A mi siɛnnɛ pe yé fɔ̀li nɛ lúru m'mɛ́ wè o !
81
1 Ŋúnuŋuminɔ yiɛginiwɛ wuʔu gī, gàa pe 'ŋú nɛ́ Gatiyé gɔri ní wèa. Asafi wuʔu gīb.
2 Yeri fundaanra yékpuʔulo wáari Kulocɛliɛ kɔli mɛ́ gè;
wire wī weli ŋɔri dè !
ʔaan, yeri kòkuʔulo wáari Yakuba Kulocɛliɛ mɛ́ wè !
3 Ye‑ ŋúnugo káà le, yeri pìnbile kpúɔn lè,
yeri gɔripile tàanna kpúɔn lè, nɛ́ màʔagɛlɛ bɔ̀licɛrigɛ ní gè.
4 Ye‑ kàkpanʔa wíi gè yevɔngɔ yiri lɛ̀lɛ nī lèc nɛ́ nzùʔu lɛ̀lɛ nī lè,
weli fundaanra tánʔagbuɔlɔ cɛngɛ nī gèd.
5 Nɛ́ ki cɛ́n kiī fànʔa kaala Isirayɛli siɛnnɛ mɛ́ bèle;
Yakuba Kulocɛliɛ wi kàyuʔu siɛnrɛ dī.
6 Kire yē nyakungɛngɛ siɛnrɛ dáà wi 'tɛ́ngɛ Yusufu narigɛ nī gè,
bà Kulocɛliɛ wi yé kɛ́ nɛ̀ sɛ́nì tuu Ezipiti kùlo nɛ̄ lèe.
Mi nyasiɛnrɛ táà lúʔu dàa miì cɛ́n dèʔ,
7 a ti 'jo: «Mi nyɛ́nì tugoro tìrige dè yeli fíkɛnyɛ nɛ̄ yè,
mi nyɛ́nì yeli kiyɛ yige yè sùkulomɔ gòcaaya nī yèf.
8 Bà yeli yé puu funbiɛnrɛ nɛ̄ dè, a yeli 'mi yeri á mi 'yeli líɛ nɛ̀ yigeg.
A mi 'lúʔu yeli mɛ́ mi làridiʔɛ nī gè, kàsakpɛnigɛ nī gèh.
Baa Mɛriba luɔyɔ tiʔɛ nī gè, a mi 'yeli puu nɛ̀ wélii. Ye‑ ŋɔ́ cɛ̀.
9 Kire nɛ̄ a mi 'yeli yɛ: ‹Yeri lúru, mi siɛnnɛ, m'bé juu bè yeli sɔ̀mi.
Cí, Isirayɛli, a ki yé nyaa muɔ yé fɔ̀li nɛ lúru m'mɛ́ wè o !
10 Kiì yɛli pe 'kulocɛliɛ wáà nyaa yeli sunʔɔmɔ nīʔ !
Muɔ sì yé cɛ́nì yɛli bè káguro cáan kùlo láà kulocɛliɛ yiʔɛ mɛ́ʔj !
11 Mi yē Yewe, muɔ Kulocɛliɛ wè. Mi 'muɔ yige Ezipiti kùlo nī lèk.
‑Muɔ nyuɔ múgu gè kpuʔɔ dí mi sí ki nyì !›
12 Kire nɛ́ ki mìɛni, mi siɛnnɛ pe sì mi siɛnrɛ lúʔu dèʔ, Isirayɛli sì fɔ̀li mi nɛ̄ʔl.
13 Kire nɛ̄ a mi sí pe yaʔa pe ngbóluʔubinʔɛnɛ nī gèle;
pe nyɛ́nì taʔa pe nyɛ́ni kele nɛ̄ gèle.
14 Cí ! A mi siɛnnɛ pe yé fɔ̀li nɛ lúru m'mɛ́ wè o !
A Isirayɛli 'puu nɛ tári mi koligo nī gè om !
15 Kiǐ cî puu m'mɛ́ yafiɛn bè pe leguulo kùru bèle bè kɛn pe mɛ́ʔ,
mi cî mi kɔli yiʔɛ gè bè taʔa pe parifɔlilɔ nɛ̄ bèle !
16 Bàli 'mi Yewe sì dɛ́ni wèʔ, peli béri gbɔbilɔ mi yiʔɛ mɛ́ gè;
pe faʔama pi bé puu lɛ̀lɛ ó lɛ̀lɛ nīn.
17 Gàa ki 'Isirayɛliyé kúɔ bèle,
mi cî de pe nyuɔyɔ kɔ̀ngí yè nɛ́ yaliicɛ̀nrɛ ní,
bé pe tín nɛ̀ sárigɛ ní gè gàa ki kɔ́ngi nyaguruwiʔi nī gèo.»