Ye- Yewe gbùʔɔrɔ gè
135
1 Ye‑ Yewe gbùʔɔrɔ wè !Ye‑ Yewe míʔɛ gbùʔɔrɔ gè !
Yewe baakuɔlɔ yo, ye‑ wi gbùʔɔrɔ,
2 yeli bálì yiyē nɛ baara kúu dè Yewe saʔa nī gè,
weli Kulocɛliɛ saʔa ki dàliyɛ nɛ̄ yè !
3 ʔaan, ye‑ Yewe gbùʔɔrɔ wè !
Nɛ́ ki cɛ́n Yewe wi 'nyuɔ;
yeri yakpuɔnrɔ kpúɔn dè, yeri wi míɛtanʔa ŋú gè.
4 Nɛ́ ki cɛ́n Yewe nyɛ́nì Yakuba nyíɛnɛ nɛ̀ kɔ̀n,
ʔaan, wi nyɛ́nì wi siimɛ nyíɛnɛ bè nɛ̀ kɔ̀n, Isirayɛliyé bèle,
pe‑ kò wire wuuloa.
5 Mi wè, mi 'ki cɛ́n Yewe wi 'kpúʔɔ,
ʔaan, weli Kàfɔli wi 'kpúʔɔ nɛ̀ tóri kulocɛlɛlɛ pe mìɛni nɛ̄.
6 Gàa ki mìɛni Yewe nɛ caa gè, wi nɛ̂ ki kpíʔile,
nyìʔɛnɛ nī lè nɛ́ dàala nɛ̄ lè,
kuʔɔjii luɔyɔ nī yè nɛ́ yi luɔyɔ sícuuyo yi mìɛni ní yè.
7 Wire wi nɛ̂ kàsadibarɛ yɛ̀gɛ dè dàala láʔala nɛ̄ lè,
wi nɛ̂ nyìʔɛnɛ nyíʔɛnimɛ tìrige bè nɛ́ kàsaʔa ní gè,
wi nɛ̂ káfaligɛ yige gè ki tɛ́ngɛdiɛyɛ nī yè baa wi yé ki tɛ́ngɛ gè.
8 Wire wī Ezipiti kùlo jaafɔpelile kpúɔn bèle nɛ̀ kpúu,
siɛnnɛ wuulo bèle fúɔ nɛ̀ sɛ́ni nɔ̀ yajuuro wuulo ní bèleb.
9 Ezipiti kùlo yo, Yewe nyɛ́nì fìɛlɛ kpíʔile nɛ́ kakpoliyo ní yeli sunʔɔmɔ nī bè,
Farawɔn nɛ̄ wè nɛ́ wi baakuɔlɔ pe mìɛni ní bèlec.
10 Wire wi 'kùlogolo nìʔɛgɛlɛ kpúɔn gèle
nɛ́ kùlofɔlilɔ kpúu bèle, bàli pe 'puu ŋɔri ní dèd.
11 Peli pe 'puu Sikɔn, Amɔriyé kùlofɔli wè,
nɛ́ Ɔgi ní wè, Basan kùlofɔli wè,
nɛ́ Kanaa kùlofɔlilɔ pe mìɛni ní bèlee.
12 A wi 'pe dàʔala kɛn gèle kɔrigɔ wi siɛnnɛ mɛ́ bèle,
Isirayɛliyé bèle,
kire ga buu ke‑ kò pe wuʔulo.
13 Yewe yo, muɔ míʔɛ kiī baa súuri lɛ̀lɛ ó lɛ̀lɛ nī !
Yewe, siɛnnɛ pe béri sɔ̀ngí de taʔa nɛ́ muɔ míɛkpuʔɔ ní gè
kɛ̀ngɛlɛ ke mìɛni nī.
14 Yewe nɛ̂ tànʔa kɛn wi siɛnnɛ mɛ́ bèle,
wiī nyinidaaguugofɔli wi baakuɔlɔ mɛ́ bèlef.
15 Kùlogolo ke yasunro dè,
pe 'ti kpíʔile nɛ́ walifiiwe ní wè nɛ́ tiɛ ní wī,
siɛn kɔli yakpiʔilide dīg.
16 Nyuɔyɔ yē ti nɛ̄, ti sí wè gbɛ̀ni nyuʔ;
nyapigele yē ti nɛ̄, ti sí wè nɛ nyaʔaʔ;
17 ngbúʔulo yē ti nɛ̄, nɛ̀ ki yaʔa ti wè gbɛ̀ni lúruʔ;
ŋɔ́nɔ yafiɛn wè yigi ti nyuɔ nī gèʔ !
18 Bàli pe ti kpínʔini dè, nɛ́ bàli mìɛni pe pe sɔ̀ngirɔ tari dè ti nɛ̄ dè,
piyē bɛ̀ ti tíɛlɛ.
19 Isirayɛli siɛnnɛ yo, yeri Yewe kpóri wè !
Yeli bèle kacuɔnrilɔ bèle, Arawɔn siimɛ bè, yeri Yewe kpóri wè !
20 Yeli bèle Levii siimɛ nī bè, yeri Yewe kpóri wè !
Yeli bálì ye fìʔɛ́ Yewe nɛ̄ wè, yeri Yewe kpóri wè !
21 Yewe wi 'yɛli nɛ́ gbùʔɔrilɔ ní, bè ki líɛ baa Siyɔn nyagurugo nɛ̄ gè,
Yewe ŋáà wī kòriwo Zerizalɛmi kàʔa nī gè.
Ye- Yewe gbùʔɔrɔ wè !