Baara díì Pɔli wi 'kúɔ Tesaloniki kàʔa nī gè
2
1 Siinyɛninɛ,
yeli tíimɛ yeli nyɛ́nì ki cɛ́n weli kárilɛ lè baa yeli mɛ́ bèle,
kiì nyaa waʔanɛ wīʔ.
2 Majo bɛ̀ yeli ki 'cɛ́n gè,
pe 'weli wuʔɔ,
nɛ̀ weli tiʔɛlɛ Filipi kaʔa nī gèa.
Kire nɛ́ ki mìɛni ní a Kulocɛliɛ wi 'lèbaanna nyɔ́gɔ weli nī,
a weli 'wi Kataanna Siɛnrɛ jáari dè,
nɛ ní cáanra nɛ̄ dè kátii.
3 Nɛ̀ taʔa gíi nɛ̄,
weli yɛrimɛ bè,
pùunnimɔ wè ki siɛnrɛ nī dèʔ,
sɔ̀ngibiire wè ti nīʔ,
fáannigɛ wè ti nīʔ.
4 Gìi ki 'cɛ́n gè,
Kulocɛliɛ wi 'weli siʔɛ nɛ̀ wéli,
nɛ̀ ki nyaa weli bé gbɛ̀ ki baara kúɔ dè.
A wi 'weli tɛ́ngɛ weli de wi Kataanna Siɛnrɛ jáari dè.
Kire nɛ̄ weli nɛ ti nyu.
Weli wè ti kúu bè siɛnnɛ dɛ́ni wīʔ,
Kulocɛliɛ weli nɛ caa ki- dɛ́ni,
wire ŋáà wi 'weli funyɔ yi laamɛ cɛ́n bè.
5 Weli sì kɛ́nì siɛnrɛ táà fáala juu nɛ̀ siɛn fáanniʔ.
Bɛ̀ yeli tíimɛ 'ki cɛ́n gè,
ki sɔ̀ngirɔ tiì kɛ́nì jíin weli nīʔ bè yakaa taa jànvaa nɛ̄ʔ,
Kulocɛliɛ wire wi 'ki cɛ́n nɛ́ weli ní.
6 Weli sì kɛ́nì kpuʔɔrɔ caa siɛnnɛ mɛ́ʔ,
weli sì ti caa yeli mɛ́ʔ,
weli sì ti caa pàli mɛ́ʔ.
7 Nɛ̀ sí ki taa bɛ̀ weli yē Kirisi wi tundunminɔ bèle,
weli cî gbɛ̀ jo yeri kire kpínʔini weli mɛ́.
Weli yé cɛ́nì puu nɛ́ funyige ní yeli sunʔɔmɔ nī bè majo bɛ̀ pìile yàa cî nɛ wi pìile gbiʔɛlɛ bèle kɛnmɛ bíì nɛ̄ bè.
8 Bɛ̀ yeli 'weli dɛ́ni kpuʔɔ weli funyɔ nī yè,
weli sì puu nɛ caa bè ki yérige Kulocɛliɛ Kataanna Siɛnrɛ ti juʔu kire yákuɔ nɛ̄ yeli mɛ́ʔ.
Weli cé yeri ki nɛ̄ bè cɛ weli sìi kɛn wè yeli kɛnmɛ nɛ̄ bè.
Nɛ̀ taʔa gíi nɛ̄,
yeli woli ni cé kpúʔɔ weli mɛ́ bɛ̀ ki caa mmɛ.
9 Kiī cɛ́ngɛ,
siinyɛninɛ,
yeli nɛ sɔ̀ngí nɛ tari nɛ́ weli baara ní dè,
nɛ́ weli fùrɔgɔ ní gè.
Weli 'puu nɛ baara pìlige nɛ́ cɛnvugo,
gìi ki bé tí weli tugoro ti fǎga puu yeli wáà nɛ̄ʔ,
nɛ́ sí puu nɛ Kulocɛliɛ Kataanna Siɛnrɛ nyu dè yeli mɛ́.
10 Yeli bèle,
yeli bé gbɛ̀ ki juu yeli bálì bīɛlɛ tɛ́ngɛfɔlilɔ bèle,
Kulocɛliɛ míɛni wi 'ki cɛ́n nɛ̀ pínɛ,
mɛni weli 'puu nɛ sínmɛ koligo tári gè níɛ kele kúu gèle ke kúɔgɛnmɛ nɛ̄ bè kolimɔ fùn nɛ́ yeli ní bèle.
11 Yeli 'ki cɛ́n weli 'puu nɛ́ yeli ye mìɛni nigbe nigbe ní bèle majo mɛni tuufɔli sî puu nɛ́ wi pìile ní bèle.
12 Weli 'puu nɛ nyu nɛ yeli yɛrigi,
nɛ yeli nàzɔnnɔ tɛ́ngi bèle,
níɛ ki nyu nɛ gbɛ̀ngí yeli mɛ́ yeri tári yeri yɛligi mɛni Kulocɛliɛ wiī nɛ ki caa gè.
Wire wi 'yeli yéri ye- puu nɛ́ wire ní wi kùlofɔligɔ nī gè,
nɛ́ ki kpuɔmɔ nī bè.
13 Kire kɛnmɛ nɛ̄ weli míɛni bèle weli nɛ Kulocɛliɛ síɛri wè sìnvurɔ nī,
nɛ̀ taʔa gíi nɛ̄,
Kulocɛliɛ nyasiɛnrɛ dáà yeli 'lúʔu weli mɛ́ dè,
yeli 'fɔ̀li ti nɛ̄.
Yeli sì ti tɔ́ri siɛnnɛ siɛnjuuro tíɛlɛʔ,
yeli 'ti tɔ́ri Kulocɛliɛ kányiʔɛ siɛnrɛ tíimɛ.
Kire siɛnrɛ tire míɛni ti nyɛ́ni baara yeli funyɔ nī yè,
yeli bálì bīɛlɛ tɛ́ngɛfɔlilɔ bèle.
14 Siinyɛninɛ,
yeli 'tɔ̀ni nɛ̀ yeli kele kúɔ gèle bɛ̀ Kulocɛliɛ tɛ́ngɛfɔlilɔ gbuʔulo kɛnmɛ tíɛlɛ bè,
gàli gīɛlɛ Zezi Kirisi nī wè baa Zude kùlo nī lè.
Ki 'nyaa yeli nyɛ́nì wuʔɔgɔ suɔ yeli kùnunɔ wuulo pe kiyɛ nī yè,
majo mɛni ki tɛ́ngɛfɔlilɔ gbuʔulo ke 'wuʔɔgɔ suɔ Zuufulo pe kiyɛ nī yè.
15 Peli pe 'Kàfɔli Zezi kpúu wè nɛ́ Kulocɛliɛ siɛnjuulo ní bèle,
nɛ́ sí wuʔɔgɔ taʔa weli nɛ̄ kátii.
Pe kɛnmɛ piì Kulocɛliɛ dɛ́niʔ,
siɛnnɛ pe mìɛni yē pe leguulo.
16 Piyē nɛ weli cɔ̀rí we fǎri Kataanna Siɛnrɛ nyu dè kùlogolo kálì siɛnnɛ mɛ́ʔ,
dí pe sí suɔ wèʔ.
Kàa cɛ ki fàrí nɛ waa pe kapiʔile nɛ̄ gèle,
a Kulocɛliɛ fungo ki sí yɛ̀ pe kúrugu.
Pɔli wiī nɛ ki caa bè kɛ́ baa Tesalonikiyé mɛ́ bèle
17 Ki sí nyaa,
siinyɛninɛ,
yeli nɛ́ weli ní bèle,
we 'láʔala wìye nɛ̄ we nyaʔa nɛ̄ gè,
lɛ̀lɛ láà cɛ̀ri yákuɔ wī;
funyɔ nī yè wiyè láʔala wìye nɛ̄ʔ.
Yeli nyaa láa ki tɔ̀ni yē weli nɛ̄ kpuʔɔ.
18 Kire kɛnmɛ nɛ̄ weli nɛ caa bè kɛ́ baa yeli tiʔɛ nī gè.
Mi tíimɛ wè,
mi Pɔli wè,
ki 'tɔliyɔ nyuɔ kúɔ,
mi 'puu nɛ ki caa bè kɛ́ baa yeli mɛ́;
Setɛni wiì sí fɔ̀li ki nɛ̄ʔ.