Timote 1 3

Yiɛgininɛ tánʔagɛnmɛ bè tɛ́ngɛfɔlilɔ gboli nī lè

1 Siɛnrɛ ti n'dɛ, kányiʔɛ wori dè: a siɛn wáà nɛ caa bèri yiɛgininɛ baara kúu dè tɛ́ngɛfɔlilɔ gboli nī lè, wiī nɛ baacɛ̀nrɛ caa. 2 Kire nɛ̄, yiɛginiwɛ wi 'yɛli wi- puu dìgire fùn, cɛliwɛ nigbefɔli, nɛ́ bè wìi cògɛnmɛ cɛ́n. Ki 'yɛli wi- puu siɛn ŋáà wiī nɛ wìi ciʔige wè, nɛ́ siɛn ŋáà wi tánʔagɛnmɛ pi 'nyuɔ bè. Wi 'yɛli wi- puu nabɔndirigiwe, nɛ́ bè gbɛ̀ri siɛnnɛ tɛnmɛ bèle. 3 Wiì yɛli bè puu sungbuɔwɔʔ á kire bɛ̀ʔ kàsiitunwɔʔ. Wi 'yɛli bè buu funjɛ̀ngɛfɔli, nɛ́ funnyigefɔli; wi fǎga wìi kɛn wali dɛ́nigɛ mɛ́ gèʔ.

4 Wi 'yɛli bè puu ŋàa wiī nɛ wi saʔa kàrigí gè cɛ̀ngɛ gè, níɛ wi pìile nári bèle peri lúru nɛ́ kpuʔɔrɔ ní. 5 Nɛ́ ki cɛ́n a siɛn ŋíì wè nɛ jàʔá nɛ wi saʔa kàrigí gèʔ, mɛni wi bé gbɛ̀ jáa bèri nári lè nàa nī Kulocɛliɛ woli lè ?

6 Kiì yɛli wi- puu tɛ́ngɛfɔvɔnwɔʔ, á kire bɛ̀ʔ nàgbuʔɔrɔ fǎa ga jíin wi nīʔ, dí Kulocɛliɛ kàyuʔu ki fǎa ga tuu wi nɛ̄ bɛ̀ wuʔu tíɛlɛ gèʔ. 7 Ki 'yɛli míɛni sìndɛngɛlɛ peri wi míɛtanʔa yeri gè, pe fǎa ga wi pariʔ dí gbòdolilo kàfɔli wi fǎa ga wi cò wi jùɔ nī wèʔ.

Baakuɔlɔ tánʔagɛnmɛ bè tɛ́ngɛfɔlilɔ gboli nī lè

8 Kire kanumɔ nɛ̄ bè, bèle, pe 'yɛli bè puu bàli siɛnnɛ piyē nɛ kpóri bèle, piyè yɛli pe- puu nyigele siinsiinfɔlilɔʔ. Pe fǎga puu sungbuɔlɔʔ, pe fǎga puu bàli pe wali nùʔɔrɔ́ wè nɛ caa wèʔ.

9 Ki 'yɛli pe- puu bàli pe 'kò puɔlɔ kányiʔɛ nɛ̄ gè gàa ki 'tìɛ weli nɛ̄ gè, tɛ́ngɛlɛ wuʔu gè, nɛ́ funviire ní dè. 10 Ki 'yɛli míɛni pe- pe siʔɛ pe wéli gbínʔɛnɛ; kire kàduʔumɛ, a pe 'pe nyaa dìgire fùn dè, pe bé nɛ́ gbɛ̀ jáa bèri baakuɔlɔ baara kúu dè.

11 Kire kanumɔ nɛ̄ bè, cɛlilɛ pe 'yɛli bè puu bàli siɛnnɛ piyē nɛ kpóri bèle. Pe fǎga puu bàli pe siɛnnɛ sànʔá bèleʔ. Pe 'yɛli pe- pìye cògɛnmɛ cɛ́n nɛ́ pe puu pàli bàli nɛ̄ siɛnnɛ pe 'tɛ́ngɛ bèle kele ke mìɛni nī.

12 Tɛ́ngɛfɔlilɔ gboli ni baakuɔlɔ bèle, pe 'yɛli bè puu cɛlilɛ nigbenigbefɔlilɔ. Pe sí de pe pìile sɔ́migi bèle de gbún, pé sí pe saaya wuulo sɔ́migɔ bèle pe cò. 13 Nɛ́ ki cɛ́n baakuɔlɔ bálì pe pe baara sɔ́migi dè nɛ kúu dè, pe bé kpuʔɔrɔ taa; pe sɔ̀ngirɔ taʔadiʔɛ ki bé kpúʔɔ tɛ́ngɛlɛ nī lè Zezi nī wè.

Kányiʔɛ gáà ki 'tìɛ weli nɛ̄ gè

14 Timote, mi nɛ sɔ̀ngí a cɛ̀ri sìʔɛrɛ m'bé kɛ́ bè sa muɔ wéli. Kire nɛ́ ki mìɛni m'bé sɛbɛ ŋáà tórigo wè muɔ mɛ́ bè kele gálì juu gèle bè tìɛ muɔ nɛ̄. 15 A ki sí kɛ́nì nyaa mi nɛ mɔgi bè pɛn wè, muɔ bé ki cɛ́n kɛnmɛ bíì nɛ̄ muɔ 'yɛli bè tánʔa wè Kulocɛliɛ saʔa wuulo sunʔɔmɔ nī bè, bàli bīɛlɛ Kulocɛliɛ wewiiwe lè, nàa nī kányiʔɛ ki gèdinnɛ lè nɛ́ gàa ki kányiʔɛ cògí gè nɛ yérige gè. 16 ʔaan, káaliyɛ wè ti nīʔ, weli tɛ́ngɛlɛ ni kalarilɛ ni 'kpúʔɔ, nàa nī tɛ́ngɛlɛ ni nyùgo gè:

Wi nyɛ́nì wìi tìɛ siɛn céri nī,

a ni 'ki juu nɛ̀ láʔa nɛ́ jo wi 'sín,

a pe 'wi nyaa.

A siɛnnɛ pe 'wi wuʔu jáari gè

kùlogolo siɛnnɛ

mɛ́ bèle,

a siɛnniʔɛnɛ 'tɛ́ngɛ wi nɛ̄ duniya nī wè,

a Kulocɛliɛ wi 'wi yɛ̀gɛ

wi kpuɔmɔ nī bè.