ZEZI WI 'TANʔA NƐ KƐ ZERIZALƐMI KAʔA MƐ GE
(19.1–20.34)
Zezi wi 'juu ceyaʔa wori nɛ̄ dè
19
1 Bà Zezi kɛ́nì siɛnrɛ dáà juu dè nɛ̀ kúɔ dè,
a wi 'yiri Galile tɛ́nimɛ nī bè,
nɛ̀ kɛ́ Zude tɛ́nimɛ nī Zurudɛn cáʔa kúrugu gè.
2 A siɛnniʔɛmɛ 'líɛ nɛ̀ taʔa wi kúrugu,
a wi 'yaala puʔɔ bèle baa ki tiʔɛ nī gè.
3 A Fariziɛnnɛ pálì 'taʔa wi kúrugu baa,
nɛ̀ sɛ́ni wi nyuɔ caa,
nɛ́ jo:
«Ki 'yɛli lé nàguɔ gbɛ̀ wi cuɔ yaʔa wè lé,
a cɛliwɛ wi 'kaala láà fáala kpíʔile lè ?»
4 A Zezi wi sí pe yɛ:
«Yeli sì ki 'nyaa baa Kulocɛliɛ siɛnsɛbɛrɛ nī dè léʔ,
dí sélimɛ nɛ̄ bè wi cé pe faan nàguɔ nɛ́ cɛliwɛa lé ?
5 Nɛ́ sí jo,
dí:
‹Kire nɛ̄ a nàguɔ cɛliwɛ líɛ wè,
wire nɛ́ wi cuɔ ní wè pe bé bìɛ bè tóri wire nɛ́ wi tuu nɛ́ wi yàa nɛ̄ wè;
wi bé wi cuɔ cò wè kányiʔɛ ní,
pe siin pe bé puu cetinnɛ nigbeb.›
6 Kire nɛ̄ ki ní wè tíin pe- jo piyē siin wīʔ,
ki 'nyaa piyē cetinnɛ nigbe wī.
A Kulocɛliɛ sí gìi pínɛ gè,
siɛn fǎga ki láʔa kìi nɛ̄ʔ.»
7 A pe 'jo:
«Gáa nɛ̄ Misa wi sí cé ki juu nɛ̀ gbɛ̀ngɛ nɛ́ jo nàguɔ wi- ceyaʔa sɛbɛ kpíʔile wi kɛn wi mɛ́,
wi sí wi yaʔac ?»
8 A wi 'pe yɛ:
«Yeli fungbɛnyɛ yire kɛnmɛ nɛ̄ Misa wi cé yéri ki nɛ̄ yeri yeli cɛlilɛ yɛri bèle.
A kire 'laa wè,
sélimɛ nɛ̄ bè,
bà bɛ̀ʔ ki 'puuʔ.
9 M'bé sí ki juu yeli mɛ́,
a nàguɔ ŋíì 'wi cuɔ yaʔa wè,
a kiì nyaa nàjaara kɛnmɛ nɛ̄ wī wèʔ,
nɛ́ koli nɛ̀ wàa líɛ wè,
wi 'ceyuugo kpíʔile.»
10 A pìtɛnmɛnɛ pe 'wi yɛ:
«A ki yē bɛ̀ nàguɔ tánʔagɛnmɛ pi 'yɛli bè puu nɛ́ wi cuɔ ní wè,
ʔá,
ki wè pɔ́rigɔ nàguɔ cɛliwɛ tɛ́ngɛʔ.»
11 A Zezi wi sí pe yɛ:
«Siɛnnɛ pe mìɛni wè jàʔá bè fɔ̀li siɛnrɛ dáà nɛ̄ dèʔ,
fúɔ macɛn bìli mɛ́ kire nyɛ́nì kɛn gè.
12 Nɛ̀ taʔa gíi nɛ̄,
nàguɔmɔfunfɔlilɔ pálì yē nɛ sii nɛ́ pe nàgbiɛnrɛ ní dè wī;
nàguɔmɔfunfɔlilɔ pálì sí yē baa,
siɛnnɛ pe cî peli nàguɔmɔ yige bè pe nī.
Nàgbiɛnnɛ pálì sí ní yē baa,
peli nɛ̂ pìye yaʔa nàgbiɛnnɛ Nyìʔɛnɛ Kùlofɔligɔ kire kɛnmɛ nɛ̄.
A ŋìi bé jáa bè yéri mi siɛnrɛ dáà nɛ̄ dè,
wi- yéri ti nɛ̄.»
Zezi wi 'diba taʔa pìile nɛ̄ bèle
13 A siɛnnɛ pe 'pɛn nɛ́ pìile ní wi kúrugu,
wi pa kiyɛ taʔala yè pe nɛ̄ bé náari pe mɛ́.
A pìtɛnmɛnɛ pe 'yɛ̀ nɛ nyu bìli nɛ̄ pe 'puu nɛ pìile kɔ́ri bèle nɛ báan bèleʔ.
14 A Zezi wi sí pe yɛ:
«Ye- pìile yaʔa bèle peri báan mi kúrugu,
ye fǎri pe cìráʔ.
Nɛ̀ taʔa gíi nɛ̄,
siɛnnɛ bílì kɛnmɛ bī bɛ̀ pe tíɛlɛ bèle,
peli wuʔu gī Nyìʔɛnɛ Kùlofɔligɔ gè.»
15 A wi 'kiyɛ taʔala yè pìile nɛ̄ bèle,
nɛ́ yiri baa ki tiʔɛ nī gè nɛ̀ kɛ́.
Nàgapunwɔ lɔrifɔli wori dè
16 A nàgapunwɔ wáà 'pɛn Zezi kúrugu nɛ̀ pɛ́nì wi yɛ:
«Tɛnmɛfɔli,
kacɛ̀nnɛ níi mi 'yɛli bè kpíʔile bé sí bànguɔ sìi taa wè ?»
17 A Zezi wi 'wi yɛ:
«Gáa nɛ̄ muɔ nɛ mi yúgo nɛ́ gìi gī cɛ̀ngɛ gè ?
Wàa nigbe wī cɛ̀nwɛ wè.
A muɔ sí nɛ ki caa bè jíin bànguɔ sìi nī wè,
mari tári Kulocɛliɛ kajuʔulo nɛ̄ gèle.»
18 A wi 'jo:
«Gíli gèle ?»
A Zezi wi 'wi yɛ:
«Ma fǎga siɛn kpúuʔ,
ma fǎga ceyuugo kpíʔileʔ,
fǎga kàyuugo kpíʔileʔ,
ma fǎga finɛ daʔa muɔ siɛnnyɛni nɛ̄ʔ.
19 Te muɔ tuu nɛ́ muɔ yàa kpóri wèd;
má muɔ siɛnnyɛni woli yaʔa lè ni- muɔ dɛ́ni kɛnmɛ bíì nɛ̄ muɔ 'mìɛ dɛ́ni wèe.»
20 A nàgapunwɔ wi 'jo:
«Mi 'dàa ti mìɛni kpíʔile nɛ̀ fori ti nyɔgɔlɔ nī gèle,
gíi ki ní nɛ̀ kò cígini ?»
21 A Zezi wi 'wi yɛ:
«A muɔ nɛ caa bè puu cɛ̀nwɛ bè paʔa wè,
te waa ma sa muɔ kɔliyɛrɛ pári dè,
ma wali kɛn wè fɔ̀ngɔfɔlilɔ mɛ́,
bɛ̀ muɔ bé lɔri taa nyìʔɛnɛ nī lè.
Píra ŋáà nī wè má pa taʔa mi nɛ̄.»
22 Bà nàgapunwɔ ŋáà wi 'siɛnrɛ dáà lúʔu dè,
a wi 'láʔa nɛ̀ kɛ́ funbiɛnrɛ ní;
ki 'nyaa lɔri 'puu wi mɛ́ nìʔɛrɛ.
23 A Zezi wi sí ki juu wi pìtɛnmɛnɛ mɛ́ bèle nɛ́ pe yɛ:
«M'bé ki juu yeli mɛ́ kányiʔɛ nɛ̄,
kiī gbɛ̀ligɛ lɔrifɔli mɛ́ wi- jiin Nyìʔɛnɛ Kùlofɔligɔ nī gè díɛ !
24 Nɛ̀ pínɛ m'bé ki juu yeli mɛ́,
kiī fáari nyuʔɔmɔ mɛ́ wi- sùuri mísɛni kàwiile nī,
nɛ̀ tóri lɔrifɔli nɛ̄ wi sa jiin Kulocɛliɛ Kùlofɔligɔ nī gè.»
25 Bà pìtɛnmɛnɛ pe 'siɛnrɛ dáà lúʔu dè a ki 'laamɛ cúʔɔ pe nī kpuʔɔ,
a pe 'jo:
«A ki sí yē bɛ̀,
ŋáasiɛn sí wi bága sa suɔ ?»
26 A Zezi wi 'nyapigele le gèle pe nī nɛ̀ pe wéli nɛ́ pe yɛ:
«Siɛnnɛ mɛ́ bèle,
kiǐ gbɛ̀ kpíʔileʔ,
nɛ̀ sí ki taa yakaa sì Kulocɛliɛ jáaʔ.»
Sàri ŋíì Zezi wuulo pe bága taa wè
27 A Piɛri sí fali nɛ̀ juu sɛni,
nɛ́ jo:
«Ma sí ki wéli,
weli bèle,
weli 'weli yɛrɛ ti mìɛni yaʔa nɛ́ taʔa muɔ nɛ̄.
Gáa weli bága sa taa ?»
28 A Zezi wi 'pe yɛ:
«M'bé ki juu yeli mɛ́ kányiʔɛ nɛ̄,
yeli bálì ye 'taʔa mi kúrugu bèle,
a duniya wi kɛ́nì yiʔɛ fɔnwɔ wè,
á Siɛn Pùɔ wi 'tɛ́ni wi kpuɔmɔ kùlofɔlilɔ kácunʔɔ nɛ̄ gè,
yeli míɛni bèle yeli bé tɛ́ni fànʔafɔlilɔ kácuɔnyɔ kiɛ nɛ́ siin nɛ̄,
bèri kàyuʔu nyu Isirayɛli saaya tùluyo kiɛ nɛ́ siin nɛ̄ yè.
29 «Nɛ̀ pínɛ a siɛn ó siɛn 'wi saʔa,
nɛ́ wi siinyɛninɛ nàguɔlɔ nɛ́ cɛlilɛ,
nɛ́ wi tuu,
nɛ́ wi yàa,
nɛ́ wi pìile,
nɛ́ wi siiye yaʔa mi míʔɛ kire kɛnmɛ nɛ̄ bè,
siɛn wi bé ki feliye dabataan taa,
bé míɛni bànguɔ sìi taa wè kɔrigɔ.
30 Nɛ̀ sí ki taa nìʔɛnɛ yē pélile pàngɛ gè,
pe nìʔɛnɛ bága puu kàdotɔnminɔ,
dí kàdotɔnminɔ nìʔɛnɛ sí puu pélile.»