Tɛ́ngɛfɔlilɔ yɛrigɛnmɛ bè
5
1 Fǎga juu gbɛ̀ngɛ nàgaliɛwɛ nɛ̄ wèʔ,
mari wi yɛrigi bɛ̀ muɔ tuu tíɛlɛ.
Mari nàgapunminɔ yɛrigi bèle majo muɔ siinyɛninɛ bīɛlɛ.
2 Kàceliɛlɛ bèle,
mari pe yɛrigi bɛ̀ muɔ yàala tíɛlɛ.
Mari ceyɛlilɛ nàʔa bèle nɛ́ funjiilige ní,
majo muɔ siinyɛninɛ bīɛlɛ.
Tɛ́ngɛfɔlilɔ gboli ni lakicɛlilɛ bèle
3 Mari kpuʔɔrɔ tari lakicɛlilɛ nɛ̄ bèle,
bàli bīɛlɛ sáʔafɔli wè pe nɛ̄ bèleʔ.
4 Nɛ̀ ki yaʔa,
a pìile yē lakicuɔ ŋíì mɛ́ wè,
á kire bɛ̀ʔ wi pìtaʔasiile bèle,
peli mɛ́ ki yē gbínʔɛnɛ pe- ki tɛnmɛ bè pe tɛ́ngɛlɛ tìɛ lè a piyē nɛ pe siivɔlilɔ tugoro líi dè,
bà pe bé pe fuʔɔ tɔ́n gè pe mɛ́ gàa pe 'kpíʔile peli mɛ́ gè.
Kire gáà kire ki 'Kulocɛliɛ dɛ́ni wè.
5 Lakicuɔ ŋáà wī wìi nigbe wè,
sáʔafɔli wè wi nɛ̄ wèʔ,
wi nyɛ́nì wi sɔ̀ngirɔ taʔa dè Kulocɛliɛ nɛ̄.
Kire lakicuɔ wi nìɛ náari níɛ̀ nɛ Kulocɛliɛ fiɛn wè pìlige nɛ́ cɛnvugo.
6 Nɛ̀ ki yaʔa,
lakicuɔ ŋáà wi tári nɛ̀ yɛli nɛ́ wi kanɛdanʔana ní gèle,
wire nyɛ́nì kùu nɛ̀ kúɔ a wi cɛ́ni yē sìi nɛ̄ wè.
7 Ti n'dɛ dàa muɔ 'yɛli bè juu gbɛ̀ngɛ pe mɛ́ dè,
kire ga buu siɛn fǎga gbɛ̀ tìgi pe nɛ̄ʔ.
8 A siɛn wáà sí wè nɛ wi narigɛ wuulo màakuu nyuʔɔ wèʔ,
bé nɛ́ ga jo wi saʔa wuulo bèleʔ,
wi nyɛ́nì cíi tɛ́ngɛlɛ nɛ̄ lè,
wi cɛ́nì pii wī sìndɛngɛwɛ nɛ̄.
9 Gàa ki 'lakicɛlilɛ míɛsɛbɛrɛ wuʔu kúɔ gè,
bàli bīɛlɛ tɛ́ngɛfɔlilɔ gboli ni sári wè,
a pe je lakicuɔ ŋíì míʔɛ sɛbɛ gè,
wi 'yɛli wi 'yiʔɛlɛ togotaanri taa,
bè ki yaʔa wi yé puu nàguɔ nigbe cuɔa.
10 Wi 'yɛli wi- puu pe wi cɛ́n kacɛ̀ngbiʔiligele nɛ̄ gèle,
wi sí yé puu ŋàa wi 'wi pìile sɔ́migɔ bèle nɛ̀ gbó wè,
wi sí yé puu ŋàa wi nabɔnminɔ tìrigí bèle,
ŋàa wi yé Kulocɛliɛ wuulo pe tɔliyɔ jíge yèb,
ŋàa wi 'fuunmɔfɔlilɔ sáʔa bèle,
nɛ́ kacɛ̀ngɛlɛ ke mìɛni feliye kpíʔile yè.
11 Nɛ̀ ki yaʔa lakicɛlilɛ bálì piyè liɛ wèʔ,
ma fǎga sí pe míɛyɛ sɛbɛ yè.
Nɛ́ ki cɛ́n a pe kanɛdanʔana ke kɛ́nì pe taa wè,
pe nìɛ caa bè nàguɔlɔ líɛ,
bé sí Kirisi yaʔa wè.
12 Kire nɛ̂ ki yaʔa pe bé sa kolimɔ taa bɛ̀ pe 'nyafɛnigɛ pélige cúʔɔ gè,
gàa ki yé pe 'puɔ Kirisi nɛ̄ wè.
13 Bɛ̀ pe wè nɛ yakaa kúu wèʔ,
pe nɛ̂ kò nɛ̂ nyaari kpáaya nī yè.
Kire yákuɔ bɛ̀ʔ,
bɛ̀ pe wè nɛ yakaa kúu wèʔ,
pe nìɛ siɛnniʔɛrɛ nyu nɛ mári níɛ̀ nɛ caa nɛ jiin siɛnnɛ kele nī gèle,
nɛ kele kálì nyu gàli kiyè yɛli gèleʔ.
14 Kire nɛ̄ mi nɛ ki caa lakicɛlilɛ bálì piyè liɛ bèleʔ,
pe- cepɔrigɔ kpíʔile bé sí pìile sii,
bé sí puu de pe saaya kàrigí yè cɛ̀ngɛ,
kire ga buu weli leguu wi fǎga fànʔa taa de weli míʔɛ córi gèʔ.
15 Nɛ́ ki cɛ́n lakicɛlilɛ pálì nyɛ́nì láʔa kozinge nɛ̄ gè nɛ̀ taʔa Setɛni nɛ̄ wè.
16 A ki sí nyaa lakicɛlilɛ yē tɛ́ngɛfɔlicuɔ wáà narigɛ nī gè,
wi de pe sári kire ga buu ki fǎga nyaa tɛ́ngɛfɔlilɔ gboli mɛ́ lè tugoroʔ,
dí gboli ní sí gbɛ̀ jáa bèri lakicɛlilɛ sɛnminɛ sári bèle,
bàli bīɛlɛ siɛn wè pe nɛ̄ wèʔ.
Tɛ́ngɛfɔlilɔ gboli ni liɛlɛ bèle
17 Liɛlɛ bálì bīɛlɛ pe tɛ́ngɛfɔlilɔ gboli kàrigí lèc cɛ̀ngɛ wè,
pe 'yɛli nɛ́ kpuʔɔrɔ tiɛyɛ siin níd,
bàli cɛ bīɛlɛ pe ŋàʔaná nɛ́ lèbaanna ní nɛ Kulocɛliɛ siɛnrɛ nyu dè níɛ siɛnnɛ tɛnmɛ bèle.
18 Nɛ́ ki cɛ́n Kulocɛliɛ siɛnsɛbɛrɛ ti 'jo:
Muɔ sì yɛli bè jùɔ puɔ nùɔ wi nyuɔ nɛ̄ gèʔ a wiī nɛ yaliire sɛ̀ngí dèʔe.
A ti ń'nɛ̀ jo cígini:
Baakuɔwɔ wi 'yɛli nɛ́ wi sàri ní wèf.
19 Fǎga yéri ki nɛ̄ʔ bè dìgire taʔa tɛ́ngɛfɔlilɔ gboli liɛwɛ wáà nɛ̄ʔ fúɔ macɛn a siɛnnɛ siin kire ga laa siɛnnɛ taanri ti 'juu nɛ̀ ceri nɛ́ jo kiī kányiʔɛ gèg.
20 Bàli pe kapiʔile kpínʔini gèle,
ma juu pe nɛ̄ gbɛ̀ngɛ siɛnnɛ pe mìɛni nyaamɛ nɛ̄,
kire ga buu bìli pe- fíɛ,
pe fǎri kapiʔile kpínʔini gèleʔ.
21 Mi 'tɔ̀ni nɛ ki nyu nɛ gbɛ̀ngí muɔ mɛ́ Kulocɛliɛ yiʔɛ mɛ́ gè,
nɛ́ Zezi Kirisi yiʔɛ mɛ́ gè,
nɛ́ nyìʔɛnɛ tundunminɔ pe yiʔɛ mɛ́ gè bàli bīɛlɛ Kulocɛliɛ 'nyíɛnɛ nɛ̀ kɔ̀n wè,
ma kajuʔulo gálì cò gèle kpuʔɔ,
ma fǎga wàa kaala juu bè ceri gbínʔɛnɛ muɔ sɔ̀ngirɔ nī dèʔ,
ma fǎga wàa yige wàa nīʔ.
22 Ma fǎga caanri bè muɔ kiyɛ taʔa yè wàa nɛ̄ fáari bè wi tɛ́ngɛ baara táà nɛ̄ tɛ́ngɛfɔlilɔ gboli nī lèʔ,
kire ga buu muɔ fǎga liɛlɛ taa wi kapiʔile nī gèleʔ.
-Mìɛ cò cìiliwe.
23 Ma fǎri luʔɔ yákuɔ gbunʔ,
bɛ̀ ki yē gè,
ma diviɛn cɛ̀ri fàri baa,
liyɛyaara tire kɛnmɛ nɛ̄,
nɛ́ ki cɛ́n muɔ nɛ yáa túɔntuɔn.