Sɛbɛ siinwuu ŋáà Pɔli 'tórigo Tesalonikiyé mɛ́ bèle
Tesalonikiyé siinwuu
Síɛrilɛ
1
1 Mi Pɔli wè,
nɛ́ Silasi ní wè,
nɛ́ Timote ní wè,
weli 'sɛbɛ ŋáà tórigo wè yeli mɛ́ tɛ́ngɛfɔlilɔ gboli náà nī baa Tesaloniki kàʔa mɛ́ gè,
yeli bálì bīɛlɛ pínɛnyɛnigɛ nɛ̄ nɛ́ weli Tuu Kulocɛliɛ ní wè,
nɛ́ Kàfɔli Zezi Kirisi ní wè.
2 Weli Tuu Kulocɛliɛ wè nɛ́ Kàfɔli Zezi Kirisi ní wè,
pe- kpuʔɔrɔ nɛ́ yanyige taʔa ye nɛ̄.
Zezi Kirisi pɛnjɛngɛ wori dè
3 Kiī pɔ́rigɔ siinyɛninɛ,
weli de barigɛ kanʔa Kulocɛliɛ mɛ́ wè lɛ̀gɛlɛ ke mìɛni nī yeli kɛnmɛ nɛ̄ bè.
Bɛ̀ míɛni ki 'yɛli bè puu,
nɛ̀ taʔa gíi nɛ̄,
kàa nɛ fàrí nɛ waa yeli tɛ́ngɛlɛ nɛ̄ lè kpuʔɔ,
a yeli dɛ́nigɛ míɛni ki 'kpúʔɔ ye sunʔɔmɔ nī bè.
4 A kire sí weli kɛn weli nìɛ nyu nɛ fíkɛnyɛ wúʔuro yeli wori nɛ̄ dè Kulocɛliɛ tɛ́ngɛfɔlilɔ gbuʔulo nī gèle,
bɛ̀ ki 'nyaa yeli 'jáa nɛ̀ ki kpàri nɛ̀ cò nɛ́ tɛ́ngɛlɛ cò lè kpuʔɔ yeli wuʔɔyɔ yi mìɛni nī yè nɛ́ fùrɔgɔ gíì pe tari yeli nɛ̄ gè.
5 Kire gáà kire ki nyɛ́ni ki tìí mɛni Kulocɛliɛ kàyuʔu kiī sìnʔɛ gè,
kire ki bé tí Kulocɛliɛ wi- ki tɔ́ri yeli 'nyuɔ nɛ̀ yɛli bè jíin baa wi Kùlofɔligɔ nī gè,
nɛ̀ taʔa gíi nɛ̄,
bɛ̀ yeli nɛ wuʔɔ wè.
6 Nɛ́ ki cɛ́n Kulocɛliɛ wi 'sín;
bìli pe yeli wuʔɔ bèle,
wi bé ki fuʔɔ tɔ́n gè pe mɛ́.
7 Nɛ̀ pínɛ yeli bálì ye nyɛ́ni wuʔɔ bèle,
Kulocɛliɛ wi bé ŋɔ́daala kɛn yeli mɛ́ bè fàri weli nɛ̄.
Ki bága kpíʔile lɛ̀lɛ níì nī Kàfɔli Zezi wi bága wìi tìɛ,
bé kɔ́n baa nyìʔɛnɛ nī lè nɛ́ nyìʔɛnɛ tundunminɔ ní bèle wi wuulo bèle;
piyē nɛ́ fànʔa ní.
8 Wi bága de báan kàsunnyige nī;
bìli piyè Kulocɛliɛ cɛ́n wèʔ,
nɛ́ bìli pe 'cíi pe wè lúru we Kàfɔli Zezi wi Kataanna Siɛnrɛ mɛ́ dèʔ,
wi bé pa wi fuʔɔ tɔ́n gè pe mɛ́.
9 Peli bálì bèle,
wuʔɔgɔ bé tuu pe nɛ̄,
wuʔɔgɔ gáà kiǐ je ga kúɔ bè nyaa gèʔ;
pe bé líili Kàfɔli nɛ̄ wè,
piyě wi fànʔa ki kpuɔmɔ nyaa bèʔ.
10 Cɛngɛ gíì wi kɛ́nì pɛn wè,
kire cɛngɛ gè,
wi wuulo bèle,
nɛ́ bìli pe 'tɛ́ngɛ wi nɛ̄ wè,
pe bé kpuʔɔrɔ taʔa wi nɛ̄,
béri wi wéli de cúru wi nɛ̄.
Yeli míɛni bèle yeli bága puu baa,
bɛ̀ yeli 'tɛ́ngɛ weli wojuuro nɛ̄ dè.
11 Kire kɛnmɛ nɛ̄ weli nɛ náari súuri yeli mɛ́,
gìi ki bé tí Kulocɛliɛ wi- yeli nyaa yeli nyɛ́nì yɛli nɛ́ wire yerile ní lè.
Weli nɛ náari nɛ pínɛ gìi ki bé tí a kacɛ̀ngɛ kaala níì 'yeli dɛ́ni,
yeli nɛ caa bè ni kpíʔile lè,
wi fànʔa ki- tí yeli gbɛ̀ ni kpíʔile.
Nɛ̀ pínɛ a kaala níì yē tɛ́ngɛlɛ kakpiʔile lè,
ye- jáa ye ni kpíʔile.
12 A kire 'kpíʔile gè,
kpuʔɔrɔ bé taʔa we Kàfɔli Zezi Kirisi wi míʔɛ nɛ̄ gè yeli sunʔɔmɔ nī bè,
dí wire míɛni wi- sí ki kpuʔɔrɔ taʔa dè yeli nɛ̄;
ki bé kpíʔile weli Kulocɛliɛ wire fànʔa nɛ̄,
nɛ́ Kàfɔli Zezi Kirisi ní wèa.