi mɛ́ lè siɛnniʔɛnɛ nyaamɛ nɛ̄ bè, ma ni kɛn pàli mɛ́, bàli nɛ̄ siɛnnɛ pe 'tɛ́ngɛ bèle, bàli pe bé gbɛ̀ jáa bè pàli tɛnmɛ ni nɛ̄ lè.

3 Mari pínɛ mari wuʔɔ nɛ́ mi ní, majo bɛ̀ Zezi kapiɛngbuɔnjɛ̀nwɛ tíɛlɛ. 4 Kapiɛngbuɔnwɔ ŋáà wi 'baara sirasiire nī dè, wi nìɛ caa wire woli ni- wire kàfɔli dɛ́ni wè, ŋàa wi 'wi líɛ baara nɛ̄ dè. Wi nɛ̌ ki yaʔa cɛngɛ ó cɛngɛ duniya kele ke- wire yérigeʔ. 5 Bɛ̀ míɛni sí ki yē, a siɛn nɛ kàsɛnigɛ fé gè, wiǐ gbɛ̀ ki tɔ̀ni taaʔ ka laa wiì fɛ̀ nɛ̀ yɛli nɛ́ kàsɛnigɛ ki kajuudiʔɛlɛ ní gèleʔ. 6 A tàfaliwɛ wiī nɛ fáli kátii wè, wi 'yɛli bè puu péliwe bè wi siʔi ki yaliire ti tɔ̀ni taa wè. 7 Mari sɔ̀ngí mi siɛnjuuro nɛ̄ dè, bà Kàfɔli wi bé muɔ sáʔa muɔ- ti mìɛni kɔri cɛ́n wè.

8 Te sɔ̀ngí mari taʔa nɛ́ Zezi Kirisi ní wè, wire ŋáà wi 'nyɛ́ nɛ̀ yiri kúbilo sunʔɔmɔ nī bè, wire ŋáà wi 'yiri siimɛ tùlugo nī gè. Tire siɛnrɛ ti 'kɔ́n mɛ́ dè dàa mi nɛ jáari dè. 9 Tire Kataanna Siɛnrɛ tire kɛnmɛ nɛ̄ mi yē nɛ wuʔɔ fúɔ a pe 'mi puɔ nɛ́ nyùʔɔdiriye ní yè majo kapiigbiʔiliwe mi yē. Nɛ̀ sí ki yaʔa Kulocɛliɛ siɛnrɛ tire wè puɔrɔʔ. 10 Kire kɛnmɛ nɛ̄ mi nɛ kele ke mìɛni kpàrí nɛ cògí bàli kɛnmɛ nɛ̄ Kulocɛliɛ 'nyíɛnɛ nɛ̀ kɔ̀n wè, kire ga buu pe- suɔlɔ taa lè nàa ni 'kɔ́n Zezi Kirisi mɛ́ wè. Bɛ̀ ki yē gè pe bé bànguɔ kpuɔmɔ taa bè míɛni.

11 Siɛnrɛ ti n'dɛ, kányiʔɛ wori dè:

A ki sí yē weli 'kùu nɛ́ Kirisi ní wè,

weli bága puu sìi nɛ̄ nɛ́ wi ní bè pínɛ.

12 A weli 'ki kpàri nɛ̀ cò nɛ wuʔɔ nɛ́ wi ní wè,

weli bé puu tɛ́ninɛ nɛ́ wi ní kùlofɔlimɔ nī bè.

A ki sí nyaa weli 'cíi wi nɛ̄ wè,

wire míɛni bága cíi weli nɛ̄.

13 A weli sí wè tɛ́ngɛmɛ siɛnnɛ bèle wi kɔli mɛ́ gèʔ,

wire wè, wi nɛ̂ kò tɛ́ngɛmɛ siɛn,

nɛ́ ki cɛ́n, wiǐ gbɛ̀ cíi wìi nɛ̄ʔ.

Baakuɔwɔ ŋáà wi 'míɛtanʔa taa Kulocɛliɛ mɛ́ wè

14 Ma pe sɔ̀ngirɔ tìrige dè kele gálì nɛ̄ gèle. Ma juu ma tìɛ pe nɛ̄ gbɛ̀ngɛ Kulocɛliɛ yiʔɛ mɛ́ gè, pe fǎga de kàkiɛrɛ kpínʔini nɛ́ nyasiɛnkɛniyɛ yi kɔri ní wèʔ. Tire wè nɛ yakaa nyuʔɔʔ; tire yē nɛ báan nɛ́ cúʔɔmɔ ní bàli mɛ́ pe ti lúru dè. 15 Mari ŋàʔaná ma mìɛ tìɛ Kulocɛliɛ yiʔɛ mɛ́ gè majo baakuɔwɔ ŋáà wī wi kàfɔli wi nyɛ́nì wi siʔɛ nɛ̀ wéli wè, ŋàa wiì yɛli bèri fìɛrɛ taʔa dè wi baara nɛ̄ dèʔ, ŋàa wi kányiʔɛ siɛnrɛ gbòborí dè nɛ jáari dè. 16 Mari fé siɛnniʔɛrɛ nɛ̄ dè dàa tiì yɛli nɛ́ tɛ́ngɛlɛ ní lèʔ. Nɛ́ ki cɛ́n bàli pe pìye kanʔa tire mɛ́ dè, piyē nɛ líili nɛ waa Kulocɛliɛ nɛ̄ wè. 17 Kire siɛnnɛ bálì pe siɛnrɛ tiī bɛ̀ nɔmigɔ tíɛlɛ gàa ki 'luʔɔri gè nɛ́ píɛlɛ gè. Peli pálì bīɛlɛ Imɛnɛ wè nɛ́ Filɛti ní wè. 18 Peli nyɛ́nì kányiʔɛ koligo wáa gè, níɛ siɛnniʔɛnɛ fáanni bèle nɛ láʔala tɛ́ngɛlɛ koligo nɛ̄ gè, níɛ ki nyu nɛ́ jo kúbilo pe nyɛ́yirile ni 'tóri nɛ̀ kúɔ.

19 Nɛ̀ sí ki yaʔa, ŋáà Kulocɛliɛ sɔ́migɔ nɛ̀ tɛ́ngɛ wè, wiī baa lìriwe súuri, a siɛnrɛ ti 'sɛbɛ wi nɛ̄ nɛ̀ kò fìɛ nɛ́ jo: Kàfɔli wi 'pe cɛ́n bàli bīɛlɛ wire wuulo bèle. A ki sí ń'nɛ̀ jo: Ŋàa wi 'jo wire yē Kàfɔli wuu wè, ki 'yɛli wi de líili kapiʔi nɛ̄ gè.

20 Saakpuʔɔ nī gè, yakpiʔilide ti nɛ̌ puu tiɛ wori yákuɔ wīʔ nɛ́ walifiiwe wori yákuɔ wīʔ, tàa nɛ̂ puu míɛni gùnɛyɛ wori nɛ́ cuuro wori. Piɛrɛ pélide ti nɛ̂ puu cɛngbuʔɔ cɛnyɛ wori; sɛnrɛ tire nɛ̂ puu cɛnwɛriyɛ yakpiʔilide wori. 21 Ki sí n'gɛ, a wàa nɛ wìi cìile kapiʔi kɔli mɛ́ gè gàa wuʔu mi 'juu gè, wi bé puu kpuʔɔrɔ yalege tíɛlɛ, wàlidɛngɛwɛ wi Kàfɔli mɛ́ wè, ŋàa wi Kàfɔli wi nɛ̂ líɛ nɛ wi kakpiʔilijɛ̀ngɛlɛ ke míɛni kúu gèle.

22 Kire nɛ̄ mari fé nàgapunmɔ pi kanɛdanʔana nɛ̄ gèle, mari sínnɛ caa lè, nɛ́ tɛ́ngɛlɛ ní lè, nɛ́ dɛ́nigɛ ní gè, nɛ́ yanyige ní gè, nɛ́ bàli ní piyē nɛ náari mɛ́ wè nɛ́ funjiilige ní gè. 23 Ma cíi nyùgofun nɛ́ sìnjiligefun kàkiɛrɛ nɛ̄ dè; muɔ 'ki cɛ́n tiī nɛ báan nɛ́ kàgbaaligɛ ní. 24 Nɛ̀ ki yaʔa Kàfɔli wi sùkulowo wiì yɛli bè puu kàsiitunwɔʔ. Wi 'yɛli wi- puu funjɛ̀ngɛfɔli siɛnnɛ pe mìɛni kɔli mɛ́ gè, bé gbɛ̀ jáa bèri siɛnnɛ tɛnmɛ bèle, bé puu kpàricogofɔli kagbɛngɛlɛ nī gèle. 25 Wi 'yɛli bèri nyu de tìí siɛnnɛ nɛ̄ bèle nɛ́ funnyige ní, bàli pe cìʔí wi tɛnmɛnɛ nɛ̄ lè. Dùʔɔ Kulocɛliɛ bága pe yaʔa pe- pe sɔ̀ngirɔ yiʔɛ dè pe- kányiʔɛ cɛ́n gè, 26 dí pe sí koli bè sɔ̀ngijɛnrɛ líɛ dè. Bà pe bé jáa bè suɔ wi gáriyɛ mɛ́ yè, nyàa nī wi 'pe kùru nɛ̀ cò yè pe wi nyɛ́ni kele kpínʔini gèle.