Ŋúnuyɔ 111

Weri Yewe gbùʔɔrɔ́ wè wi kakpoliyo kɛnmɛ nɛ̄ bè

1  !

M'béri wè nɛ́ mi fungo ki mìɛni ní,

baa siɛnsinminɛ gboli nī lè nɛ́ míɛni siɛnniʔɛmɛ tògo nī gè.

2 Yewe kakpiʔiligele kiyē kpoligolo,

bàli mìɛni ke 'pe dɛ́ni gèle, piyē nɛ sɔ̀ngí ke nɛ̄.

3 Wi kakpiʔiligele kiyē nɛ wi nyíʔɛnimɛ nɛ́ wi kpuɔmɔ tìí bè,

wi sínnɛ niī nɛ mɔgi lɛ̀lɛ ó lɛ̀lɛ nī.

4 Wi nyɛ́nì ki kpíʔile nɛ̀ yaʔa siɛnnɛ peri sɔ̀ngí de taʔa

nɛ́ wi kakpoliyo wuʔu ní gè.

Yewe wiī funnyigefɔli nɛ́ ní nyinidaaguugofɔli.

5 Wiī nɛ yaliire kanʔa bàli mɛ́ pe fìʔɛ́ wi nɛ̄ wè;

wiī nɛ sɔ̀ngí nɛ taʔa nɛ́ wi ní gè lɛ̀lɛ ó lɛ̀lɛ nī.

6 Wi yé wi ŋɔri tìɛ dè wi siɛnnɛ nɛ̄ bèle

nɛ̀ jo wire bé kakpoliyo kpíʔile pe mɛ́,

kire ki yé puu bè kùlo kɛn lè pe mɛ́

nàa ni yé puu siɛnfeliye yáà woli lè.

7 Kele gálì wi kiyɛ yi 'kpíʔile gèle,

ke yē kányiʔɛ nɛ́ ní wi kasingele;

wi kacinʔɛnɛ kele ke mìɛni yē tɛ́ngɛlɛ wuʔulo.

8 Ke 'sɔ́migɔ nɛ̀ tɛ́ngɛ lɛ̀lɛ ó lɛ̀lɛ nī,

kire ga buu weri lúru ke nɛ̄

bèri ke kpínʔini nɛ́ kányiʔɛ ní nɛ́ sínnɛ ní.

9 Wi nyɛ́nì wi siɛnnɛ suɔ bèle, a wi 'nyuɔ kún gè nɛ̀ kɛn pe mɛ́;

ki nyakungɛngɛ kiī baa lɛ̀lɛ ó lɛ̀lɛ nī.

Wi míʔɛ kiī tiɛlɛ fùn nɛ́ ní fíɛrɛwuʔu.

10 Sícilimɛ pi sélidiʔɛ kire gī bèri fìʔɛ́ Yewe nɛ̄ wè;

bàli pe mìɛni pe 'wi kacinʔɛnɛ kele cò gèle, sícilige yē pe mɛ́.

Yewe tiī baa lɛ̀lɛ ó lɛ̀lɛ nī.