Kulocɛliɛ yo, -ki yaʔa weli- koli bɛn muɔ kúrugu !
80
1 Ŋúnuŋuminɔ yiɛginiwɛ wuʔu gī. Pe 'ki ŋú nɛ́ yékpoli ní nàa ni 'jo: «Luʔɔ kácunʔɔ». Nyakungɛngɛ siɛnrɛa. Asafib ŋúnudanʔa gī gàa pe ŋú nɛ́ yakpuɔnrɔ ní dè.
2 Isirayɛliyé nàʔavɔli yo, ‑líiye cáan weli mɛ́,
muɔ ŋáà ma 'Yusufuc siimɛ yiʔɛ kínigi gè majo sìnbatogo gī gè.
Muɔ ŋáà wī tɛ́niwɛ seribɛnnɛd nɛ̄ bèle, ‑muɔ kpìɛnmɛ cáan bè weli nɛ̄.
3 ‑Muɔ ŋɔri tíʔɛ dè ma weli suɔ weli tobilo siimɛ nyaamɛ nɛ̄ bè:
Ɛfirayimi wè, Bɛnzamɛ, nɛ́ Manase ní wèe.
4 Kulocɛliɛ yo, ‑ki yaʔa weli‑ koli bɛn cígini !
‑Weli wéli nɛ́ funjɛ̀ngɛ ní, bà weli bé suɔ.
5 Yewe yo, Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
lɛ̀lɛ jori nī muɔ fungo ki bé yɛ̀ kpuʔɔ
muɔ siɛnnɛ náarigɛ kúrugu gè ?
6 Muɔ 'kɔnrɔ tire kɛn pe mɛ́ majo yaliire dī,
nɛ́ sí ki yaʔa a muɔ 'pe yéturo le dè yalege nī fúɔ
a ti 'niʔɛ, a pe 'ti gbuɔ.
7 Weli tɛ́ninyɛninɛ piyē nɛ túngu nɛ́ pìye ní bè weli kùlo líɛ lè,
a weli leguulo pe 'kò nɛ pìye nyíɛnɛ weli nɛ̄.
8 Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli,
‑ki yaʔa weli‑ koli bɛn cígini !
‑Weli wéli nɛ́ funjɛ̀ngɛ ní, bà weli bé suɔ.
9 Muɔ cé ɛrɛzɛn fétirigef píle gè nɛ̀ kɔ́n Ezipiti kùlo nī lè,
nɛ́ kùlogolo siɛnfeliye cìra yè ki yiʔɛ mɛ́ gè, nɛ́ koli nɛ̀ ki cɔ́ri baa.
10 Muɔ yé siʔi gbòbori ki mɛ́, a ki 'fìin nɛ̀ nìre wáa dàala nī lè.
A ki 'yɛ̀ nɛ̀ kùlo nyì lè.
11 A ki nyúmɔ pi 'yɛ̀ nɛ̀ nyaguruyo tɔ́n yè,
ki lère ní dè nɛ tári sɛdiri tiikpaʔaliyɛ nɛ̄ yè.
12 A ki lère ti 'yɛ̀ fúɔ nɛ̀ sɛ́nì nɔ̀ Cɛngɛnyɛnijiinmɛ kuʔɔjii nɛ̄ wè,
a ki lèbunro tire 'kɛ́ nɛ̀ sɛ́nì nɔ̀ Efirati cáʔa nɛ̄ gèg.
13 Gáa sí nɛ̄ muɔ 'kàwiiye fùru kàkɛngɛ nɛ̄ gè,
a kire ki 'yaʔa bàli pe mìɛni pe 'tóri bèle koligo nī gè,
a pe 'kò nɛ ki yasɛnrɛ cuu dè ?
14 A nyàʔatiɛligɛ ki pɛ́nì siʔi cúʔɔ gè,
a nyàʔayɛrɛ ti mìɛni 'kò nɛ ki káa.
15 Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
koli ma pɛn, weli nɛ muɔ fiɛn wī !
Bè muɔ yaʔa baa nyìʔɛnɛ nī lè, ma ki wéli !
Ma fétirige gáà wéli gè ma ki píle ma suɔ,
16 gàa muɔ kàliige kɔli ki 'cɔ́ri gè,
fétiribungo gáà nī muɔ tíimɛ 'ŋɔri nyɔ́gɔ dè.
17 Ki n'gɛ, kàsun ki 'muɔ ɛrɛzɛn fétirige sórigo gè,
a siɛnnɛ pe 'ki ceri.
Muɔ siɛnnɛ piyē nɛ córi muɔ funyɛrigɛ kɛnmɛ nɛ̄ bè.
18 ‑Muɔ kɔli taʔa gè siɛn nɛ̄ wè ŋáa wī muɔ kàliige mɛ́ gè,
lewiiwe ŋáà nī muɔ 'ŋɔri nyɔ́gɔ dèh.
19 Bà kire bé ki yaʔa weli sǐ ní líili muɔ nɛ̄ cíginiʔ.
‑Ki yaʔa weli‑ kò sìi nɛ̄, bà weli béri muɔ míʔɛ yeri gè bèri muɔ náari.
20 Yewe yo, Kulocɛliɛ ŋáà wī Nyìʔɛnɛ Kapiɛngbuɔnnɔ Kàfɔli wè,
‑ki yaʔa weli‑ koli bɛn muɔ mɛ́ !
Weli wéli nɛ́ funjɛ̀ngɛ ní, bà weli bé suɔ.