Kakpiʔiligele 24

Pe 'Pɔli kàyuʔu juu gè fànʔafɔli Feliisi tiʔɛ nī

1 Cɛnyɛ kogunɔ 'tóri kire kàduʔumɛ gè, a Ananiyasi wè, wè, a wi 'pɛn baa nɛ́ pálì ní, nɛ̀ fàri nàguɔ wáà nɛ̄; wi cé juu macɛn. Wire cé pɛn bè pa siɛnrɛ cáan dè nɛ̄ wī, pe 'puu nɛ wi ye Tɛrituliisi. Gìi nɛ̄ pe Pɔli cò wè, a ki siɛnnɛ bálì pe 'ki siɛnrɛ juu dè fànʔafɔli mɛ́ wè.

2 Bà pe 'Pɔli yeri wè nɛ̀ pɛ́nì tɛ́ngɛ wè, a Tɛrituliisi wi 'fali nɛ̀ séli nɛ nyu nɛ siɛnrɛ kíri dè nɛ tari Pɔli nɛ̄ wè, nɛ́ jo: «Weli fànʔafɔli Feliisi, muɔ fànʔa nɛ̄ gè, nɛ́ muɔ kpíʔilejɛ̀nmɛ kɛnmɛ nɛ̄ bè, kele sáa 'yiʔɛ kùlo nī lè, a siɛnnɛ pe 'kò yanyige nɛ̄ kpuʔɔ. 3 We kàfɔli, ti 'yɛli muɔ nɛ̄; weli 'muɔ kacɛ̀ngɛ cɛ́n gè tiɛrɛ ti mìɛni nī lɛ̀gɛlɛ ke mìɛni nī, weli nɛ muɔ síɛri nɛ muɔ kanʔa barigɛ nɛ̄. 4 Bè sí siɛnrɛ yaʔa dè ti- puu weride mi fǎga ní ga muɔ cò dɛ́ngɛ bè mɔgɔ wè, mi nɛ muɔ fiɛn ma líiye cáan ma lúʔu weli mɛ́ cɛ̀, majo mɛni weli 'muɔ cɛ́n muɔ fungo ki 'nyuɔ gè.

5 «Ki 'nyaa nàguɔ ŋáà wè, weli 'ki ciʔige nɛ̀ nyaa wiī bɛ̀ yaabiimɛ tíɛlɛ. Wiī nɛ Zuufulo pe mìɛni súguru nɛ yɛ̀gí duniya tiɛrɛ nī dè; wuulo gboli ni yiɛginiwɛ wáà cɛ wī. 6 Wi yé cɛ́nì sori nɛ̀ je Kulocɛliɛ núʔɔ gè, a weli sí wi cò. 7 [Kapiɛngbuɔnnɔ kàfɔli wè Lisiyasi wè, wire wi 'wi píle nɛ̀ suɔ weli mɛ́ fànʔa nɛ̄.] 8 A muɔ tíimɛ kɛ́ni wi yúgo wè, muɔ bé ti nyaa, gìi nɛ̄ weli nɛ wi túngu wè.»

9 A Zuufulo pe 'taʔa siɛnrɛ dáà nɛ̄ dè, nɛ̀ jo dí bɛ̀ ti yē.

Pɔli wi 'wi wori juu dè fànʔafɔli Feliisi yiʔɛ mɛ́ gè

10 A fànʔafɔli wi sí siɛnrɛ kɛn dè mɛ́ wè nɛ́ jo wi- juu. A Pɔli wi 'jo: «Mi 'ki cɛ́n ki 'yiʔɛlɛ nyuɔ kúɔ, muɔ wī ma nyɛ́ni kùlo náà ni kàyuʔu nyu gè; kire nɛ̄ m'bé mi wori juu dè bè láʔa káaliyɛ fùn, bè mi yirimɛ tiɛlɛ tìɛ lè. 11 Muɔ tíimɛ 'ki cɛ́n, kiì fìɛ tóri cɛnyɛ kiɛ nɛ́ siin nɛ̄ʔ, bà mi 'kɛ́ kàʔa mɛ́ gè nɛ̀ sɛ́nì Kulocɛliɛ gbùʔɔrɔ wè. 12 Siɛn sì kɛ́nì mi nyaa mi nɛ nyu nɛ kìí nɛ́ wàa níʔ baa Kulocɛliɛ mɛ́ gèʔ, siɛn míɛni sì fìɛ mi nyaa mi nɛ siɛnnɛ súguru bèle nɛ yɛ̀gí nī yèʔ, bé nɛ́ ga jo kàʔa nī gèʔ. 13 Siɛnnɛ bálì bèle, dàa pe nyu nɛ tari mi nɛ̄ dàa dè, piyě gbɛ̀ ki cɛ́n bè ki fílige juuʔ. 14 M'bé sí mi wori juu dè bè láʔa muɔ nɛ̄. gè, gàa siɛnnɛ pe 'jo kojɛ̀ngɛ bɛ̀ʔ gè, kire nī mi yē, nɛ Kulocɛliɛ gbùʔɔrɔ́ wè, weli tobilo pe Kulocɛliɛ wè, nɛ́ sí tɛ́ngɛ siɛnrɛ díì mìɛni ti 'tìɛ wè, nɛ́ kele gílì gīɛlɛ baa sɛbɛgɛlɛ pe sɛbɛlɛ nī bèle. 15 Sɔ̀ngirɔ taʔadiʔɛ yē m'mɛ́ Kulocɛliɛ nɛ̄ wè, nɛ̀ pínɛ ki sɔ̀ngirɔ taʔadiʔɛ kiī pe mɛ́ peli tíimɛ bàli bèle, a pe 'tɛ́ngɛ ki nɛ̄ dí kúbilo pe siɛnsinminɛ bèle nɛ́ pe siɛnpiile ní bèle, pe bága koli bè nyɛ́. 16 Kire nɛ̄ mi nɛ ki cìʔilé bè puu cìiliwe mi fungo nī gè Kulocɛliɛ yiʔɛ mɛ́ gè nɛ́ siɛnnɛ pe mìɛni yiʔɛ mɛ́ gè.

17 «Yiʔɛlɛ nìʔɛgɛlɛ 'tóri kire kàduʔumɛ gè, a mi 'koli nɛ̀ pɛn Zerizalɛmi kàʔa mɛ́ gè nɛ̀ pɛ́nì kpuʔɔrɔ kpíʔile nɛ́ wali ní mi kùlo wuulo mɛ́ bèle, nɛ́ sí kɔ̀n Kulocɛliɛ mɛ́ wè. 18 Kire mi 'puu nɛ kpínʔini á pe sɛ́nì mi nyaa baa Kulocɛliɛ Gbùʔɔrɔsaʔa nī gè, a mi 'mi jígemununɔ kakuɔrɔ kúɔ dè; siɛnniʔɛnɛ sì puu baaʔ, bé nɛ́ cɛ ga jo kàgbaaligɛʔ.

19 «Nɛ̀ sí ki taa, Zuufulo pálì 'puu baa, Azii tɛ́nimɛ wuulo pe 'puu, mi 'ki nyaa majo peli pe cé yɛli bè puu náʔa gè bè gbɛ̀ kàa juu muɔ yiʔɛ mɛ́ gè mi parigɛ ki wori nɛ̄ dè, a ki yē yakaa yē baa pe- mi pari ki wori nɛ̄ dè wè. 20 A kire 'laa wè, siɛnnɛ bálì bèle, pe- ki juu wêli, gíi pe 'nyaa kacuʔɔlɔ lè mi kɔli mɛ́ gè, bà mi 'puu baa yiʔɛ mɛ́ gè ? 21 Siɛntiʔɛ nigbe mi cé juu, dùʔɔ kire kɛnmɛ nɛ̄ pe 'mi pari. Ki 'nyaa mi cé yɛ̀ nɛ̀ yéri pe yiʔɛ mɛ́ gè nɛ́ ti juu kpuʔɔ nɛ́ jo: ‹Kúbilo pe nyɛ́nɛ wori dáà mi 'juu dè, kire kɛnmɛ nɛ̄ yeli nɛ kàyuʔu nyu mi nɛ̄ pàngɛ gè.› »

22 Feliisi wire cé sí Zezi koligo cɛ́n gè cɛ̀ngɛ, a wi 'kàyuʔu cɛngɛ sìʔɛrɛ gè, nɛ́ sí pe yɛ: «A kapiɛngbuɔnnɔ kàfɔli kpuɔwɔ wi kɛ́nì tìgi náʔa wè, Lisiyasi wè, m'bé nɛ́ gbɛ̀ kàa juu yeli kàyuʔu ki siɛnrɛ nī dè.» 23 A wi 'kapiɛngbuɔnnɔ dabataan kàfɔli yɛ wè wi- Pɔli le wè kasuu nī wè, wi sí ki yaʔa ki- puu wi mɛ́ yɔ́rigɔ, wi fǎga cíiʔ a wi wuu wáà je sa yakaa kpíʔile wi mɛ́ wèʔ.

Feliisi wi 'yúgogolo wáa Pɔli mɛ́ wè

24 Cɛnyɛ yáà kɛ́nì tóri yè, a Feliisi wi 'pɛn wire nɛ́ Durusiili, wi cuɔ wè, Zuufuwo wi 'puu. A wi 'tun a pe sɛ́nì kɔ́ri wè baa kasuu nī wè, nɛ̀ pɛ́nì wi wori lúʔu dè dàa ti 'puu wi mɛ́ bè juu tɛ́ngɛlɛ wori nɛ̄ dè Zezi nɛ̄ wè. 25 Bà Pɔli wi 'siɛnrɛ séli dè níɛ ki nyu dí siɛn 'yɛli bèri sínmɛ koligo tári wè, nɛ́ muɔ siɛn ma jáa ma mìɛ cò wè, dí kàyuʔu káà nɛ we siri wè, a ti 'fíɛrɛ cò Feliisi nɛ̄ wè, a wi 'Pɔli yɛ wè: «Ti bé yɛli bɛ̀ pàngɛ gè; te waa, a mi kɛ́nì lɛ̀lɛ láà taa m'bé muɔ yeri.»

26 Wi 'puu nɛ sɔ̀ngí nɛ pínɛ nɛ̀ jo dùʔɔ Pɔli wi bé wali kɛn wire mɛ́, kire kɛnmɛ nɛ̄ wi 'puu nɛ wi yeri nɛ báan túɔn túɔn nɛ́ báan nɛ nyu nɛ́ wi ní.

27 Yiʔɛlɛ siin kɛ́nì tóri gèle, a fànʔafɔli wáà 'tɛ́ni fànʔa nɛ̄ gè nɛ̀ Feliisi wi larigɛ líɛ gè, pe 'puu nɛ wi ye Pɔrisiyusi Fɛsitusi. Wire 'puu nɛ ki caa bè míʔɛ taa Zuufulo mɛ́ bèle, a wi sí Pɔli yaʔa wè baa tɔ́nwɔ kasuu nī wè.