Sɛbɛ siinwuu ŋáà Pɔli 'tórigo Timote mɛ́ wè
Timote siinwuu
Síɛrilɛ lè
1
1 Mi Pɔli wè,
mi yē Zezi Kirisi tundunwɔ nɛ̀ yɛli nɛ́ Kulocɛliɛ nyɛ́ni kaala ní lè.
Wi 'mi tun mi de sìi wori jáari dè,
sìi ŋáà wori nɛ̄ Kulocɛliɛ yé nyuɔ fɛ̀ni gè weli mɛ́ bɛ̀ weli yē pínɛnɛ nɛ́ Zezi Kirisi ní wè.
2 Mi nɛ sɛbɛ ŋáà tórigi wè Timote muɔ mɛ́,
muɔ ŋáà wī mi pìdɛniwɛ wè.
Tuufɔli Kulocɛliɛ nɛ́ weli Kàfɔli Zezi Kirisi,
pe- kpuʔɔrɔ nɛ́ nyinimɛ nɛ́ yanyige kɛn gè muɔ mɛ́.
Pɔli nɛ Kulocɛliɛ síɛri Timote wuʔu nɛ̄ gè
3 Mi nɛ Kulocɛliɛ síɛri wè,
wire ŋáà mɛ́ mi nɛ baara wè nɛ́ funviige ní gè,
majo bɛ̀ mi tuuliɛyɛ yi 'ki kpíʔile gè.
Mi nɛ muɔ wuʔu nyu gè wi mɛ́ lɛ̀lɛ ó lɛ̀lɛ nī a mi nɛ náari pìlige nɛ́ cɛnvugo nī gè.
4 A mi gbɛ́nɛ̀ sɔ̀ngi nɛ̀ taa muɔ yéturo wuʔu nɛ̄ gè,
ki láa nɛ̂ puu mi nɛ̄ kpuʔɔ bè muɔ nyaa kire ga buu mi fungo ki- nyì fundaanra nɛ̄ dè.
5 ʔaan,
mi yē nɛ sɔ̀ngí nɛ taʔa nɛ́ kányiʔɛ tɛ́ngɛlɛ woli ní lè nàa nī muɔ nī wè,
lire tɛ́ngɛlɛ náà ni 'puu muɔ yàaliʔɛ Lowizi mɛ́ wè nɛ́ muɔ yàa Enisi mɛ́ wèa.
Mi nyɛ́nì tɛ́ngɛ ki nɛ̄ kire tɛ́ngɛlɛ náà lè niī muɔ fungo nī gè míɛni píra ŋáà nī wè.
Pɔli 'lèbaanna nyɔ́gɔ Timote nī wè
6 Kire nɛ̄ mi nɛ muɔ sɔ̀ngirɔ tìrigí dè nɛ́ jo:
kpuʔɔrɔ dáà Kulocɛliɛ 'kɛn muɔ mɛ́ dè lɛ̀lɛ líì nī mi 'kiyɛ taʔa yè muɔ nɛ̄ wè,
ma kpuʔɔrɔ dáà yaʔa dè kàa de taʔala ti nɛ̄ muɔ nī.
7 Nɛ́ ki cɛ́n Kulocɛliɛ nyɛ́nì wi Pìle kɛn lè weli mɛ́;
niì ki yaʔa weli- puu fíɛrɛ funyɔ níʔb,
kire bɛ̀ʔ.
Ni nɛ̂ weli funyɔ nyì yè nɛ́ ŋɔri ní,
nɛ́ dɛ́nigɛ ní,
bè weli kpíʔile weri wìye ciʔigi.
8 Bɛ̀ sí ki yē gè,
ki fǎga puu muɔ nɛ̄ fìɛrɛ bèri Kàfɔli wori nyu dè de tìí siɛnnɛ nɛ̄ bèleʔ.
Ki fǎga ní puu muɔ nɛ̄ fìɛrɛ mi kɔli mɛ́ gè míɛniʔ bɛ̀ mi yē náʔa kasuu nī wèʔ.
Gìi ki 'yɛli gè,
te wuʔɔ nɛ́ mi ní kɛnmɛ báà nɛ̄ bè Kataanna Siɛnrɛ wuʔu nɛ̄ gè,
ma muɔ sɔ̀ngirɔ taʔa dè ŋɔri nɛ̄ dè dàa Kulocɛliɛ nɛ kanʔa dè.
9 Wire wi nyɛ́nì weli suɔ nɛ́ weli yeri weli- puu wi wuulo.
A wi sí ki kpíʔile,
kire sì nyaa majo weli kakpiʔiligele kɛnmɛ nɛ̄ wīʔ.
ʔéʔe,
wi yé kíni nɛ̀ ki nyíɛnɛ nɛ̀ kɔ̀n nɛ̀ kire gbòbori nɛ̀ yaʔa wi kpuʔɔrɔ kɛnmɛ nɛ̄ bèc kpuʔɔrɔ dáà wi 'kɛn weli mɛ́ náʔanɛ duniya 'wi faan wè,
Zezi Kirisi kɛnmɛ nɛ̄ bè.
10 Píra ŋáà nī wè,
Kulocɛliɛ wi 'kire kpuʔɔrɔ tìɛ dè a weli 'ti nyaa,
lɛ̀lɛ líì nī weli Suɔfɔli Zezi Kirisi wi yé pɛn duniya nī wè,
a wi 'kùu wi fànʔa cúʔɔ gèd.
Kataanna Siɛnrɛ kɛnmɛ nɛ̄ bè,
a wi 'ki kpíʔile a weli 'sìi cɛ́n wè,
sìi ŋáà wiǐ gbɛ̀ cúʔɔ wèʔ.
11 Bèri Kataanna Siɛnrɛ jáari dè,
kire kɛnmɛ nɛ̄ Kulocɛliɛ wi 'mi tɛ́ngɛ wi siɛnjuuwo,
nɛ́ wi tundunwɔ,
nɛ́ tɛnmɛfɔli.
12 Kire kɛnmɛ nɛ̄ míɛni mi yē nɛ wuʔɔ kele gálì nɛ̄ gèle.
Nɛ̀ sí ki yaʔa ki wè mi nɛ̄ fìɛrɛʔ,
gìi sí gī baa gè,
mi 'ki cɛ́n ŋàa nɛ̄ mi 'tɛ́ngɛ wè.
Mi 'ki sɔ́migɔ nɛ̀ cɛ́n,
fànʔa yē wi mɛ́ bèri ki wéli gàa wi 'kɛn m'mɛ́ gè fúɔ bè pa nɔ̀ cɛnzɛngɛ nɛ̄ gè.
13 Kányiʔɛ siɛnrɛ dáà nɛ̄ mi 'muɔ tɛnmɛ dè,
mari ti cògí ma yɛli nɛ́ tɛ́ngɛlɛ ní nɛ́ dɛ́nigɛ ní gè,
gàa weli 'taa bɛ̀ weli yē pínɛnɛ nɛ́ Zezi Kirisi ní wè.
14 Tɛnmɛjɛ̀nnɛ náà mi 'kɛn muɔ mɛ́ lè,
ma ni cò cɛ̀ngɛ nɛ́ Kulocɛliɛ Pìle fànʔa ní gèe nàa ni yē kòrilo weli nī bèle.
Wonɛzifɔri kacɛ̀ngbiʔiliye wori dè
15 Muɔ nyɛ́nì ki cɛ́n nɛ̀ kúɔ,
bàli pe 'puu nɛ́ mi ní Azii tɛ́nimɛ nī bè,
a pe mìɛni 'láʔa mi nɛ̄f.
Peli pálì bīɛlɛ Fijɛli nɛ́ Ɛrimɔjɛni ní wè.
16 Kàfɔli wi nyinidaaguugo ki- puu Wonɛzifɔri saʔa nɛ̄ gè,
nɛ́ ki cɛ́n wi nyɛ́nì mi fungo gbiʔɛlɛ gè lɛ̀gɛlɛ sáa nī,
wiì fìɛrɛ taa mi nɛ̄ʔ bɛ̀ pe 'mi puɔ nyùʔɔdiriye ní yè nɛ́ mi le kasuu nī wè.
17 Bà wi sɛ́nì jíin Wurɔmi kàʔa nī gè,
a wi 'mi caa nɛ̀ màʔa nɛ́ lèbaanna ní fúɔ nɛ̀ sɛ́nì mi nyaa.
18 Kàfɔli Zezi wi- ki kpíʔile Kàfɔli Kulocɛliɛ wi- nyinimɛ taa Wonɛzifɔri nɛ̄ wè kàyuʔujuujɛngɛ gèg !
Muɔ nyɛ́nì ki cɛ́n kányiʔɛ ní kacɛ̀ngboliyo sáa nyàa wi 'kpíʔile mi mɛ́ wè Efɛzi kàʔa nī gè.