Sɛbɛ péliwe ŋáà Pɔli 'tórigo Tesalonikiyé mɛ́ bèle
Tesalonikiyé péliwe
Síɛrilɛ
1
1 Mi Pɔli wè,
nɛ́ Silasi ní wè,
nɛ́ Timote ní wè,
weli 'sɛbɛ ŋáà tórigo wè yeli mɛ́ tɛ́ngɛfɔlilɔ gboli náà nī baa Tesaloniki kàʔa mɛ́ gè,
yeli bálì bīɛlɛ pínɛnyɛnigɛ nɛ̄ nɛ́ weli Tuu Kulocɛliɛ ní wè nɛ́ Kàfɔli Zezi Kirisi ní wè.
Kpuʔɔrɔ nɛ́ yanyige ki- puu yeli nɛ̄.
Tesaloniki wuulo tɛ́ngɛlɛ wori ti 'Pɔli dɛ́ni wè
2 Weli nɛ Kulocɛliɛ síɛri wè lɛ̀lɛ ó lɛ̀lɛ yeli ye mìɛni kɛnmɛ nɛ̄ bè.
Lɛ̀lɛ ó lɛ̀lɛ a weli gbɛ́nɛ̀ je náari wè,
weli nàa sɔ̀ngi nɛ tari nɛ́ yeli ní.
3 Tɛ́ngɛlɛ kakpiʔiligele gálì yeli nɛ kúu gèle,
nɛ́ baara dáà yeli 'kúɔ dɛ́nigɛ kɛnmɛ nɛ̄ bè,
nɛ̀ pínɛ bɛ̀ yeli 'lèbaanna le nɛ̀ yeli sɔ̀ngirɔ taʔa dè kpuʔɔ Kàfɔli Zezi Kirisi nɛ̄ wè,
weli nɛ sɔ̀ngí nɛ tari nɛ́ kire gáà ki mìɛni ní gè lɛ̀lɛ ó lɛ̀lɛ weli Tuu Kulocɛliɛ yiʔɛ mɛ́ gè.
4 Siinyɛninɛ,
weli 'ki cɛ́n yeli woli ni 'Kulocɛliɛ dɛ́ni wè,
a wi 'yeli nyíɛnɛ nɛ̀ kɔ̀na.
5 Nɛ́ ki cɛ́n Kataanna Siɛnrɛ dáà weli 'juu yeli mɛ́ dè,
ti wè nyuɔ nī yákuɔ wīʔ.
Ki 'nyaa Kulocɛliɛ Pìle lire fànʔa ní weli 'ti juu,
weli sì ti juu nɛ́ káaliyɛ níʔ.
Yeli tíimɛ nyɛ́nì ki cɛ́n mɛni weli 'puu yeli sunʔɔmɔ nī bè.
Kire gáà ki mìɛni gè,
yeli nyuɔmɔ weli 'puu nɛ caa.
6 Yeli míɛni bèle yeli 'yìye kpíʔile bɛ̀ weli tíɛlɛ,
nɛ́ bɛ̀ Kàfɔli tíɛlɛ wè.
Ki 'nyaa yeli 'Kataanna Siɛnrɛ cò dè wuʔɔyɔ sunʔɔmɔ nī bè kátii,
nɛ́ sí nɛ fundaanra kpínʔini Kulocɛliɛ Pìle lire fànʔa nɛ̄ gè.
7 A kire 'ki kɛn a yeli 'kò fìɛ cɛ̀nwɛ tɛ́ngɛfɔlilɔ pe mìɛni mɛ́ bèle Maseduwani tɛ́nimɛ nī bè nɛ́ Akayi tɛ́nimɛ ní bè.
8 Nɛ́ ki cɛ́n,
bɛ̀ Kàfɔli wi siɛnrɛ ti 'kɔ́n baa yeli tiʔɛ nī gè,
kiì kò majo Maseduwani nɛ́ Akayi yákuɔ nī ti sɛ́nì juuʔ.
Nɛ̀ sí ki taa yeli bèle,
piyē nɛ yeli tɛ́ngɛlɛ ni wori nyu dè tiɛrɛ ti mìɛni nī,
bɛ̀ yeli 'tɛ́ngɛ Kulocɛliɛ nɛ̄ wè.
Kire nɛ̄ nyùgo ní wè ki nɛ̄ʔ weli ní de yakaa nyu cíginiʔ.
9 Ki 'nyaa piyē nɛ ki nyu peli tíimɛ bèle,
mɛni yeli 'weli cò bɛ̀ weli cé kɛ́ baa yeli tiʔɛ nī gè,
nɛ́ bɛ̀ yeli 'láʔa yeli yasunro nɛ̄ dè nɛ́ yìye taʔa Kulocɛliɛ wewiiwe nɛ̄ wè,
wire ŋáà wī Kulocɛliɛ kányiʔɛ wuu wè.
10 Yeli nɛ wi Jaa siri wè,
ŋàa wi je ga kɔ́n baa nyìʔɛnɛ nī lè.
Kulocɛliɛ wi 'Zezi nyɛ́ wè nɛ̀ yige kúbilo sunʔɔmɔ nī bè,
wire ŋáà wi 'weli suɔ Kulocɛliɛ funyɛrigɛ mɛ́ gè,
gàa ki báan gèb.