Yanyige ki- puu Zerizalɛmi nī wè
122
1 Fundaanra tánʔagbuɔlɔ ŋúnugo gī. Dawuda wuʔu gī.
Mi yē fundaanra nɛ̄ lɛ̀lɛ líì nī pe 'mi yɛ:
«Weri waa Yewe saʔa mɛ́ gè !»
2 Zerizalɛmi yo, weli tɔliyɔ yi 'yéri muɔ wìʔile nɛ̄ gèle.
3 Zerizalɛmi kàʔa ki 'sɔ́migɔ nɛ̀ faan nɛ̀ taanni kìi nɛ̄ nɛ̀ kìi cò.
4 Baa kire tiʔɛ nī saaya tùluyo yi waa, Yewe saaya tùluyo yè,
dàa dī Isirayɛli nī wè, bèri Yewe síɛri wèa, nɛ̀ yɛli nɛ́ nyakungɛngɛ siɛnrɛ ní dè.
5 Baa kùlofɔlilɔ kácuɔnyɔ yi yē,
yire nɛ̄ Dawuda siimɛ piī tɛ́nibɛ bè kàyuʔu juu gè.
6 Yeri náari Zerizalɛmi yanyige wuʔu nɛ̄ gè, ye‑ jo:
«Zerizalɛmi, bàli 'muɔ dɛ́ni bèle, pe‑ puu ŋɔ́daala nɛ̄ !
7 Ki 'yɛli yanyige ki‑ puu muɔ gunliriye sunʔɔmɔ nī bè,
dí ŋɔ́daala sí puu míɛni muɔ nàkpaanya nī yè !»
8 Mi siinyɛninɛ peli kɛnmɛ nɛ̄, nɛ́ mi kàdɔnminɔ ní bèle,
m'bé ki juu bé jo: «Yanyige‑ ki puu muɔ nɛ̄ !»
9 Yewe weli Kulocɛliɛ wi saʔa kire kɛnmɛ nɛ̄ bè,
m'béri kacɛ̀ngɛ caa gè muɔ mɛ́, Zerizalɛmi.