Timote 1 1

Sɛbɛ péliwe ŋáà Pɔli 'tórigo Timote mɛ́ wè

Timote péliwe

Síɛrilɛ lè

1 Mi wè, mi yē Zezi Kirisi tundunwɔ nɛ̀ yɛli nɛ́ Suɔfɔli Kulocɛliɛ nɛ́ Zezi pe tunduro ní dè, Zezi ŋáà wī weli sɔ̀ngirɔ taʔadiʔɛ gè. 2 Mi nɛ sɛbɛ ŋáà tórigi wè Timote mɛ́ wè, wire ŋáà wī mi kányiʔɛ pùɔ wè tɛ́ngɛlɛ nī lè. Tuufɔli Kulocɛliɛ nɛ́ weli Kàfɔli Zezi Kirisi wè pe- nɛ́ nyinimɛ nɛ́ yanyige- kɛn gè muɔ mɛ́.

Jànvaa tɛnmɛfɔlilɔ wuʔu gè

3 Lɛ̀lɛ líì nī mi 'puu nɛ yigi bè kɛ́ Maseduwani kùlo mɛ́ lè, a mi 'muɔ fiɛn nɛ́ jo ma kò Efɛzi kàʔa nī gè. Nɛ́ ki cɛ́n siɛnnɛ pálì yē baa bàli bīɛlɛ pe jànvaa tɛnmɛnɛ kanʔa lè. -Ki juu ma gbɛ̀ngɛ pe mɛ́ pe- ni yérige. 4 -Ki juu pe mɛ́ pe fǎga pìye puɔ múʔurudo nɛ́ tuufɔduluyo siɛnrɛ nɛ̄ dèʔ dàa ti wè kúu nɛ nyaʔa dèʔ, tire dáà ti báan nɛ́ nyùgofun kàkiɛrɛ ní dè. Tire dáà tiǐ gbɛ̀ Kulocɛliɛ baara tórigo dè yiʔɛ mɛ́ gèʔ, tɛ́ngɛlɛ nī lèʔ.

5 Nɛ̀ sí ki taa, ki kajuugbɛnnɛ ni nyùgo gè kire yē bè wìyedɛnigɛ nyɔ́gɔ tɛ́ngɛfɔlilɔ sunʔɔmɔ nī bè, nɛ́ dɛ́nigɛ gáà ki 'kɔ́n nàzɔn cìiliwe nī wè, nɛ́ funviire nī, nɛ́ kányiʔɛ tɛ́ngɛlɛ nī lè. 6 Pàli nyɛ́nì pùunni nɛ̀ koligo wáa gè nɛ́ taʔa nyùgofun kàkiɛrɛ nɛ̄ dè. 7 Peli yē nɛ ki caa bè puu Misa , nɛ̀ ki yaʔa piyè ti kɔri cɛ́nʔ dàa pe nyu dèʔ, piyè cɛ́nì kele ke kɔri cɛ́nʔ gàli pe nyu nɛ láʔala gèleʔ.

8 Weli 'ki cɛ́n ti nyɛ́nì nyuɔ a siɛn nɛ ti kpínʔini dè yiɛcɛ̀ngɛ nɛ̄ gè. 9 Weli 'ki cɛ́n míɛni Fànʔa Siɛnrɛ tiì kpíʔile siɛnsinminɛ kɛnmɛ nɛ̄ wīʔ. Ki 'nyaa ti 'kpíʔile bàli kɛnmɛ nɛ̄ pe wè tɔ́ri nɛ́ Fànʔa Siɛnrɛ ní dèʔ, nɛ́ siɛnciile bèle, nɛ́ bàli pe wè puɔlɔ Kulocɛliɛ nɛ̄ wèʔ. Ti 'kpíʔile nɛ̀ pínɛ kapiigbiʔilile kɛnmɛ nɛ̄, nɛ́ bàli pe wè tɔ́ri nɛ́ gàa ní ki yē wàlidɛngɛgɛ Kulocɛliɛ mɛ́ wèʔ nɛ́ Kulocɛliɛ kaala lire tíimɛ ní lèʔ. Ti 'kpíʔile nɛ̀ pínɛ bàli kɛnmɛ nɛ̄ pe 'pe tobilo nɛ́ pe yàala kpúu bèle, peli nɛ́ siɛnkpuulo ní bèle. 10 Fànʔa Siɛnrɛ ti 'tɛ́ngɛ siɛnnɛ bálì kɛnmɛ nɛ̄ pe pìye kanʔa nɛ kanuʔɔrɔ kele kpínʔini gèle, nɛ́ nàguɔlɔ bálì ní piyē nɛ sìnɛ́ nɛ́ pe nàganyɛninɛ pálì ní wè majo cɛliwɛ wī. Ti tɛ́ngɛ míɛni bàli kɛnmɛ nɛ̄ pe siɛnnɛ pári bèle sùkulomɔ nɛ̄ bè, nɛ́ káfinɛvinɛnɛ ní bèle, nɛ́ bàli pe cî níɛ̀ jo pe bé kányiʔɛ juu níɛ̀ finɛ wè. Fànʔa Siɛnrɛ ti 'tɛ́ngɛ nɛ̀ pínɛ bìli pe mìɛni kɛnmɛ nɛ̄ pe 'cíi tɛnmɛnɛ nɛ̄ lè nàa nī cɛ̀nnɛ lè. 11 Kire tɛnmɛnɛ náà ni 'kɔ́n mɛ́ dè dàa kpuɔmɔ Kulocɛliɛ wi 'kɛn m'mɛ́ dè, wire ŋáà wī fundaanra kɛnfɔli wè.

Barigɛ kɛnnɛ Zezi Kirisi mɛ́ wè wi kacɛ̀ngɛ kɛnmɛ nɛ̄ bè

12 Mi nɛ weli Kàfɔli Zezi síɛri wè, nɛ́ ki cɛ́n wi nyɛ́nì tɛ́ngɛ mi nɛ̄ a wi 'mi tɛ́ngɛ wi baara nɛ̄ dè, nɛ́ ŋɔri kɛn m'mɛ́ mi de wi baara kúu dè. 13 Faʔa gè mi 'puu nɛ wi míʔɛ córi gè, nɛ tɛ́ngɛfɔlilɔ wuʔɔ bèle pe tɛ́ngɛlɛ kɛnmɛ nɛ̄ bè; mi 'puu fungbɛngɛfɔli. Nɛ̀ ki yaʔa a Kulocɛliɛ wi 'nyinimɛ taa mi nɛ̄ bɛ̀ mi 'ki kpíʔile mi katiire lɛ̀lɛ nī lè nɛ́ mi sìndɛngɛlɛ kɛnmɛ nɛ̄ bè. 14 A weli Kàfɔli wi 'wi nìʔɛrɛ kɛn dè mi mɛ́, nɛ́ tɛ́ngɛlɛ ní lè, nɛ́ dɛ́nigɛ ní gè gàa Zezi wi 'kɛn gè.

15 Siɛnrɛ ti n'dɛ, kányiʔɛ wori dè, dàa nɛ̄ siɛnnɛ pe mìɛni 'yɛli bè tɛ́ngɛ dè: «Zezi Kirisi wi 'pɛn duniya nī wè bè ba kapiigbiʔilile suɔ bèle.» Mi sí wi 'pii kapiigbiʔilile pe mìɛni nɛ̄ bèle. 16 Kire kɛnmɛ sí nɛ̄ Kulocɛliɛ wi 'nyinimɛ taa mi nɛ̄: kire cé puu Zezi Kirisi wi gbɛ̀ wi funnyige nìʔɛgɛ tìɛ gè bè ki kpíʔile kɛnmɛ báà nɛ̄ bè mi kɔli mɛ́ gè, mi ŋáà wi 'pii kapiigbiʔilile pe mìɛni nɛ̄ bèle, kire ga buu ki- puu fìɛ bìli mɛ́ pe bága tɛ́ngɛ wi nɛ̄ wè bé sí bànguɔ sìi taa wè.

17 Bànguɔ Kùlofɔli wè, ŋàa wī sìnguu nī wè, nɛ́ ŋàa siɛn sǐ gbɛ̀ nyaa wèʔ, Kulocɛliɛ nigbe wè, nɛ́ kpuɔmɔ pi- puu wi nɛ̄ súuri !  !

Weri cáanjɛ̀nrɛ cáanri dè

18 Mi jaa Timote yo, mi bé tunduro dáà kɛn dè muɔ mɛ́, dàa ti 'yɛli nɛ́ siɛnjuulo pe siɛnrɛ ní dè dàa pe 'kíni nɛ̀ juu muɔ wuʔu nɛ̄ gè. Ma ŋɔri taa kire siɛnrɛ nī dè, mari cáanjɛ̀nrɛ cáanri dè. 19 Bè jáa bè kire kpíʔile gè, muɔ 'yɛli bè sɔ́migɔ yéri tɛ́ngɛlɛ nī lè bè puu funviige ní. Pàli yē baa nɛ̀ cíi bè lúʔu pe funyɔ mɛ́ yè, fúɔ a ki 'nyaa majo pe tɛ́ngɛlɛ ni 'yíbiri nɛ̀ kùu wī. 20 Imɛnɛ nɛ́ Alɛgizandiri wè, peli yē ki siɛnnɛ bálì pe pàli. A mi sí pe kɛn Setɛni mɛ́ wè kire ga buu pe- tɛnmɛnɛ taa pe fǎga ní de Kulocɛliɛ míʔɛ córi gèʔ.