Gìi ki bága tóri sɛ́ni Kàfɔli wi pɛnjɛngɛ ki- nɔ̀ wè
2
1 Nɛ siinyɛninɛ,
weli nɛ yeli fiɛn wī,
ye fǎga tí yeli funyɔ yi de curugu yeli nī fáari fáariʔ Kàfɔli Zezi Kirisi wi pɛnjɛngɛ wori nɛ̄ dèʔ,
nɛ́ bɛ̀ weli bága sa pínɛ buu nɛ́ wi ní wèʔ.
2 Nɛ̀ pínɛ ye fǎga de fìʔɛ́ʔ majo dùʔɔ Kàfɔli wi pɛnjɛngɛ ki 'nɔ̀ nɛ̀ kúɔ wīʔ,
a ki nɛ́ cɛ́nì nyaa wàa wi 'jo wire 'ti nyaa nɛ́ ti juu yo,
á kire 'laa tɛnmɛnɛ láà yo,
a kire 'laa siɛnrɛ táà pe 'sɛbɛ ti ní bɛ̀ weli wori tíɛlɛ dè,
nɛ́ jo Zezi pɛnjɛngɛ ki 'nɔ̀ wè.
3 Ye fǎga tí siɛn- yeli fáanni bè yeli pùunni kɛnmɛ páà fáala nɛ̄ʔ.
Ki 'nyaa náʔanɛ kire cɛngɛ ki- nɔ̀ gè,
siɛnnɛ pe bé kíni bè cíi Kulocɛliɛ nɛ̄ wè.
Píra ŋáà nī wè,
ŋàa pe ye Sìpiiwe wè,
dí wire sí yiri,
wire wī wi woli ni 'cúʔɔ nɛ̀ kúɔ wè.
4 Wire wī leguuwo wè.
Wi béri wìi nyíɛnɛ bé jo wire 'tóri yɛrɛ ti mìɛni nɛ̄ dè.
Nɛ̀ pínɛ wi béri kìí nɛ́ yɛgɛ ó yɛgɛ gáà pe ye kulocɛliɛ wè,
nɛ́ dàa pe gbùʔɔrɔ́ dè.
Wi bága cɛ kɛ́ bè sa tɛ́ni Kulocɛliɛ Gbùʔɔrɔsaʔa nī gè bèri wìi kpínʔini wire wī Kulocɛliɛ wèa.
5 Yeli wè sɔ̀ngí nɛ tari léʔ,
bɛ̀ mi 'puu nɛ tíin baa nɛ́ yeli ní wè,
mi 'puu nɛ ki siɛnrɛ dáà nyu dè yeli mɛ́ lé ?
6 Nɛ̀ pínɛ,
yeli nyɛ́nì ki cɛ́n píra ŋáà nī wè,
ŋàa wi 'leguuwo cò wè nɛ̀ yérige wè,
dí wi sí ga yiri wi yiri lɛ̀lɛ lire tíimɛ nī wè.
7 Ye- nyaa,
kapiile niī nɛ kpínʔini nɛ kúu làrimɛ nī wī.
Ŋàa sí wi 'leguuwo cò wè nɛ̀ yérige wè,
wi bé wi cò bè yérige fúɔ bè taa wi ga pa wi yaʔa wìimɛ.
8 Píra ŋáà nī wè,
siɛn ŋáà pe ye Sìpiiwe wè,
dí wire sí nɛ́ péli bè yiri.
Nɛ̀ sí ki taa Kàfɔli Zezi wi bé wi kpúu bè yige baa nɛ́ wi nyuɔ káfaligɛ ní gè,
bè wi cɛrigɛ bè yige baa péwu nɛ́ wi pɛnnɛ ni kpìɛnmɛ ní bè.
9 Kire Sìpiiwe ŋáà wè,
wi pɛnnɛ ni bága puu nɛ́ Setɛni fànʔa ní,
wi béri kakpoliyo feliye yi mìɛni kpínʔini,
de fìɛlɛ kakpoliyo kpínʔini,
nɛ́ jànvaa kanyuʔɔnigɔlɔ ní.
10 Nɛ̀ pínɛ,
bìli pe waa pe pùunni koligo nī gè,
wi béri jànvaa feliye tíʔi de pe fáanni;
nɛ̀ taʔa gíi nɛ̄,
peli bálì bèle,
piyè fɔ̀li a kányiʔɛ ki 'pe dɛ́niʔ,
dí pe sí suɔ wèʔ.
11 Kire nɛ̄ a Kulocɛliɛ wi sí fáannigɛ tórigo pe mɛ́ kpuʔɔ,
gìi ki bé tí pe- tɛ́ngɛ káfinɛrɛ nɛ̄ dè.
12 Kire tiʔɛ gáà nī gè,
bìli piyè fɔ̀li nɛ̀ tɛ́ngɛ kányiʔɛ nɛ̄ gèʔ,
á kapiʔi kpíʔilige ki 'pe dɛ́ni wè,
kàyuʔu bé juu kire siɛnnɛ nɛ̄ bèle.
Kulocɛliɛ 'yeli nyíɛnɛ nɛ̀ kɔ̀n ye- suɔlɔ taa
13 Siinyɛninɛ,
yeli bálì bīɛlɛ ye 'Kàfɔli dɛ́ni wè,
weli 'tɔ̀ni nɛ̀ yɛli bèri Kulocɛliɛ síɛri wè lɛ̀gɛlɛ ke mìɛni nī yeli kɛnmɛ nɛ̄ bè.
Nɛ̀ taʔa gíi nɛ̄,
Kulocɛliɛ wi 'yeli nyíɛnɛ nɛ̀ kɔ̀n siɛnpelile bèle,
nɛ̀ yeli suɔ wi Pìle lire fànʔa nɛ̄ gè,
lire ni 'yeli wàli nɛ̀ tɛ́ngɛ ye- puu wi wuulo bèle,
nɛ́ bɛ̀ yeli 'tɛ́ngɛ kányiʔɛ nɛ̄ gè.
14 Bɛ̀ sí ki tɔ̀ni yē,
Kulocɛliɛ wi 'yeli yeri ye- puu bɛ̀ kire kɛnmɛ nɛ̄ bè.
Wi 'ki kpíʔile nɛ́ Kataanna Siɛnrɛ dáà weli 'jáari dè,
tire fànʔa nɛ̄,
gìi ki bé tí ye- yeli liɛlɛ taa lè weli Kàfɔli Zezi Kirisi wi kpuɔmɔ nī bè.
15 Kire kɛnmɛ nɛ̄,
siinyɛninɛ,
ye- gbɛ̀nmɛ le ye kò tɛ́ngɛlɛ nī lè.
Kele gílì nɛ̄ weli 'yeli tɛnmɛ weli nyasiɛnrɛ nī dè,
nɛ́ dìi weli 'juu sɛbɛlɛ nī bèle,
ye- ti cò cɛ̀ngɛ.
16 Weli Kàfɔli Zezi Kirisi wire tíimɛ wè,
nɛ́ weli Tuu Kulocɛliɛ ní wè,
wire ŋáà wī weli woli ni 'wi dɛ́ni wè,
nɛ̀ pínɛ wi 'nàzorido nyɔ́gɔ weli nī bànguɔ wori dè,
nɛ́ sɔ̀ngirɔ taʔadiʔɛ cɛ̀ngɛ kɛn weli mɛ́ wi kpuʔɔrɔ tire kɛnmɛ nɛ̄ bè,
17 wi- yeli funyɔ nyígi yè,
wí sí ŋɔri nyɔ́gɔ yeli nī yeri kacɛ̀ngɛlɛ kpínʔini yeli nyasiɛnrɛ nī dè nɛ́ yeli kakpiʔiligele ke mìɛni nī gèle.