Pɔli wi 'jo tɛ́ngɛfɔlilɔ peri náari peli mɛ́
3
1 Siinyɛninɛ,
gìi ki 'kò gè,
yeri náari weli mɛ́ gìi ki bé tí Kàfɔli wi siɛnrɛ ti de waa yiʔɛmɛ dí kpuʔɔrɔ sí de tari ti nɛ̄,
majo mɛni ki 'puu baa yeli tiʔɛ nī gè,
2 gìi ki bé tí weli suɔ siɛnkolilo nɛ́ siɛnpiile mɛ́ bèle.
Nɛ̀ taʔa gíi nɛ̄,
pe mìɛni bɛ̀ʔ pe 'tɛ́ngɛʔ.
3 Gìi ki 'cɛ́n gè,
Kàfɔli wire yē tɛ́ngɛmɛ siɛn.
Wire wi bé ŋɔri nyɔ́gɔ yeli nī,
bé sí de yeli suu Sìpiiwe mɛ́ wè.
4 Weli 'tɛ́ngɛ ki nɛ̄ Kàfɔli wire kɛnmɛ nɛ̄ bè,
dí gìi weli nɛ caa yeli mɛ́ bèle,
kire yeli nɛ kpínʔini,
nɛ̀ pínɛ kire yeli bé kò de kpínʔini.
5 Kàfɔli wi- yeli funyɔ yiʔɛ yè Kulocɛliɛ dɛ́nigɛ kɔli mɛ́,
ye- puu nɛ́ kpàricogo ní míɛni bɛ̀ Kirisi tíɛlɛ wè.
Tɛ́ngɛfɔlilɔ pe 'yɛli peri baara
6 Siinyɛninɛ,
weli nɛ yeli fiɛn wī,
weli Kàfɔli Zezi Kirisi wire míʔɛ nɛ̄ gè:
ye yìye cò siinyɛni ó siinyɛni ŋáà wi nyaari nɛ mári kakuɔlɔ fùn wè,
nɛ́ kò wi wè nɛ tári mɛni pe 'dàli nɛ̀ weli nyaa weli nɛ ki kpínʔini gèʔ.
7 Yeli tíimɛ 'ki cɛ́n mɛni yeli 'yɛli bèri weli nyadanʔagɛlɛ líi gèle,
nɛ́ ki cɛ́n weli sì puu nɛ nyaari nɛ mári yeli sunʔɔmɔ nī bè kakuɔlɔ fùnʔ.
8 Nɛ̀ pínɛ weli sì kɛ́nì wàa suro lìi waʔanɛʔ.
Gìi ki 'cɛ́n gè,
weli 'puu nɛ baara nɛ kárifugo ŋu pìlige nɛ́ cɛnvugo,
gìi ki bé tí weli fǎga puu tugoro yeli wáà nɛ̄ʔ.
9 Weli cî gbɛ̀ weli tugoro yaʔa dè yeli nɛ̄,
nɛ̀ sí ki taa weli sì kire kpíʔileʔ.
Ki 'nyaa weli 'puu nɛ caa bè ki kpíʔile bè tìɛ yeli nɛ̄ wī,
yeri ki kpínʔini bɛ̀ weli tíɛlɛ.
10 Kire nɛ̄,
lɛ̀lɛ níì nī weli 'puu baa yeli tiʔɛ nī gè,
weli 'puu nɛ ki nyu nɛ gbɛ̀ngí yeli mɛ́,
dí a siɛn ŋíì wè caa bèri baara wèʔ,
wi míɛni wi fǎri líiʔ.
11 Weli sí yē nɛ lúru dí pàli yē baa yeli nī,
pe wè tári sìɛnnɛʔ,
pe wè baara kúuʔ,
macɛn bèri pe nyuɔyɔ nii yè de mári pàli kele nī.
12 Kire siɛnnɛ bálì pe felile bèle,
weli bé ti juu bè gbɛ̀ngɛ pe mɛ́,
bé ní pe fiɛn Kàfɔli Zezi Kirisi wire kɛnmɛ nɛ̄ bè,
pe- yiɛyɛ cùungu,
pé sí de baara peri pe tíimɛ kárifugo suro líi.
13 Gìi sí ki 'yeli kúɔ bèle,
siinyɛninɛ,
ye fǎga jo yeli 'fùrɔ kacɛ̀ngɛ kpíʔilige nɛ̄ gèʔ.
14 A siɛn ŋíì sí cíi wi wè tári weli siɛnrɛ nɛ̄ dèʔ,
dàa weli 'sɛbɛ nɛ̀ tórigo dè,
ye- kire siɛn wéli wè ye cɛ́n,
ye fǎri nyaʔami wi nīʔ,
gìi ki bé tí fìɛrɛ- tɔ́n wi nɛ̄.
15 Ye fǎga sí de wi tɔ́ri bɛ̀ yeli leguuwo tíɛlɛʔ.
Gìi ki 'pɔ́ri gè,
yeri nyu yeri tìí wi nɛ̄ bɛ̀ yeli siinyɛni tíɛlɛ.
Siɛnsɛnrɛ dè
16 Kàfɔli wire ŋáà wī yanyige ki nyùgofɔli wè,
wire tíimɛ wi- yanyige kɛn gè yeli mɛ́ lɛ̀gɛlɛ ke mìɛni nī kɛnmɛ pi mìɛni felige nɛ̄.
Kàfɔli wi- puu nɛ́ yeli ye mìɛni ní bèle.
17 Síɛrilɛ náà lè,
mi mi 'ti sɛbɛ nɛ́ mi kɔli ní,
mi Pɔli wè.
Kire gī mi fìɛ wè,
bɛ̀ mi nɛ sɛbɛ kire kɛnmɛ nɛ̄ bè.
18 We Kàfɔli Zezi Kirisi wi kpuʔɔrɔ ti- puu nɛ́ yeli ye mìɛni ní bèle.