Ye- yeli sɔ̀ngirɔ taʔa dè Yewe nɛ̄
130
1 Fundaanra tánʔagbuɔlɔ ŋúnugo gī.
Mi wuʔɔgɔ laamɛ nī bè, a mi 'kòkuulo wáa muɔ kúrugu, Yewe !
2 Kàfɔli, ‑mi kòkuulo lúʔu lè !
Ma sí líiye cáan bà mi nɛ muɔ fiɛn wè !
3 A ki 'nyaa muɔ Yewe wè,
a muɔ yé je weli kolimɔ cò bè weli kúrugu wè,
Kàfɔli, ŋáa wi cî gbɛ̀ yéri muɔ yiʔɛ mɛ́ gè ?
4 Nɛ̀ ki yaʔa muɔ sí wī ma nyɛ́ni ki yɛri siɛn nɛ̄,
kire ga buu siɛnnɛ peri fìʔɛ́ muɔ nɛ̄.
5 Mi wè, mi sɔ̀ngirɔ tiī Yewe nɛ̄, mi nɛ wi siri mi fungo ki mìɛni ní,
mi 'mi sɔ̀ngirɔ taʔa dè wi siɛnrɛ nɛ̄ dè.
6 Mi nɛ Kàfɔli siri wè nɛ̀ tóri kàʔa ki wélifɔli nɛ̄ wè
ŋàa wi cî nɛ kpìɛnduumɛ siri bè,
ʔaan, nɛ̀ tóri kàʔa wélifɔli nɛ̄ ŋáà wi cî nɛ kpìɛnduumɛ siri bè.
7 Isirayɛli siɛnnɛ yo, ye‑ yeli sɔ̀ngirɔ taʔa dè Yewe nɛ̄,
nɛ́ ki cɛ́n wire mɛ́ bànguɔ dɛ́nigɛ ki yē, wire yē gbòboriyaʔawa súuri bè yeli fùgu bè suɔ,
8 wire wi bága Isirayɛli siɛnnɛ suɔ bèle bè yige
pe kolimɔ kele ke mìɛni nīa.