Yeri náari siɛnnɛ pe mìɛni mɛ́
2
1 Kire nɛ̄,
siɛnpelide dáà m'bé juu dè,
mi nɛ tɛ́ngɛfɔlilɔ fiɛn bèle,
peri sìʔɛrɛ́ de kpɔni Kulocɛliɛ nɛ̄ wè peri wi fiɛn,
peri wi náari wi- pe sáʔa,
peri wi náari siɛnnɛ pe kele nɛ̄ gèle,
peri wi síɛri siɛnnɛ pe mìɛni wuʔu nɛ̄ gè,
2 peri wi náari kùlofɔlilɔ wuʔu nɛ̄ gè nɛ́ siɛnkpolilo pe mìɛni ní bèle.
Kire bé ki yaʔa weli- puu yanyige nɛ̄ nɛ́ ŋɔ́daala nɛ̄,
bè kò puɔlɔ Kulocɛliɛ nɛ̄ wè,
dí siɛnnɛ peri tɔ́ri nɛ́ weli tánʔagɛnmɛ ní bè.
3 Ki n'gɛ gàa ki 'nyuɔ weli Suɔfɔli Kulocɛliɛ yiʔɛ mɛ́ gè,
nɛ́ gàa ki 'wi dɛ́ni gè,
4 wire ŋáà wi ki caa siɛnnɛ pe mìɛni suɔlɔ taa lè bé kányiʔɛ cɛ́n gèa.
5 Gìi sí gī baa gè,
Kulocɛliɛ nigbe wī bile,
nɛ́ kàsuluwo nigbe yē Kulocɛliɛ nɛ́ siɛnnɛ sunʔɔmɔ nī bè.
Wire wī Zezi Kirisi wè,
wire ŋáà wī siɛn wèb.
6 Wire tíimɛ wi 'wi sìi kɛn wè bè siɛnnɛ pe mìɛni suɔ pe sùkulomɔ mɛ́ bèc.
Kire ki 'Kulocɛliɛ nyɛ́ni kaala tìɛ lè,
nɛ̀ yɛli nɛ́ lɛ̀lɛ náà ní wire tíimɛ yé tɛ́ngɛ lè.
7 Kire kɛnmɛ nɛ̄ Kulocɛliɛ 'mi tɛ́ngɛ mi- puu wi siɛnjaariwɛ nɛ́ Zezi Kirisi tundunwɔ,
mi de kùlogolo kálì siɛnnɛ tɛnmɛ bèle tɛ́ngɛlɛ wuʔu nɛ̄ gè nɛ́ kányiʔɛ ní gèd.
Mi wè nɛ finɛnɛ wīʔ;
kányiʔɛ mi nɛ nyu.
Tɛ́ngɛfɔlilɔ tánʔagɛnmɛ bè pe gbuʔulo nī gèle
8 Kire kɛnmɛ nɛ̄ mi nɛ ki caa nàguɔlɔ peri náari béri kiyɛ cìiliye yɛ̀gí yè naamɛ tiɛyɛ yi mìɛni nī yè,
funyɛrigɛ fùn,
kàsii siɛnrɛ fùn.
9 Bɛ̀ míɛni ki yē cɛlilɛ kɔli mɛ́ gè.
Pe buruyo legɛnmɛ pi- puu bè nyuɔ bè yɛli,
pi- puu nɛ́ kpuʔɔrɔ ní;
pe fǎga ki líɛ tórigoʔ.
Pe nyùyɔ tìingɛnmɛ pi fǎga ki kpíʔile siɛnnɛ peri pe wéliʔ,
nɛ́ kɛnmɛ bíì nɛ̄ pe 'pìye fèri nɛ́ tiɛ ní wè nɛ́ lagbɛnrɛ sɛmidingele ní gèleʔ,
nɛ́ pe lagbɛnrɛ burudo kɛnmɛ ní bèʔe.
10 Gìi sí gī baa gè,
pe 'yɛli bèri kacɛ̀ngɛlɛ kpínʔini,
gàli ke 'yɛli cɛlilɛ nɛ̄ bèle bàli pe 'ki juu nɛ̀ láʔa nɛ́ jo peli 'pìye kɛn nɛ̀ laʔa Kulocɛliɛ mɛ́ wè.
11 Cɛlilɛ pe 'yɛli bè pìiri béri tɛnmɛnɛ lúru lè bè puu funnyigefɔlilɔ,
bè pìye cɛ́rigɛ kányiʔɛ nɛ̄f.
12 Mi sì yéri ki nɛ̄ cɛliwɛ wiri nàguɔ tɛnmɛ wèʔ bé fànʔa cáan wi nɛ̄ʔ;
wi 'yɛli bè kò pìiriwe.
13 Nɛ́ ki cɛ́n Adama wire wī Kulocɛliɛ yé kíni nɛ̀ faan péliwe wè;
kire kàduʔumɛ,
a wi 'Awa faang wè.
14 Nɛ̀ sí ki yaʔa Adama wire bɛ̀ʔ Setɛni wi yé fáanniʔ;
cɛliwɛ wire wī wi yé fáanni,
a kolimɔ pi 'jíinh,
15 nɛ̀ ki yaʔa Kulocɛliɛ bé wi suɔ cesiʔi kɛnmɛ nɛ̄ bè.
A cɛlilɛ pe 'kò tɛ́ngɛlɛ nī lè,
nɛ́ dɛ́nigɛ nī gè,
nɛ́ ní wàlidɛngɛlɛ Kulocɛliɛ mɛ́ wè,
nɛ́ a pe 'pìye cò macɛ́n wè,
pe bé suɔlɔ taai.