Bàli pe finɛnɛ nɛ tari mi nɛ̄ wè, Yewe wi- pe sári
109
1 Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Kulocɛliɛ yo, muɔ ŋáà mi nɛ gbùʔɔrɔ́ wè, ma fǎga pìiri mmɛ gè !
2 Nɛ́ ki cɛ́n, siɛnpiile piyē nɛ finɛnɛ nɛ tari mi nɛ̄;
pe mi wori nyu dè nɛ́ pe míɛcuʔɔ nyigele ní gèle.
3 Pe 'mi màʔa nɛ̀ suʔu nɛ́ pe parimɛ siɛnrɛ ní dè,
nɛ́ túngu nɛ́ mi ní nyùgo fùn.
4 Pe 'mi dɛ́ni, kire nɛ́ ki mìɛni ní piyē nɛ tíri mi nɛ̄.
Mi wè, mi nɛ waa yiʔɛmɛ nɛ́ mi náarigɛ ní gè.
5 Piyē nɛ kapiʔi kpínʔini nɛ kacɛ̀ngɛ fuʔɔ tɔ́ngi gè,
piyē nɛ parimɛ kpínʔini mi nɛ̄ nɛ mi dɛ́nigɛ fuʔɔ tɔ́ngi gè.
6 Piyē nɛ ki nyu nɛ́ jo: «Ye‑ siɛnpiiwe yɛ̀gɛ wi kúrugu,
dí parifɔli sí yéri wi kàliige mɛ́ gè !»
7 A pe 'kɛ́nì kàyuʔu juu gè wi nɛ̄ wè, siɛnrɛ ti‑ tuu wi nɛ̄,
dí wi náarigɛ ki‑ sí puu kapiile wi nɛ̄ !
8 Wi sìi cɛnyɛ yi sí cɛ́ri,
nɛ̀ pínɛ, wàa sí wi larigɛ líɛ gè baara nī dèa !
9 Wi pìile pe‑ kò círile, dí wi cuɔ wi‑ sí kò lakicuɔ !
10 Wi pìile pe‑ kò lefaaliyɛ bè puu de náari,
peri pe yaliire náari de liilige pe saaya gunduuro nɛ̄ dè.
11 Dí fuʔɔfɔli wi‑ sí wi yɛrɛ ti mìɛni cò dàa dī wi wori dè !
Nabɔnminɔ pe‑ sí wi baara tɔ̀ni líɛ wè !
12 Kiì yɛli siɛn ní kacɛ̀ngɛ kpíʔile wi mɛ́ʔ !
Siɛn míɛni fǎga nyinimɛ taa wi pìile nɛ̄ bèle,
bàli bīɛlɛ círile bèleʔ !
13 Wi siimɛ pi‑ pulɔgɔ bè kúɔ,
dí wi narigɛ ki míʔɛ ki‑ sí kurugo bè láʔa kɛ̀ngɛlɛ siinwoli nī lè !
14 Yewe wi‑ sɔ̀ngi wi taa nɛ́ wi tobilo kolimɔ ní bè,
dí wi yàa kapiʔile ke fǎga kurugo bè láʔa wi nɛ̄ !
15 Yewe wi‑ sɔ̀ngi wi taa pe kapiʔile wuʔu nɛ̄ gè lɛ̀lɛ ó lɛ̀lɛ nī !
Wi‑ ki kpíʔile siɛn fǎga ní sɔ̀ngi daa pe wuʔu nɛ̄ gè dàala nɛ̄ lèʔ !
16 Nɛ́ ki cɛ́n siɛn ŋáà wiì sɔ̀ngi nɛ̀ taa bè kacɛ̀ngɛ kpíʔile gèʔ,
a wi 'taʔa fuunmɔfɔli nɛ̄ wè nɛ́ fɔ̀ngɔfɔli ní wè,
nɛ́ ŋàa wi fungo ki 'cúʔɔ gè, nɛ̀ pe wuʔɔ nɛ̀ kpúu.
17 Bɛ̀ dɛ́ngɛ juudaʔaga ki cé wi dɛ́ni gè, wi 'yɛli wi‑ wi cò !
Kiì cé wi dɛ́ni bè diba kpíʔile wè siɛn mɛ́ʔ; wi 'yɛli wi‑ líili wi nɛ̄ !
18 Bɛ̀ dɛ́ngɛ juudaʔaga ki cé wi dɛ́ni bɛ̀ burugo tíɛlɛ gàa wi nii gè,
wi 'yɛli wi‑ jíin wi fungo nī gè bɛ̀ luʔɔ tíɛlɛ gàa wi gbun gè,
wi 'yɛli wi‑ jíin míɛni wi céri nī dè
bɛ̀ sùnmɔ tíɛlɛ bàa wi tùugí bèb !
19 Dɛ́ngɛ siɛnrɛ ti‑ puu bɛ̀ fɛ̀ni tíɛlɛ ŋàa ní wi 'wìi mígele wè,
bɛ̀ jàdigi màʔana tíɛlɛ nàa ní wi 'wi puu lɛ̀lɛ ó lɛ̀lɛ nī lè !
20 Cúɔʔ ! Ki 'yɛli ki‑ puu bɛ̀ Yewe‑ pe sàri,
bàli piyē nɛ tíri mi nɛ̄ wè, nɛ́ bàli ní pe mi míʔɛ córi gè !
21 Nɛ̀ ki yaʔa, muɔ wè, Kàfɔli Yewe wè,
ma yakaa kpíʔile mi kɔli mɛ́, muɔ míʔɛ ki kpuʔɔrɔ tire kɛnmɛ nɛ̄ !
Bɛ̀ muɔ bànguɔ dɛ́nigɛ ki 'nyuɔ gè, ma mi píle ma suɔ !
22 Nɛ́ ki cɛ́n mi yē fuunmɔfɔli nɛ́ ní fɔ̀ngɔfɔli,
a mi fungo kiī cúʔɔgɔ mi nī gè.
23 Mi nɛ kúu nɛ waa bɛ̀ cɛnguʔɔ nyúmɔ tíɛlɛ,
pe mi kɛ́ngi nɛ wáari bɛ̀ kàbarigɛ tíɛlɛ.
24 Mi kágunyɔ yi 'fún nɛ̀ yàʔara bɛ̀ mi nɛ sún nii níɛ náari wè,
a mi céri ti 'laʔa mi nɛ̄.
25 Mi 'kò kátaanra yɛgɛ siɛnnɛ bálì mɛ́ bèle;
a pe 'mi nyaa wè, pe níɛ nyùgo kóli gè.
26 Yewe mi Kulocɛliɛ yo, te báan ma pa mi sáʔa !
‑Mi suɔ ma yɛli nɛ́ muɔ bànguɔ dɛ́nigɛ ní gè !
27 Siɛnnɛ bálì pe‑ ki cɛ́n muɔ kɔli kire ki 'mi sáʔa,
dí muɔ wī Yewe, muɔ wī 'ki kpíʔile !
28 Piyē nɛ dɛ́ngɛ tari mi nɛ̄, nɛ̀ ki yaʔa muɔ nɛ diba tari mi nɛ̄ !
Piyē nɛ yɛ̀gí mi kúrugu; muɔ sí ma bé fìɛrɛ tɔ́n pe nɛ̄ !
Mi ŋáà wī muɔ baakuɔwɔ wè, m'bé sí puu fundaanra nɛ̄.
29 Bàli piyē nɛ tíri mi nɛ̄ wè, ki‑ yaʔa pe‑ faʔama taa,
dí fìɛrɛ ti‑ pe mígele bɛ̀ burugbuʔɔ tíɛlɛ !
30 M'bé Yewe tòbilo wè nɛ́ yékpogbuɔlɔ ní,
m'bé wi gbùʔɔrɔ siɛnniʔɛmɛ sunʔɔmɔ nī bè.
31 Nɛ́ ki cɛ́n wi nɛ̂ yéri fùrɔgɔfɔli wi kàliige mɛ́ gè,
bé wi suɔ bàli mɛ́ pe kàyuʔu nyu gè wi nɛ̄ wè.