Jànvaa tɛnmɛnɛ wori dè
4
1 Kulocɛliɛ Pìle ni 'ki fílige nɛ̀ juu nɛ́ jo làzɛnnɛ nī lè,
siɛnnɛ pálì bé tɛ́ngɛlɛ yaʔa lè bé taʔa jànvaa pígele ke siɛnrɛ nɛ̄ dè,
nɛ́ tɛnmɛnɛ náà ni 'kɔ́n gbòdolilo mɛ́ bèlea.
2 Jànvaafɔlilɔ bálì pe finɛnɛ bèle,
pe bé pe fáanni bè pùunni.
Siɛnnɛ bálì pe funyɔ yi nyɛ́nì kò laaduumɔ fùn majo pe 'tíngaanna le kàsun nī nɛ̀ yi sórigob.
3 Kire siɛnnɛ bálì bèle,
piyē nɛ tɛnmɛnɛ kanʔa lè níɛ̀ jo pe fǎri cɛlilɛ líi bèleʔ,
nɛ́ míɛni pe nɛ̂ jo yaliire táà yē baa pe fǎri ti líiʔ.
Nɛ̀ sí ki yaʔa Kulocɛliɛ wi 'yaliire dáà ti mìɛni yige kire ga buu tɛ́ngɛfɔlilɔ bálì pe 'kányiʔɛ cɛ́n gè peri ti líi béri barigɛ kanʔa wire mɛ́.
4 Nɛ́ ki cɛ́n Kulocɛliɛ yafaanra ti mìɛni yē cɛ̀nrɛ;
tàa fáala sì yɛli we- ti wáaʔ a weli 'fɔ̀li ti nɛ̄ níɛ barigɛ kanʔa Kulocɛliɛ mɛ́ wèc,
5 nɛ́ ki cɛ́n Kulocɛliɛ siɛnrɛ dè nɛ́ náarigɛ ní gè kire ki nɛ̂ ki yaʔa ti- nɛ̂ puu cìilide.
Ma puu baakuɔcɛ̀nwɛ Zezi Kirisi mɛ́ wè
6 Ma kele gálì juu gèle ma yaʔa siinyɛninɛ mɛ́ bèle.
Bà muɔ bé puu baakuɔcɛ̀nwɛ Zezi Kirisi mɛ́ wè,
ŋàa tɛ́ngɛlɛ siɛnrɛ ti 'gbó wè á muɔ 'taʔa tɛnmɛjɛ̀nnɛ nɛ̄ lè súuri nàa muɔ 'taa lè.
7 Kire nɛ̄ ma sí cíi nyùgofun múʔurudo nɛ̄ dè dàa tiì yɛli nɛ́ tɛ́ngɛlɛ ní lèʔ.
Gìi ki bé pɔ́ri gè,
ma mìɛ ŋàʔana ma mìɛ puɔ Kulocɛliɛ nɛ̄ wè.
8 Céri yaliiye yi káfugo yigele lè,
kire nyɛ́nì pɔ́ri bè lɛ̀lɛ láà cɛ̀ri kúɔ wī,
nɛ̀ ki yaʔa a siɛn nɛ ŋàʔaná bè wìi puɔ Kulocɛliɛ nɛ̄ wè,
kire yē pɔ́rigɔ nɛ̀ tóri kele ke mìɛni nɛ̄,
lɛ̀gɛlɛ ke mìɛni nī.
Nɛ́ ki cɛ́n Kulocɛliɛ nyɛ́nì nyuɔ fɛ̀ni nɛ́ jo wi bé sìi kɛn wè kire siɛn mɛ́ wè,
lɛ̀lɛ náà nī lè nɛ́ duniya ŋáà wi báan wèd.
9 Siɛnrɛ ti n'dɛ,
kányiʔɛ wori dè,
dàa nɛ̄ siɛnnɛ pe mìɛni 'yɛli bè tɛ́ngɛ dè:
10 bɛ̀ ki yē gè,
a weli nɛ baara gbɛ̀ngɛ gè níɛ cáanri wè,
kire nɛ ki tìí weli nyɛ́nì weli sɔ̀ngirɔ taʔa dè Kulocɛliɛ wewiiwe nɛ̄ wè,
wire ŋáà wī siɛnnɛ pe mìɛni Suɔfɔli wè,
bé nɛ́ cɛ ga jo tɛ́ngɛfɔlilɔ bèle.
11 Tire dī dàa muɔ 'yɛli bè juu bè gbɛ̀ngɛ dè,
nɛ́ dàa nɛ̄ muɔ 'yɛli bè pe tɛnmɛ dè.
12 Kiì yɛli siɛn muɔ faʔa bɛ̀ muɔ yē nàgapunwɔ wèʔ.
Ma puu fìɛ tɛ́ngɛfɔlilɔ mɛ́ bèle muɔ juugɛnmɛ nī bè,
nɛ́ muɔ tánʔagɛnmɛ nī bè,
nɛ́ dɛ́nigɛ nī gè,
nɛ́ tɛ́ngɛlɛ nī lè nɛ́ muɔ cìilimɛ ní bè.
13 Náʔanɛ mi- kɛ́ baa wè,
ma mìɛ kɛn mari Kulocɛliɛ siɛnrɛ wéli dè mari ti nyu siɛnnɛ mɛ́ bèle,
mari lèbaanna nyɔ́gi pe nī,
mari pe tɛnmɛ.
14 Ma fǎga Kulocɛliɛ kpuʔɔrɔ faʔa dèʔ dàa wi 'kɛn muɔ mɛ́ dè,
tire dáà muɔ 'taa dè lɛ̀lɛ líì nī Kulocɛliɛ siɛnjuulo pe 'ti juu nɛ̀ fílige dè,
á tɛ́ngɛfɔlilɔ gboli liɛlɛ pe 'pe kiyɛ taʔala yè muɔ nɛ̄ wè.
15 -Mìɛ kɛn ma láʔa ti mìɛni mɛ́,
ma mìɛ nyɔ́gɔ kpógori ti nī,
kire ga buu siɛnnɛ pe mìɛni pe- ki nyaa muɔ nɛ waa yiʔɛmɛ.
16 Mari mìɛ ciʔigi mari muɔ tɛnmɛnɛ wéli lè,
ma sí lèbaanna nyɔ́gɔ ni nī.
A muɔ nɛ kire kpínʔini gè,
muɔ bé muɔ suɔlɔ woli fílige lè nɛ́ bìli woli ní lè pe lúru muɔ mɛ́ wè.