Sùkulolo pe 'yɛli bèri lúru pe kàfɔlilɔ mɛ́ bèle
6
1 Bàli bīɛlɛ sùkulolo bèle,
pe míɛni 'yɛli peri tɔ́ri nɛ́ pe kàfɔlilɔ ní bèle bèri pe kpóri kpuʔɔ,
kire ga buu siɛn fǎga Kulocɛliɛ míʔɛ faʔa gèʔ nɛ́ weli tɛnmɛnɛ ní lè nɛ̀ pínɛʔ.
2 A sùkulolo pálì yē baa,
pe kàfɔlilɔ piyē tɛ́ngɛfɔlilɔ bèle,
pe fǎga pe kàfɔlilɔ faʔa bèleʔ bɛ̀ ki 'nyaa pe 'kò siinyɛninɛ bèle tɛ́ngɛlɛ nī lèa.
Nɛ̀ ki yaʔa pe sí de baara pe mɛ́ cɛ̀ngɛ bɛ̀ pe kàfɔlilɔ piyē tɛ́ngɛfɔlilɔ,
nɛ́ míɛni pe kàfɔlilɔ woli ni 'kpúʔɔ pe mɛ́ wè,
peli bálì piyē nɛ tɔ̀ni taʔa pe baacɛ̀nrɛ kɛnmɛ nɛ̄ bè.
Bè puu puɔwɔ Kulocɛliɛ nɛ̄ wè kire gī nɛ́ tɔ̀ni ní wè
Ti n'dɛ dàa nɛ̄ muɔ 'yɛli bèri pe tɛnmɛ bèle bè ti juu gbɛ̀ngɛ pe mɛ́ dè.
3 A siɛn wáà sí nɛ tɛnmɛnɛ láà niiyɛ kanʔa lè nàa niì yɛli nɛ́ weli Kàfɔli Zezi Kirisi wi kányiʔɛ siɛnrɛ ní dèʔ,
nɛ́ tɛnmɛnɛ láà ní nàa niì yɛli nɛ́ kɛnmɛ bíì ní weli 'yɛli bè puu puɔlɔ Kulocɛliɛ nɛ̄ wèʔ,
4 kire siɛn wiī nɛ wìi nyíɛnɛ nɛ tóri wī,
wiì yafiɛn cɛ́nʔ.
Nyùgofun kàkiɛrɛ ti 'wi dɛ́ni nɛ̀ tóri nɛ̀ kò yaama wi mɛ́,
nɛ́ kàsii caʔara ní dè nyasiɛnkanʔana wori nɛ̄ dè.
Kire tiɛyɛ nyáà yire sí nī yejaʔa ki yɛ̀gí,
nɛ́ kàsii ní wè,
nɛ́ míɛcuʔɔrɔ ní dè,
nɛ́ bèri sɔ̀ngibiire sɔ̀ngí siɛnnɛ kɔli mɛ́ gè.
5 Pe nìɛ túngu nɛ́ pìye ní súuri,
bàli bīɛlɛ pe sícilige ki nyɛ́nì koli gè,
kányiʔɛ wè pe mɛ́ʔ.
Piyē nɛ ki nyaʔa bè mìɛ puɔ Kulocɛliɛ nɛ̄ wè,
kire yē kɛnmɛ páà bè duniya tɔ̀ni taa wīb.
6 Gìi sí gī baa gè,
bè puu puɔwɔ Kulocɛliɛ nɛ̄ wè,
kire yē tɔ̀niniʔɛgɛ,
a ki yē gàa wi 'taa gè,
ki 'yɛli nɛ́ wi ní wèc.
7 Nɛ́ ki cɛ́n weli sì pɛn nɛ́ yafiɛn ní duniya nī wèʔ,
bɛ̀ míɛni ki yē weli sǐ ga tíi kɛ́ nɛ́ yakaa níʔ a weli kɛ́nì yiri duniya nī wèʔd.
8 A ki sí nyaa burudo tire yē weli mɛ́ dè nɛ́ yaliire ní dè,
kire bé yɛli nɛ́ weli níe.
9 Bàli sí bīɛlɛ piyē nɛ lɔriniʔɛrɛ caa dè,
peli bé tuu puuwelige nī gè bè cò pɛnnɛ nɛ̄ lè nɛ́ nyùgofun kanɛdanʔana nìʔɛgɛlɛ nī gèle gàli ke 'pii gèle níɛ báan nɛ́ cúʔɔmɔ nɛ́ pùunnimɔ ní bèf.
10 Nɛ́ ki cɛ́n wali tàanma bè,
pire bī sìpiimɛ pi mìɛni nìre dè.
Pàli funyɔ yē kpoliyo bè wali taa wè,
a pe 'líili tɛ́ngɛlɛ koligo nɛ̄ gè,
a pe 'wuʔɔniʔɛyɛ cáan pìye nɛ̄.
Te tɛ́ngɛlɛ ni cáanjɛ̀nrɛ cáanri dè
11 Nɛ̀ ki yaʔa,
muɔ Timote wè,
muɔ ŋáà wī Kulocɛliɛ siɛn wè,
mari fé kele gálì nɛ̄ gèle.
Mari ki caa bèri kasingele kpínʔini ma puu puɔwɔ Kulocɛliɛ nɛ̄ wè,
nɛ́ tɛ́ngɛlɛ ní,
nɛ́ dɛ́nigɛ ní,
nɛ́ lèbaanna ní,
nɛ́ funnyige níg.
12 Te tɛ́ngɛlɛ ni cáanjɛ̀nrɛ cáanri dè,
ma bànguɔ sìi cò wè,
ŋàa wuʔu nɛ̄ Kulocɛliɛ 'muɔ yeri wè,
tɛ́ngɛlɛ náà wuʔu muɔ yé juu nɛ̀ láʔa siɛnniʔɛnɛ nyaamɛ nɛ̄ bè.
13 Píra ŋáà nī wè,
mi sí nɛ ki nyu nɛ gbɛ̀ngí muɔ mɛ́ Kulocɛliɛ yiʔɛ mɛ́ gè,
wire ŋáà wi sìi kanʔa wè yɛrɛ ti mìɛni mɛ́ dè,
nɛ́ Zezi Kirisi yiʔɛ mɛ́ gè,
wire ŋáà wi 'kányiʔɛ juu gè nɛ̀ ceri Pɔnsi Pilati yiʔɛ mɛ́ gèh,
14 ma kire kajuugbɛnnɛ cò lè mari tári cìilimɛ nī bè,
ma puu dìgire fùn,
fúɔ bè taa weli Kàfɔli Zezi Kirisi wi kɛ́nì wìi tìɛ wè.
15 Nɛ́ ki cɛ́n wi bága pɛn bè wìi tìɛ nɛ̀ yɛli nɛ́ lɛ̀lɛ náà ní Kulocɛliɛ 'nyíɛnɛ nɛ̀ kɔ̀n lè,
Kulocɛliɛ ŋáà wī fundaanra kɛnfɔli wè,
wire ŋáà nigbe wī Fànʔafɔgbuɔwɔ wè,
nɛ́ kùlofɔlilɔ pe Kùlofɔli wè,
nɛ́ ní kàfɔlilɔ pe Kàfɔli wèi.
16 Wire nigbe wī sìnguu nī;
wiī kòriwo kpìɛnmɛ nī bè bàa nɛ̄ siɛn sǐ gbɛ̀ sìʔɛrɛ kpɔni wèʔ.
Siɛn wáà fáala fìɛ wi 'nyaa nɛ̀ nyaaʔ nɛ́ míɛni wàa sǐ gbɛ̀ wi nyaaʔ.
Wire nigbe nɛ̄ kpuʔɔrɔ ti 'yɛli nɛ́ fànʔa ki mìɛni ní lɛ̀lɛ ó lɛ̀lɛ nī !
Ki- taa ki puu bɛ̀ !
Walifɔlilɔ yɛrilɛ lè
17 Ma ki juu ma gbɛ̀ngɛ duniya ŋáà walifɔlilɔ mɛ́ bèle ma pe yɛ pe fǎga buu nàgbuʔɔrɔfɔlilɔʔ,
pe fǎga sí pe sɔ̀ngirɔ taʔa dè pe wali nɛ̄ wèʔ,
ŋàa wiǐ je mɔgɔ wèʔj.
Ki 'yɛli pe- pe sɔ̀ngirɔ taʔa dè Kulocɛliɛ nɛ̄,
wire ŋáà wi yaniʔɛrɛ ti mìɛni kanʔa weli mɛ́ dè kire ga buu weli- ti fundaanra taa dè.
18 Peri kacɛ̀ngɛ kpínʔini,
pe- puu lɔrifɔlilɔ kakpiʔilijɛ̀ngɛlɛ kɔli mɛ́ gè,
peri tàán,
peri siɛnnɛ kanʔa bèlek.
19 A kire 'kpíʔile gè,
pe bé lɔriniʔɛrɛ gbuʔulo pìye yiʔɛ mɛ́l nyìʔɛnɛ nī lè,
gìi ki bé tí pe- kányiʔɛ sìi taa wè,
mbànʔa ŋáà wi báan wè.
Siɛnsɛnrɛ dè
20 ʔé Timote,
-ki sɔ́migɔ ma cò gàa Kulocɛliɛ 'kɛn muɔ mɛ́ gè.
Te mìɛ ciʔige nyùgofun siɛnniʔɛrɛ nɛ̄ dè dàa tiì yɛli nɛ́ tɛ́ngɛlɛ ní lèʔ,
nɛ́ kàkiɛrɛ ní dè dàa siɛnnɛ pe nyu níɛ finɛnɛ nɛ́ jo tiī kacɛ́nnɛ lè.
21 Bɛ̀ sí ki yē gè,
pàli 'puu nɛ ki sɔ̀ngí nɛ́ jo peli yé kire kacɛ́nnɛ taa lè wī,
a pe sí kɛ́nì wàli nɛ̀ láʔa tɛ́ngɛlɛ nɛ̄ lè.
Kulocɛliɛ kpuʔɔrɔ ti- puu yeli nɛ̄ !