Kakpiʔiligele 23

Pɔli wi 'siɛnrɛ sɔ́migɔ nɛ̀ juu kpolilo mɛ́ bèle

1 A wi 'nyapigele le gèle Zuufulo wuulo nī bèle nɛ̀ pe wéli, nɛ́ jo: «Mi siinyɛninɛ, mi 'mi sìi tánʔa wè nɛ́ funviige ní Kulocɛliɛ yiʔɛ mɛ́ gè fúɔ nɛ̀ pɛ́nì nɔ̀ pàngɛ gè.»

2 Kire lɛ̀lɛ nī lè, Ananiyasi wè, wè, a wi 'jo pe- Pɔli kpúɔn wè nyuɔ nɛ̄ gè, bìli pe 'puu baa wi táanni yérile bèle.

3 A Pɔli wi sí wi yɛ: «Kulocɛliɛ bága muɔ kpúɔn bínɛ, bɛ̀ muɔ yē jànvaafɔli wè. Muɔ 'tɛ́ni nɛ́ jo muɔ je kàyuʔu juu mi nɛ̄ bè yɛli nɛ́ ní dè, nɛ̀ sí ki taa muɔ nyɛ́nì Fànʔa Siɛnrɛ ti kafunnɔ kpíʔile bà muɔ 'mi kpúɔn wè.»

4 Bìli pe 'puu yérile wi táanni bèle a pe 'jo: «Nɛ̀ jo gáa ? Kulocɛliɛ kacuɔnrilɔ kàfɔli wire mɛ́ muɔ nɛ dàa nyu dè nɛ kanʔa mmɛ gè lé ?»

5 A Pɔli wi sí pe yɛ: «Mi siinyɛninɛ, mi sì cé ki cɛ́nʔ ga kacuɔnrilɔ kàfɔli wire wīʔ, á kire 'laa wè ti 'ki juu nɛ́ jo: Muɔ sì yɛli bè muɔ siɛnnɛ pe kàfɔli wáà tiʔɛlɛʔ.»

6 Bà sí Pɔli wi cé ki cɛ́n dí kàyuʔujuulo gboli ni 'puu, tílaga káà, , tílaga káà, bèle, a wi 'juu kpuʔɔ kàyuʔujuulo gboli ni yiʔɛ mɛ́ gè nɛ́ jo: «Mi siinyɛninɛ, Fariziɛn wī mi wè, mi siivɔlilɔ bèle Fariziɛnnɛ bīɛlɛ. Sɔ̀ngirɔ taʔadiʔɛ yē mi mɛ́ a mi 'tɛ́ngɛ ki nɛ̄ kúbilo pe bága nyɛ́ bè yiri; kire kɛnmɛ nɛ̄ kàyuʔu gáà kiī nɛ nyu mi nɛ̄ pàngɛ gè.»

7 Bà Pɔli wi 'siɛnrɛ dáà juu dè, a ti 'kàgbaaligɛ yɛ̀gɛ Fariziɛnnɛ nɛ́ Sadusiɛnnɛ sunʔɔmɔ nī bè, a gboli ni 'tíla. 8 Ki 'nyaa Sadusiɛnnɛ peli 'jo dí kúbilo nyɛ́yirile wè baaʔ, nɛ̀ pínɛ dí wè baaʔ, pìle wori wè baaʔ; Fariziɛnnɛ peli sí yē nɛ tɔ́ri nɛ́ ti mìɛni ní dè. 9 Kàgbaaligɛ ki tɔ̀ni nɛ̀ puu kpuʔɔ.

A pálì kɛ́nì yɛ̀ nɛ̀ yéri, Fariziɛnnɛ gboli wuulo pe 'puu, nɛ̀ juu gbɛ̀ngɛ nɛ́ jo: «Weli sì tuudiɛlɛ yafiɛn nyaa nàguɔ ŋáà nɛ̄ wèʔ. Dùʔɔ pìle láà ni 'juu nɛ́ wi ní yo, á kire 'laa dùʔɔ wáà wi 'juu nɛ́ wi ní yo, we 'cɛ́n lé ?»

10 Bà kapiɛngbuɔnnɔ kàfɔli kpuɔwɔ wi kɛ́nì kàgbaaligɛ nyaa gè kàa 'fàri ki nɛ̄ gè, a fíɛrɛ 'wi cò, pe fǎga ga de Pɔli píle wè pìye mɛ́ʔ, bè wi píle bè suluguʔ. A wi sí kapiɛngbuɔn tògo káà tórigo pe- sa wi suɔ pe mɛ́ pe wi tórigo kapiɛngbuɔnnɔ pe kpáakpuʔɔ mɛ́ gè.

11 Ki kpìɛnduu pìlige nī gè, a wi sɛ́nì yiri Pɔli kúrugu wè, nɛ̀ wi yɛ: «Mìɛ lìri ! Kɛnmɛ bíì nɛ̄ muɔ 'mi wori juu dè nɛ̀ yige kàʔa nī gè, ma sa ti juu bɛ̀ ma pínɛ kàʔa mɛ́ gè.»

Zuufulo pe 'nyuɔ le Pɔli nɛ̄ wè bè wi kpúu

12 Bà kpìɛnmɛ pi 'yɛ̀ nɛ̀ tuu bè, a Zuufulo pe 'nyuɔ pínɛ, nɛ̀ nɛ́ jo a peli sì kpúu wèʔ, peli fǎga luʔɔ gbuɔʔ bé nɛ́ ga jo bè lìiʔ. 13 Bàli pe cé ki dúu ŋáà le wè, pe cé tóri siɛnnɛ togosiin nɛ̄. 14 A pe 'kɛ́ kúrugu bèle, peli nɛ́ ní bèle, nɛ̀ sɛ́nì pe yɛ: «Weli nyɛ́nì kàli ki nɛ̄, nɛ́ jo weli sǐ lìiʔ, weli sǐ luʔɔ gbuɔʔ, fúɔ macɛn weli 'Pɔli kpúu wè. 15 Kire nɛ̄ yeli míɛni bèle, ye- siɛnrɛ pínɛ dè, yeli nɛ́ wuulo ní bèle, ye- sa wi náari kapiɛngbuɔnnɔ kàfɔli kpuɔwɔ mɛ́ wè, wi- wi tórigo náʔa yeli mɛ́; yeli je pa wi kele siʔɛ gèle bè wéli. Weli bèle weli nyɛ́nì gbòbori nɛ̀ kúɔ bè wi kpúu sɛ́ni wi- nɔ̀ náʔa wè.»

16 A ki 'nyaa Pɔli wi nàa pìige cé kpìlikpili ŋáà wi siɛnrɛ lúʔu dè. A wire 'kɛ́ baa kapiɛngbuɔnnɔ kpáakpuʔɔ mɛ́ gè nɛ̀ sɛ́nì ki siɛnrɛ juu dè Pɔli mɛ́ wè. 17 A Pɔli wi sí kapiɛngbuɔnnɔ dabataan (100) kàfɔli wáà yeri, nɛ̀ pɛ́nì wi yɛ: «Siɛnrɛ yē náʔa nàgabile náà mɛ́ lè bè juu kapiɛngbuɔnnɔ kàfɔli kpuɔwɔ mɛ́ wè; -wi kɔ́ri mari waa baa wi kúrugu.»

18 A kapiɛngbuɔnnɔ dabataan kàfɔli wi 'nàgabile kɔ́ri lè nɛ̀ sɛ́nì yiri kapiɛngbuɔnnɔ kàfɔli kpuɔwɔ kúrugu wè, nɛ́ wi yɛ: «Kasuulewe wè Pɔli wè, wi 'jo mi nàgabile náà kɔ́ri lè mi de báan náʔa muɔ mɛ́, dí siɛnrɛ yē wi mɛ́ bè juu muɔ mɛ́.»

19 A kapiɛngbuɔnnɔ kàfɔli kpuɔwɔ wi 'nàgabile cò lè kɔli nɛ̀ kɛ́ larigɛ nī, nɛ̀ sɛ́nì wi yúgo: «Gáa gī baa muɔ je juu m'mɛ́ ?»

20 A wi 'jo: «Zuufulo pe 'nyuɔ pínɛ bè pa muɔ yɛ mbànʔa ma Pɔli tórigo wè baa kàyuʔujuulo gboli mɛ́ lè, bè ki kpíʔile peli je sa wi kele sɔ́migɔ gèle bè siʔɛ wī. 21 Fǎga tí pe- muɔ buɔri nɛ́ tire níʔ ! Piyē baa nɛ̀ tóri siɛnnɛ togosiin nɛ̄, pe 'làri nɛ wi siri baa koligo nɛ̄ gè. Pe 'ki kàli nɛ́ jo peli sǐ lìiʔ, peli sǐ luʔɔ gbuɔʔ, fúɔ macɛn peli 'Pɔli kpúu wè wī. Bɛ̀ kiī ŋɔ̀ wè, pe 'gbòbori nɛ̀ kúɔ, muɔ nyasiɛnrɛ tire pe siri.»

22 A kapiɛngbuɔnnɔ kàfɔli kpuɔwɔ wi 'nàgabile tórigo lè, nɛ́ sí ti juu nɛ̀ gbɛ̀ngɛ wi nɛ̄, nɛ́ wi yɛ wi fǎga ti juu siɛn mɛ́ʔ, dàa wi 'juu wire mɛ́ dèʔ.

Pe 'Pɔli tórigo wè fànʔafɔli Feliisi tiʔɛ nī

23 A kapiɛngbuɔnnɔ kàfɔli kpuɔwɔ wi 'fali nɛ̀ kapiɛngbuɔnnɔ dabataan kàfɔlilɔ siin yeri nɛ̀ pɛ́nì pe yɛ: «Ye- kapiɛngbuɔnnɔ sirakeli (200) gbòbori ye yaʔa Sezare kàʔa kárimɛ, nɛ́ suɔnfɛbilɛ togotaanri nɛ́ kpɔrigɔ, nɛ́ sirakeli (200); pe- gbòbori pe yaʔa pìlige nī sínɛ lɛ̀gɛlɛ mɛ́ gèle. 24 Ye- suɔnyɔ míɛni gbòbori yi- líɛ wè wi- kɛ́ yanyige nɛ̄ kùlofɔli Feliisi tiʔɛ nī gè.»

25 A kapiɛngbuɔnnɔ kàfɔli kpuɔwɔ wi 'siɛnrɛ sɛbɛ nɛ̀ tórigo, nɛ́ jo:

26 «Mi nɛ muɔ síɛri Feliisi, 'yɛli muɔ nɛ̄, muɔ wī kùlofɔli wè. Mi wè, Kulodiwusi Lisiyasi wè, mi mi nyɛ́ni muɔ síɛri.

27 «Nàguɔ ŋáà wè, Zuufulo pe 'wi cò. Pe 'puu nɛ gbòborí bè wi kpúu wī, a mi sɛ́nì yiri nɛ́ kapiɛngbuɔn tògo ní, nɛ̀ wi suɔ pe mɛ́. Ki 'nyaa mi cé kɛ́nì ki lúʔu dí wuu wī. 28 Mi sí puu nɛ caa bè ki cɛ́n gíi nɛ̄ pe cé wi pari, kire nɛ̄ a mi sí wi tórigo baa pe mɛ́ lè. 29 Mi sí ki 'nyaa gìi nɛ̄ pe wi pari wè, pe koligo wori dī tire dè, nɛ̀ kire liɛlɛ yige baa, wi kàyuʔu kiì kire juuʔ pe- wi le kasuu nī wèʔ, bé nɛ́ cɛ ga jo wi 'yɛli nɛ́ kpúumɔ ní wèʔ. 30 Bà sí mi kɛ́nì ki cɛ́n dí dúu pe 'le nàguɔ ŋáà nɛ̄ wè níɛ wi siri wè, a mi sí nɛ caa bè wi tórigo baa muɔ mɛ́ fáari fáari, nɛ́ sí wi parifɔlilɔ yɛ bèle pe sa wi parigɔri juu wè baa muɔ mɛ́.»

31 Bà tunduro dáà ti 'kɛn kapiɛngbuɔnnɔ mɛ́ bèle, a pe 'Pɔli kɔ́ri wè pìlige nī nɛ̀ kɛ́ nɛ́ wi ní fúɔ Antipatirisi kàʔa mɛ́. 32 Ki kpìɛnduu gè a pe 'wi yaʔa suɔnfɛbilɛ mɛ́ bèle a pe 'kɛ́ nɛ́ wi ní, nɛ́ koli nɛ̀ pɛn kapiɛngbuɔnnɔ kpáakpuʔɔ mɛ́ gè. 33 Bà pe sɛ́nì jíin Sezare kàʔa nī gè a pe 'sɛbɛ kɛn wè fànʔafɔli mɛ́ wè nɛ́ sí Pɔli tìɛ wè wi nɛ̄. 34 A fànʔafɔli wi 'sɛbɛ wi siɛnrɛ wéli dè, nɛ́ kɛ́nì pe yúgo tɛ́nimɛ bíi wuu wī Pɔli wè. A pe 'wi yɛ Silisii tɛ́nimɛ wuu wī.

35 A wi 'Pɔli yɛ wè: «A muɔ parifɔlilɔ pe kɛ́nì pɛn bèle m'bé siɛnrɛ kɛn dè muɔ mɛ́.» A wi 'fali nɛ̀ jo pe- sa Pɔli tɛ́ngɛ wè kùlofɔli nī gè.