3
1 Bɛ̀ sí weli sì cé ń'nɛ̀ je gbɛ̀ jáa bè ki kpàri bè cò wèʔ,
a weli 'ki nyaa ki 'pɔ́ri weli yákuɔlɔ we- kò baa Atɛni kàʔa mɛ́ gè.
2 A we sí Timote tun wè baa yeli mɛ́,
weli siinyɛni wè,
ŋìi wi nyɛ́ni pínɛ nɛ baara nɛ́ Kulocɛliɛ ní wè bè Kirisi Kataanna Siɛnrɛ jáari dè.
Timote wi sa juu wi- ŋɔri nyɔ́gɔ yeli nī tɛ́ngɛlɛ nī lè,
3 gìi ki bé tí yeli wáà fáala fǎga wìi yaʔa bè kɛn ki wuʔɔyɔ nyáà mɛ́ yèʔ.
Á kire 'laa wè,
yeli tíimɛ 'ki cɛ́n tire kiyɛ nī wiyē bile.
4 Kire sí weli 'puu nɛ nyu yeli mɛ́ bà weli 'puu baa nɛ́ yeli ní bèle,
nɛ́ yeli sɔ̀mi dí wuʔɔgɔ bé weli taa wè.
Bɛ̀ sí ki kɛ́nì kpíʔile,
yeli 'tire cɛ́n nɛ̀ kúɔ.
5 Kire kɛnmɛ nɛ̄,
bɛ̀ mi sì kɛ́nì je gbɛ̀ ki kpàri bè cò wèʔ,
a mi sí tunduro tórigo bè kàa cɛ́n yeli tɛ́ngɛlɛ ni wori nī dè.
Ki 'nyaa kiī nɛ fíɛrɛ cògí mi nɛ̄,
Setɛni wi fǎga puuwelige cáan yeli nɛ̄ʔ yeli ga yiri tɛ́ngɛlɛ nī lèʔ,
dí weli baara ti sí yiri waʔanɛʔ.
6 Timote wi sí kɔ́n baa yeli tiʔɛ nī gè nɛ̀ pɛn;
wi pɛ́nì siɛntaanra juu weli mɛ́ yeli tɛ́ngɛlɛ ni wori nɛ̄ dè nɛ́ yeli dɛ́nigɛ ní gè.
Nɛ̀ pínɛ wi 'ki juu mɛni weli 'yeli dɛ́ni wè,
nɛ́ bɛ̀ yeli nɛ sɔ̀ngí nɛ tari nɛ́ weli kacɛ̀ngɛ ní gè lɛ̀gɛlɛ ke mìɛni nī wè,
dí weli nyaa láa kiī yeli nɛ̄ majo bɛ̀ yeli wuʔu kiī náʔa weli nɛ̄ nɛ̀ pínɛ wè.
7 Kire kɛnmɛ nɛ̄ siinyɛninɛ,
a ki nɛ́ cɛ́nì nyaa weli yē nɛ wuʔɔ yo,
ki wuʔɔyɔ nyáà yi mìɛni nī yè weli funyɔ yiī tɛ́niyɛ tiɛnugo nī yeli tɛ́ngɛlɛ lire kɛnmɛ nɛ̄.
8 Ki 'nyaa weli yē sìi nɛ̄ bɛ̀ ki yē ŋɔ̀ wè,
nɛ̀ taʔa gíi nɛ̄,
yeli 'yéri nɛ̀ lìri Kàfɔli pínɛnyɛnigɛ nī gè.
9 Fundaanra yē weli nī kpuʔɔ yeli kɛnmɛ nɛ̄ bè,
weli sì ń'nɛ̀ cɛ́nì ki cɛ́n mɛni weli 'yɛli bèri Kulocɛliɛ síɛri wè de síi wèʔ.
10 Pìlige nɛ́ cɛnvugo,
weli nɛ wi náari kpuʔɔ wi- ki kpíʔile weli gbɛ̀ jáa bè yeli nyaa yiɛyɛ nī yè,
a ki yē yakaa 'laa yeli tɛ́ngɛlɛ nī lè bé sí yeli tɛnmɛ ki nɛ̄a.
11 Kulocɛliɛ wire tíimɛ wè,
wire ŋáà wī weli Tuu wè,
nɛ́ weli Kàfɔli Zezi ní wè,
pe- koligo múgu gè weli mɛ́,
weli gbɛ̀ kɛ́ baa yeli mɛ́.
12 Kàfɔli wi- ki kpíʔile dɛ́nigɛ gáà gī yeli mɛ́ nɛ́ yìye ní bèle,
nɛ́ siɛnnɛ pe mìɛni ní nɛ̀ pínɛ wè,
ki dɛ́nigɛ ki de kpóri de waa yiʔɛmɛ,
majo bɛ̀ yeli 'weli dɛ́ni bèle.
13 Gìi ki bé tí yeli nàzɔnnɔ pe- lìri,
ye- puu dìgire fùn,
yeri tári cìilile weli Tuu Kulocɛliɛ wi yiʔɛ mɛ́ gè,
cɛngɛ gíì weli Kàfɔli Zezi wi kɛ́ni báan nɛ́ wi wuulo pe mìɛni ní bèle.
[Ki- taa ki puu bɛ̀].