10
1 Nɛ siinyɛninɛ,
gìi mi nɛ caa mi fungo nī gè,
nɛ́ gìi mi nɛ náari Kulocɛliɛ mɛ́ wè Zuufulo pe kɛnmɛ nɛ̄ bè,
kire yē pe- suɔlɔ taa.
2 M'bé tɔ̀ni bè gbɛ̀ kàa juu pe wori nɛ̄ dè:
Kulocɛliɛ caʔa kiī pe nī kpuʔɔ,
nɛ̀ sí ki taa wi cɛ́ndiʔɛ ki wè pe mɛ́ʔ.
3 Bɛ̀ sí piyè ki cɛ́nʔ mɛni Kulocɛliɛ wi sî siɛn tɔ́ri wè níɛ̀ jo wiī sínwɛ wè,
a pe sí nɛ peli tíimɛ sínmɛ koligo tári,
nɛ́ Kulocɛliɛ sínmɛ koligo cíi gè.
4 Nɛ̀ sí ki taa Kirisi wire wī Fànʔa Siɛnrɛ ti foridiʔɛ gè,
gìi ki bé tí bìli pe mìɛni pe 'tɛ́ngɛ bèle,
pe- Kulocɛliɛ sínmɛ taa bè.
Suɔlɔ niī siɛnnɛ pe mìɛni woli wī
5 Ki 'nyaa Misa wi 'ki sɛbɛ nɛ̀ ki tìɛ dí sínmɛ bíì siɛn bé gbɛ̀ taa Fànʔa Siɛnrɛ nī dè,
n'gɛ:
a siɛn ŋíì nɛ tári nɛ yɛligi nɛ́ Fànʔa Siɛnrɛ ní dè,
siɛn wi bé sìi taa Fànʔa Siɛnrɛ nī dèa.
6 Nɛ̀ sí ki taa sínmɛ bíì siɛn bé gbɛ̀ taa tɛ́ngɛlɛ kɛnmɛ nɛ̄ bè,
kire sínmɛ pi siɛnrɛ ti 'jo:
Fǎri ki sɔ̀ngí muɔ fungo nī gèʔ bé jo:
Ŋáasiɛn wi je ga yɛ̀ baa nyìʔɛnɛ nī lèb ?
A muɔ 'tire juu dè,
kire kɔri wi 'jo bè Kirisi tìrige wè náʔa dàala nɛ̄ lè wī.
7 Nɛ̀ pínɛ fǎga ki sɔ̀ngi muɔ fungo nī gèʔ bé jo:
«Ŋáasiɛn wi je ga tìgi baa láʔalafun kàtiʔɛ nī gèʔ ?»
A muɔ 'tire juu dè,
kire kɔri wi 'jo siɛn wi sa Kirisi nyɛ́ wè wi yige kúbilo sunʔɔmɔ nī bè wī.
8 Gíi sí ki 'juu kire siɛnrɛ dáà ti wori nɛ̄ dè ?
Siɛnrɛ tiī bile túɔn muɔ táanni baa muɔ nyuɔ nī gè,
tiī muɔ fungo nī gèc.
Kire 'jo tɛ́ngɛlɛ siɛnrɛ dè,
dàa weli nɛ jáari dè.
9 A ki yē muɔ 'jáa nɛ̀ ki juu nɛ̀ yige muɔ nyuɔ nī gè nɛ́ jo dí Zezi wire wī Kàfɔli wè,
nɛ́ ń'nɛ̀ tɛ́ngɛ ki nɛ̄ muɔ fungo nī gè dí Kulocɛliɛ wi 'wi nyɛ́ nɛ̀ yige kúbilo sunʔɔmɔ nī bè,
muɔ bé suɔ.
10 Nɛ̀ taʔa gíi nɛ̄,
tɛ́ngɛlɛ náà nī siɛn mɛ́ fungo nī gè,
lire ni nyɛ́ni siɛn kpínʔini sínwɛ;
a siɛn 'ki juu nɛ̀ yige wi nyuɔ nī gè,
Kulocɛliɛ nɛ̂ wi suɔ.
11 Ki 'nyaa Kulocɛliɛ siɛnsɛbɛrɛ ti 'ki juu nɛ́ jo:
Siɛn ó siɛn wi 'tɛ́ngɛ wi nɛ̄ wè,
fìɛrɛ sǐ tɔ́n ki siɛn nɛ̄ wèʔd.
12 Nɛ̀ taʔa gíi nɛ̄,
wàlimɛ wè baa Zuufulo nɛ́ Girɛki wuuloe ní bèleʔ:
ki 'nyaa Kàfɔli nigbe wī pe mìɛni nɛ̄,
nɛ̀ pínɛ bìli pe mìɛni pe nyɛ́ni wi yeri bèle,
wiī nɛ pe kanʔa nìʔɛgɛ.
13 Ki 'nyaa:
A siɛn ó siɛn 'Kàfɔli wi míʔɛ yeri gè,
siɛn wi bé suɔf.
14 A piyè sí tɛ́ngɛ wi nɛ̄ wèʔ,
mɛni pe bé gbɛ̀ wi yeri bè síɛ ?
Nɛ̀ pínɛ,
a piyè wi wori lúʔu dèʔ,
mɛni pe bé gbɛ̀ tɛ́ngɛ wi nɛ̄ bè síɛ ?
Mɛni sí wi wori ti bé gbɛ̀ lúʔu,
a siɛn sì ti jáari wè ?
15 Mɛni sí ti bé gbɛ̀ jáari bè síɛ,
a piyè siɛn tun wèʔ ?
Nɛ̀ yɛli nɛ́ gàa gī baa Kulocɛliɛ siɛnsɛbɛrɛ nī dè,
ti 'jo:
«Bìli pe nyɛ́ni katanʔana nyu gèle pe pɛngɛnnɛ ni 'nyuɔ díɛg !»
16 Nɛ̀ sí ki taa pe mìɛni sì fɔ̀li nɛ̀ yéri Kataanna Siɛnrɛ ti wori nɛ̄ dèʔ.
Tire sí Ezayi cé juu dè,
nɛ́ jo:
Kàfɔli,
ŋáasiɛn wi kɛ́nì tɛ́ngɛ weli kajuulo ni siɛnrɛ nɛ̄ dèh ?
17 Nɛ̀ sí ki taa gìi siɛn sî lúʔu gè,
kire ki báan nɛ́ tɛ́ngɛlɛ ní lè;
gìi siɛn sî lúʔu gè,
kire 'nyaa Kirisi wori dè.
18 A mi sí jo:
Dùʔɔ piyè sí ti lúʔu wī lé ?
Pe 'ti lúʔu nɛ̀ caanri !
Ti 'juu baa Kulocɛliɛ siɛnsɛbɛrɛ nī dè nɛ́ jo:
Pe juumɔ pi 'dàala
ni mìɛni kpàri,
a pe kajuulo ni 'kɛ́
duniya láʔagɛlɛ
ke mìɛni nī gèlei.
19 A mi sí jo:
«Dùʔɔ Isirayɛli siɛnnɛ piyè sí ti kɔri cɛ́nʔ wè wī ?»
Misa wi kíni nɛ̀ ki juu nɛ́ jo:
Kùlo náà nī yeli nɛ jùɔ́n lè,
m'bé yejaʔa yɛ̀gɛ yeli nī pe kúrugu;
bè yeli funyɔ yɛ̀gɛ yè kùlo láà wuulo kúrugu,
pe cɛ wè sícilileʔj.
20 Ezayi wi cɛ́nì sori nɛ̀ ki juu nɛ́ jo:
Bìli piyè puu nɛ mi tiʔɛ caa gèʔ,
peli 'pe mi nyaa;
Bìli piyè mi yúgo bèleʔ,
peli mi 'tí a pe 'mi nyaa wálilɛk.
21 Gìi sí ki 'Isirayɛli kɛnmɛ kúɔ bè,
a wi 'jo:
Nɛ̀ líɛ nɛ̀ pɛ́nì cɛngɛ kúɔ gè,
mi 'mi kiyɛ sáʔa yè kùlo láà mɛ́,
ni wè nɛ lúru mi nɛ̄ʔ,
ni cɛ yē nɛ mi túngu wīl.