Wurɔmiyé 11

Kulocɛliɛ wiì Isirayɛli wuulo wáa bèleʔ

1 A mi sí jo: «Kulocɛliɛ wi 'tùʔɔ nɛ̀ wi kùlo wáa lè wī lé ?» ʔéʔe díɛ ! Mi wobowo wè, wuu wī mi wè, siimɛ wuu mi yē, nɛ ní Bɛnzamɛ saʔa tùlugo wuu. 2 Kulocɛliɛ wi cé wi kùlo wuulo cɛ́n bèle nɛ̀ yaʔa, wiì pe wáaʔ. Á kire 'laa wè, yeli sì ki cɛ́nʔ lé gàa ti 'juu wori nɛ̄ dè, bà wi cé wi funyaʔa juu gè nɛ̀ tìɛ Kulocɛliɛ nɛ̄ wè, funyaʔa gáà ki 'puu wi nī kúrugu wè ? 3 Wi cé jo: Kàfɔli, pe 'muɔ kpúu bèle, nɛ̀ pínɛ weli gbùʔɔrɔdiɛyɛ yè, pe 'yi kpúɔn nɛ̀ yi cúʔɔ. Mi nigbe mi 'kò, pe sí nɛ mi caa nɛ́ kpúumɔ ní.

4 Nɛ̀ sí ki taa siɛnnugoro díi Kulocɛliɛ wi cé kɛn wi mɛ́ ? Kulocɛliɛ wiì cé wi yɛ lé: Mi nyɛ́nì nàguɔlɔ siramuʔɔ sirakiɛ nɛ́ kogunɔ (7 000) tɛ́ngɛ nìɛ wuulo; pe wàa sì tìgi nɛ̀ káguro cáan yasungo yiʔɛ mɛ́ gèʔ.

5 Nɛ̀ pínɛ, pàngɛ cɛnyɛ nyáà nī yè, pàli cɛ̀ri nyɛ́nì kò; Kulocɛliɛ wire wi 'peli nyíɛnɛ nɛ̀ kɔ̀n wi kpuʔɔrɔ kɛnmɛ nɛ̄ bè. 6 A ki sí yē Kulocɛliɛ kpuʔɔrɔ kɛnmɛ nɛ̄ peli 'nyíɛnɛ nɛ̀ kɔ̀n bèle, kire 'jo pe kakpiʔiligele keli mɛ́ bɛ̀ʔ ki 'taaʔ. Á kire 'laa wè kpuʔɔrɔ tiǐ sî ní de tíin kpuʔɔrɔʔ.

7 Kire kɔri wire sí jo gáa wī ? Yɛgɛ gáà Isirayɛli 'puu nɛ caa gè, wiì ki taaʔ. Bìli sí Kulocɛliɛ wi 'nyíɛnɛ nɛ̀ kɔ̀n bèle, peli nyɛ́nì ki taa; sɛnminɛ bèle a peli 'pe funyɔ gbɛ̀n yè. 8 Majo bɛ̀ ki 'sɛbɛ baa Kulocɛliɛ siɛnsɛbɛrɛ nī dè nɛ́ jo:

Kulocɛliɛ wi 'pe funyɔ tɔ́n yè;

pe nyapigele ke wè nɛ nyaʔaʔ,

pe ngbúʔulo ke wè lúruʔ,

fúɔ nɛ̀ pɛ́nì nɔ̀ pàngɛ gè.

9 A sí jo:

Pe fundaanra lìigbuʔɔlɔ ke- puu pe mɛ́ bɛ̀ gárigɛ tíɛlɛ,

ke- puu pe mɛ́ pɛnnɛ,

ke- puu pe mɛ́ kúrugodiʔɛ,

ke- puu pe mɛ́

pe kapiʔi fuʔɔ ki tɔ́ndiʔɛ.

10 Fúɔnrɔ ti- pe nyapigele cò gèle,

pe fǎri nyaʔa ke nīʔ,

nɛ̀ pínɛ pe kàduuyo

yi- puu kùruyo súuri.

11 A mi sí jo: Pe cé tùʔɔ nɛ̀ kúrugo nɛ̀ tuu bè kò baa tuulo wī lé ? ʔéʔe díɛʔ ! Ki 'nyaa pe kakolido ti 'kpíʔile kaala nɛ́ wuulo kɛn bèle a pe 'suɔlɔ taa lè, gìi ki bé tí ki- yejaʔa yɛ̀gɛ Isirayɛli siɛnnɛ nī bèle. 12 A ki sí yē Isirayɛli siɛnnɛ pe kakolido ti 'kacɛ̀ngɛ kpíʔile duniya mɛ́ wè, nɛ̀ pínɛ a ki 'nyaa pe tuulo ni 'kacɛ̀ngɛ kpíʔile kùlogolo kálì wuulo mɛ́ bèle wè, a ki sí yē Isirayɛli siɛnnɛ pe cé koli nɛ̀ pɛn suɔlɔ koligo nī gè, kiǐ cî ní kàa fàri lé gàa nɛ̄ gè ?

Bìli pe wè Zuufulo bèleʔ pe suɔlɔ taagɛnmɛ bè

13 Yeli ní mi sí nɛ nyu yeli bálì bīɛlɛ wuulo bèle: bɛ̀ Kàfɔli wi 'mi kpíʔile mi 'puu tundunwɔ kùlogolo kálì wuulo mɛ́ bèle, mi nɛ mi baara ti kɛnmɛ nɛ̄ bè, 14 gìi ki bé tí ki- yejaʔa yɛ̀gɛ mi kùlo wuulo mɛ́ bèle, dí mi sí pàli taa bè suɔ pe nī. 15 Nɛ̀ taʔa gíi nɛ̄, a ki yē pe wàlilɛ ni 'tí a Kulocɛliɛ wi 'koli nɛ̀ duniya wuulo juu bèle nɛ̀ taʔala wìi nɛ̄ wè, a pe sí koli nɛ̀ pɛn Kulocɛliɛ mɛ́ wè, je ki bé nyaa majo pe cé kùu nɛ́ ń'nɛ̀ koli nɛ̀ nyɛ́ wī ! 16 A ki sí yē yaliipelide tiī cɛ̀nrɛ tiɛlɛ fùn wè, dàa ti 'kò sɛnrɛ dè, ti mìɛni yē cɛ̀nrɛ wī; nɛ̀ pínɛ, a ki yē nìre tiī cɛ̀nrɛ tiɛlɛ fùn wè, bà míɛni gànleye yi bé puu cɛ̀nyɛ tiɛlɛ fùn bè pínɛ.

17 A ki sí yē pe 'wolivi tiige ki gànleye yáà celile nɛ̀ láʔala yè, nɛ́ muɔ puɔ nɛ̀ tárigɛ baa wè, muɔ ŋáà wī nyàʔa tiige gè, a muɔ 'kò nɛ wolivi tiige ki tùnmɔ tari bè nɛ pínɛ wè, 18 ma fǎga sí de mìɛ nyíɛnɛ lèye nyáà nɛ̄ pe 'celile nɛ̀ láʔala yèʔ. Á kire 'laa wè, a muɔ nɛ mìɛ nyíɛnɛ wè, muɔ wī lé ma 'nìre tuʔɔ dè nɛ̀ cò ? Nìre tire túʔu bɛ̀ʔ ti 'muɔ tuʔɔ nɛ̀ cò ? 19 Muɔ bé gbɛ̀ ki juu bé jo pe 'lèye celile yè nɛ̀ láʔala, dí muɔ sí taa bè puɔ bè tárigɛ baa wī ! 20 Kányiʔɛ gī, pe 'lèye nyíì láʔala yè bɛ̀ tɛ́ngɛlɛ wè yi mɛ́ wèʔ; muɔ wè, tɛ́ngɛlɛ lire ni 'tí muɔ yē baa. Ma fǎga sí de mìɛ tɛ́ngi naamɛ díɛʔ ! Cɛ mari fìʔɛ́ wī ! 21 Á kire 'laa wè, lèye nyáà yī tiige ki lèye yè, a Kulocɛliɛ wiì yire yaʔa yèʔ, mari ciʔige wi fǎa ga ki felige kpíʔile gè muɔ nɛ̄ʔ.

22 Ma sí ki cɛ́n: Kulocɛliɛ fungo kiī cɛ̀ngɛ, wi sí yē tanʔaniwɛ nɛ̀ pínɛ. Bìli pe 'tánʔa nɛ̀ tuu bèle, wi fungo kiī tanʔanigɛ pe kúrugu. Nɛ̀ sí ki taa muɔ wè, wi kacɛ̀ngɛ kiī baa ki tiʔɛ nī gè muɔ kɔli mɛ́ gè, ki sí nyaa muɔ yéri nɛ̀ ki cɛ́n wi fungo kiī cɛ̀ngɛ. A kire 'laa wè, muɔ míɛni wè, wi bé muɔ ceri bè láʔa. 23 Nɛ̀ pínɛ peli míɛni bèle, a pe láa piyè kò baa pe sìndɛngɛlɛ nī lèʔ, a pe 'tɛ́ngɛ wè, ki fànʔa yē Kulocɛliɛ mɛ́ wè wi- koli bè pe puɔ bè tárigɛ cígini. 24 Nɛ̀ taʔa gíi nɛ̄, muɔ ŋáà ma 'puu nyàʔa lège gè, á Kulocɛliɛ wi sí muɔ ceri nɛ̀ láʔa wè nɛ́ muɔ puɔ nɛ̀ tárigɛ wolivi cɛnwɛ tiige nɛ̄ gè nɛ̀ sí ki taa ye wè felinugo wèʔ, bìli sí pe yé kíni nɛ̀ puu wolivi cɛnwɛ tiige wuulo bèle, nɛ́ ní pe tíimɛ wolivi tiige nɛ̄ gè, peli puɔlɔ niǐ màʔa bè puu sífaʔalaʔ lé ?

Isirayɛli wuulo pe suɔlɔ wori dè

25 Mi siinyɛninɛ, mi wè caa yeli puu kalarilɛ náà ni tíimɛ nīʔ, á kire 'laa yeli bèri ki sɔ̀ngí yeli 'cìlige nɛ̀ wìɛ wīʔ. Ki 'nyaa wuulo pálì nyɛ́nì pe funyɔ pàanni yè fúɔ bè pa taa wuulo pe nyuɔ ki- nyì pe sí suɔlɔ taa lè. 26 A kire 'kpíʔile gè, Isirayɛli wuulo pe mìɛni pe bé suɔ, majo bɛ̀ ki 'juu baa nī dè nɛ́ jo:

nī Suɔfɔli wi bága yiri,

wi bága pa siɛnkolilo

wàli bèle bè yige

siimɛ wuulo nī bèle.

27 Tire dī mi

ki siɛnrɛ dè,

a mi kɛ́nì pe kapiʔile

láʔala gèle.

28 Bɛ̀ Isirayɛli siɛnnɛ pe 'cíi piyè fɔ̀li nɛ̄ dè, kire ki 'tí piyē Kulocɛliɛ leguulo; kire sí yē yeli nyuɔmɔ wī. Gìi sí ki 'Kulocɛliɛ nyɛ́ni wuulo nyíɛnɛgɔnnɔ kúɔ lè, pe 'Kulocɛliɛ dɛ́ni wè pe tuuliɛyɛ yire kɛnmɛ nɛ̄ wī. 29 Nɛ̀ taʔa gíi nɛ̄, dáà Kulocɛliɛ wi 'kɛn dè, nɛ́ bàli wi 'yeri bèle, wiǐ ń'nɛ̀ je sùnʔɔrɔ kàduʔumɛʔ. 30 Ki 'nyaa faʔa gè, yeli bèle bèle, yeli cé cíi yeli sì lúʔu Kulocɛliɛ nɛ̄ wèʔ; nɛ̀ sí ki taa píra ŋáà nī wè Kulocɛliɛ wi 'nyinimɛ taa yeli nɛ̄ pe sìnluʔumɔ láara bè. 31 Kire tiʔɛ gáà nī gè, peli pe 'cíi pe wè lúru Kulocɛliɛ nɛ̄ wè, gìi ki bé tí Kulocɛliɛ wi- nyinimɛ taa yeli nɛ̄. Bɛ̀ Kulocɛliɛ wi 'nyinimɛ taa yeli nɛ̄ kɛnmɛ bíì nɛ̄ bè, bɛ̀ míɛni wi bága nyinimɛ taa pe nɛ̄. 32 Ki 'nyaa, gìi ki 'sìnluʔumɔ kúɔ bè, Kulocɛliɛ wi 'siɛnnɛ pe mìɛni pínɛ yalenugo nī wī, bé sí nyinimɛ taa pe mìɛni nɛ̄.

Kulocɛliɛ wire wī jáafɔli wè

33 Cí, Kulocɛliɛ lɔri ti tɔ̀ni yē nìʔɛrɛ ! Wi sícilimɛ bè nɛ́ wi kacɛ́nnɛ ní lè, láʔala wè ti nɛ̄ʔ ! Wi kàyuʔujuugɛnmɛ bè, siɛn sǐ gbɛ̀ kàa cɛ́n bè juu ki nīʔ. Nɛ̀ pínɛ wi koliyo yè siɛn sì yi cɛ́nʔ. 34 Bè ki juu kányiʔɛ nɛ̄ gè,

«Ŋáasiɛn wi 'jo wire 'Kàfɔli

wi sɔ̀ngirɔ cɛ́n dè ?

Ŋáasiɛn wi 'jo wire wī

wi yɛrifɔli wè ?

35 Ŋáasiɛn wi 'jo wire wi kíni

nɛ̀ wi kɛn nɛ́ yakaa ní,

béri ki caa wi- ki núgo

wire mɛ́ wè ?»

36 Nɛ́ ki cɛ́n wire nī yɛrɛ ti mìɛni ti 'yiri, wire fànʔa nɛ̄ yɛrɛ ti mìɛni yē bile, wire wori dī ti mìɛni dè. tiī wi wori lɛ̀gɛlɛ ke mìɛni nī ! .