Weri weli faʔa kele nyu gèle weli pìile mɛ́ bèle
78
1 Asafia sícilimɛ ŋúnugo gīb.
Mi siɛnnɛ, yeri mi tɛnmɛnɛ lúru lè !
Ye‑ líiye cáan, yeri mi nyasiɛnrɛ lúru dè !
2 M'bé mi nyuɔ múgu gè bèri nyu kàsiʔile nī,
m'bé kalarigɛlɛ yige gèle gàli gīɛlɛ weli bàziimɛ wuʔulo gèlec.
3 Gàli weli yé lúʔu nɛ́ gàli míɛni weli 'cɛ́n gèle,
gàli weli tobilo pe 'juu nɛ̀ tìɛ weli nɛ̄ gèle,
4 weli sǐ je ke làrigɛʔ pe siimɛ wuulo nɛ̄ bèleʔ.
Weli bé ki juu kɛ̀nnɛ náà mɛ́ lè, nàa ni báan nɛ tíin lè,
gàa kɛnmɛ nɛ̄ pe 'yɛli bèri Yewe gbùʔɔrɔ́ wè.
Weli bé juu wi ŋɔri kele nɛ̄ gèle nɛ́ wi kakpoliyo ní yè nyàa wi 'kpíʔile yè.
5 Wi nyɛ́nì wi nyakungɛngɛ siɛnrɛ kɛn dè Yakuba siɛnnɛ mɛ́ bèle,
wi nyɛ́nì wi Fànʔa Siɛnrɛ tɛ́ngɛ dè Isirayɛli siɛnnɛ mɛ́ bèle.
Wi 'ki juu nɛ̀ gbɛ̀ngɛ pe tobilo mɛ́ bèle nɛ́ jo
peri pe pìile tɛnmɛ bèle ke nɛ̄,
6 kire ga buu kɛ̀nnɛ náà ni báan lè ni‑ ti cɛ́n,
pìile bálì piyè fìɛ sii bèleʔ,
peli míɛni bé pari ti nyu pe pìile mɛ́ bèle.
7 Bà ki bé kpíʔile dí peli míɛni sí pe sɔ̀ngirɔ taʔa dè Kulocɛliɛ nɛ̄,
kire ga buu pe fǎga fìʔɛ nɛ́ Kulocɛliɛ wi kakpiʔiligele ní gèleʔ,
béri wi kajuudiʔɛlɛ cògí gèle.
8 Bà ki bé kpíʔile piyě puu bɛ̀ pe tobilo tíɛlɛ bèleʔ,
peli bálì pe yé puu sìnluʔumɔ
nɛ́ ní cíimɛ kɛ̀nnɛ wuulo bèle,
kɛ̀nnɛ láà wuulo bàli pe 'puu nɛ káala nɛ tári bèle,
pe funyɔ yiì cé sɔ́migɔ nɛ̀ puɔ Kulocɛliɛ nɛ̄ wèʔ.
9 Ɛfirayimi wuulo bálì pe 'puu nɛ́ sandaliyɛ ní yè,
a peli 'kàduʔu wáa kapiɛnnɛ lɛ̀lɛ mɛ́ lè:
10 piyè Kulocɛliɛ nyakungɛngɛ siɛnrɛ cò dèʔ,
a pe 'cíi, pe wè nɛ tári nɛ yɛligi nɛ́ wi kajuʔulo ní gèleʔd.
11 Pe cé fìʔɛ nɛ́ wi kakpiʔiligele ní gèle
nɛ́ wi kakpoliyo ní yè nyàa wi yé tìɛ pe nɛ̄ bèle.
12 Pe tobilo nyaamɛ nɛ̄ bè, a wi 'kakpoliyo kpíʔile yè,
Zowan kàʔa tɛ́nimɛ nī bèe baa Ezipiti kùlo nī lè.
13 Wi nyɛ́nì kuʔɔjii ceri wè nɛ̀ pe jeli,
nɛ́ luʔɔ yɛ̀gɛ gè nɛ̀ yérige bɛ̀ gunyɔ tíɛlɛf.
14 Cɛnvugo nɛ̄ gè, wi nɛ̂ pe yiʔɛ kíni nɛ́ kàsadibagɛ ní gè,
pìlige nī gè, wi nɛ̂ pe yiʔɛ kíni
nɛ́ kàsadibagɛ kàsun kpìɛnmɛ ní bèg.
15 Wi yé kàdɛnigbaʔala jabari gèle waama kùlo nī lè,
a luʔɔ 'yiri yi nī bɛ̀ pìndiʔɛlɛ tíɛlɛ, a pe 'gbuɔh.
16 Wi yé lakoliyo yige yè kàdɛnigbaala nī lè,
a wi 'luʔɔ yige gè bɛ̀ cáʔa tíɛlɛ.
17 Kire nɛ́ ki mìɛni a pe 'kɛ́ yiʔɛmɛ nɛ kapiʔile kpínʔini gèle wi nɛ̄,
baa luʔɔfun kùlo nī lè, a pe 'cíi wi nɛ̄i,
Kulocɛliɛ ŋáà wī Duniya wi Mìɛni Nyùgo nɛ̄ gè.
18 Pe yé ki kɔ̀rirɔ wī bè Kulocɛliɛ puu wè bè wéli,
nɛ́ jo wi‑ yaliire kɛn peli mɛ́ dàa ti 'peli dɛ́ni dèj.
19 Pe yé cɛ́nì Kulocɛliɛ tiʔɛlɛ wè wī, nɛ́ jo:
«Kulocɛliɛ wi bé gbɛ̀ jáa í
bè weli kɛn weli‑ lìi náʔa gè waama kùlo nī lèk ?
20 Wi nyɛ́nì kàdɛnigbaala kpúɔn lè a luʔɔ 'yiri,
lakoliyo yi 'puu nɛ fúu nìʔɛyɛ.
Nɛ̀ sí ki yaʔa wi bága jáa bè suro kɛn weli mɛ́ í ?
Wi bé gbɛ̀ jáa kaara kɛn wi siɛnnɛ mɛ́ bèle í ?»
21 Bà Yewe 'ti lúʔu dè, a wi fungo ki 'yɛ̀ kpuʔɔ,
a Yewe kàsun ki 'cò Yakuba wuulo kúrugu bèle,
a wi fungo ki 'yɛ̀ kpuʔɔ pe kúrugu peli bàli bīɛlɛ Isirayɛli siɛnnɛ bèle.
22 Nɛ́ ki cɛ́n piyè cé pe sɔ̀ngirɔ taʔa dè Kulocɛliɛ nɛ̄ wèʔ,
pe míɛni sì cé tɛ́ngɛ nɛ́ wi suɔlɔ wuʔu nɛ̄ gèʔ.
23 A wi sí ki juu nɛ̀ gbɛ̀ngɛ naamɛ kàsadibarɛ mɛ́ dè,
nɛ́ nyìʔɛnɛ kɔ̀riyɔ múgu yè.
24 Wi yé mana yaliire tìrige dè bɛ̀ kàsaʔa tíɛlɛ,
wi 'nyìʔɛnɛ yaliire kɛn dè pe mɛ́.
25 A siɛnnɛ pe 'nyìʔɛnɛ tundunminɔ suro lìi dè;
Kulocɛliɛ wi 'pe nyalii kɛn wè pe mɛ́, a pe 'lìi nɛ̀ tín.
26 A wi 'káfaligbuʔɔ fiɛ gè nyìʔɛnɛ nī lè
gàa ki 'kɔ́n cɛngɛnyɛnifoligɔli mɛ́ gè;
wi ŋɔri ní dè, a wi 'káfaligɛ fiɛ gè
gàa ki 'kɔ́n cɛngɛnyɛnifolimɛ kàliige mɛ́ gè.
27 A wi sínjari 'tìrige dè pe mɛ́ nìʔɛrɛ
bɛ̀ kuʔɔjii gògoyo dàrimiʔɛ tíɛlɛ gè,
ʔaan, wi 'kaara tìrige dè pe mɛ́ nìʔɛrɛ bɛ̀ cúbugo tíɛlɛ.
28 A wi 'ti tìrige bùguro sunʔɔmɔ nī bè,
nɛ́ pe kòridiɛyɛ màʔa yè nɛ̀ suʔu.
29 A pe 'lìi nɛ̀ sɔ́migɔ nɛ̀ tín;
wi yé ki kɛn pe mɛ́ gàa pe 'puu nɛ caa gè.
30 Nɛ̀ ki yaʔa piyè cé fìɛ lìi nɛ̀ tín wèʔ,
yaliire ti 'puu nɛ tíin pe nyuɔyɔ nī yè,
31 kire lɛ̀lɛ nī lè a Yewe fungo ki 'yɛ̀ pe kúrugu,
a wi 'nàgaliriye kpúu yè,
nɛ́ Isirayɛli nàgapunminɔ kpúɔn bèle nɛ̀ cáan.
32 Kire nɛ́ ki mìɛni a pe ń'nɛ̀ kàa taʔa pe kapiigbiʔilige nɛ̄ gè;
piyè cé tɛ́ngɛ wi kakpoliyo nɛ̄ yèʔl.
33 Kire nɛ̄ a Kulocɛliɛ sí pe sìi kúɔ wè majo ŋɔ́nɔ nī,
a wi 'pe yiʔɛlɛ fuu gèle nɛ̀ kúɔ nɛ́ wuʔɔgɔ ní gèm.
34 Bà Kulocɛliɛ kɛ́nì pe kpúu wè, a pe 'yiʔɛ nɛ wi caa,
a pe 'koli nɛ̀ yiʔɛ wi kɔli mɛ́ gè cígini, níɛ ki caa wi‑ peli suɔ.
35 A pe 'sɔ̀ngi nɛ̀ taa nɛ̀ ki cɛ́n Kulocɛliɛ wī peli kàdɛnigbaala lè,
wire wī, Kulocɛliɛ ŋáà wī Duniya wi Mìɛni Nyùgo nɛ̄ gè,
wi pe 'fùgu nɛ̀ suɔ wè.
36 Nɛ̀ ki yaʔa pe funyɔ yiì cé fíligeʔ,
dàa pe 'puu nɛ nyu dè, tiì cé puu kányiʔɛʔ.
37 Pe funyɔ yiì cé sɔ́migɔ nɛ̀ puɔ Kulocɛliɛ nɛ̄ wèʔ,
pe nyɛ́nì wi nyakungɛngɛ cúʔɔ gè gàa wi yé kpíʔile nɛ́ pe ní wè.
38 Nɛ̀ ki yaʔa, wire wè, wiī nyinidaaguugo ní,
wi 'puu nɛ pe kolimɔ pi kàsulugo suu gè, wiì pe cúʔɔʔ.
Tɔliyɔ sáa nī wi 'wi funyɛrigɛ kpàri gè nɛ̀ cò pe kúrugu,
wiì cé wi fundanʔanigɛ sùʔu gè nɛ̀ wo pe nɛ̄ʔ.
39 Wi yé ki sɔ̀ngi nɛ̀ taa nɛ́ ki cɛ́n piyē siɛnpigele wī,
nɛ́ ní ŋɔ́nɔ náà ni 'tóri lè, niǐ ní koli bɛnʔ.
40 Ki 'tɔliyɔ nyuɔ kúɔ a pe 'cíi wi nɛ̄ waama kùlo nī lè,
ki 'tɔliyɔ nyuɔ kúɔ pe 'funbiɛnrɛ wáa wi nɛ̄ tiɛwaʔa nī gèn !
41 A pe 'koli nɛ Kulocɛliɛ pun wè nɛ wéli,
a pe 'funbiɛnrɛ wáa Isirayɛliyé Tiɛlɛfun Kulocɛliɛ nɛ̄ wè.
42 Piyè sɔ̀ngi nɛ̀ taaʔ nɛ́ Kulocɛliɛ ŋɔri kakpiʔiligele ní gèleʔ
cɛngɛ gíì wi yé pe suɔ nɛ̀ yige pe parifɔlilɔ kiyɛ nī yè.
43 A pe 'fìʔɛ nɛ́ fìɛlɛ ní bèle bàli wi 'kpíʔile Ezipiti kùlo nī lè,
nɛ́ kakpoliyo ní yè nyàa wi 'kpíʔile Zowan kàʔa tɛ́nimɛ nī bèo.
44 Kulocɛliɛ wi 'Niili cáʔa lakoliyo luɔyɔ kpíʔile yè sìsiɛn,
siɛn sì cî ní gbɛ̀ ki gbuɔʔp.
45 A wi 'gbùu tórigo wè wi‑ siɛnnɛ pe sìsiɛn gbun gèq,
nɛ́ kpìile ní bèle, a pe 'ti mìɛni cúʔɔr.
46 A wi 'pe yaliire kɛn dè vìɛnrijogolo mɛ́ gèle,
ʔaan, wi nyɛ́nì pe kiyɛ baara kɛn dè kàbaridɛ mɛ́s.
47 A wi 'pe ɛrɛzɛn fétire cúʔɔ dè nɛ́ kàsasindari ní dè,
a wi 'pe sàanfiidiire cúʔɔ dè nɛ́ kàsaala ní lè.
48 A wi 'pe yajuuro cúʔɔ dè kàsasindari ní dè,
nɛ́ pe nɛ̀toyo kɛn yè kàsakpɛnigɛ mɛ́ gè.
49 A wi 'nyìʔɛnɛ tundunminɔ tórigo bèle pe kúrugu,
cúʔɔmɔ gboli wuulo bèle:
wi funyɛrigɛ gáà ki 'yɛ̀ bɛ̀ kàsun tíɛlɛ,
wi funyɛrigbuʔɔ nɛ́ wi fundanʔanigɛ nɛ́ wi funbiɛnrɛ ní dè.
50 A wi 'wi funyɛrigɛ sùʔu gè nɛ̀ wo pe nɛ̄;
wiì pe suɔ kùu mɛ́ wèʔ.
Wi cé kɛ́nì pe kɛn wī yaabiimɛ mɛ́ bè.
51 A wi 'Ezipiti kùlo jaafɔpelile pe mìɛni kpúɔn,
bàli pe yé puu Kami siimɛ nàgapunmɔ pìpelile bèlet.
52 Nɛ̀ ki yaʔa a Kulocɛliɛ wi 'wi siɛnnɛ kɔ́ri bèle nɛ̀ yige
kùlo kàduʔu mɛ́ gè majo sìnbaara dī,
wi yé pe nàʔa bɛ̀ sìnbatogo tíɛlɛ waama kùlo nī lèu.
53 A wi 'pe ciʔige nɛ̀ wéli nɛ́ pe yiʔɛ kíni; fíɛrɛ sì pe còʔ,
nɛ̀ ki yaʔa kuʔɔjii wi 'pe leguulo lìi bèlev.
54 A wi 'pe kɔ́ri nɛ̀ kɛ́ wi kùlo mɛ́ lè nàa nī wàlidɛngɛlɛ lè,
nyagurugo mɛ́ gè gàa wire tíimɛ kɔli yé líɛ nɛ̀ kɛn pe mɛ́ gèw.
55 Wi 'kùlogolo cìra gèle pe yiʔɛ mɛ́
nɛ́ ke dàʔala liɛlɛ gèle wi siɛnnɛ nɛ̄ bèle kɔrigɔ.
A wi 'Isirayɛliyé saaya tùluyo tɛ́ngɛ yè Kanaayé kòridiɛyɛ nī yè.
56 Kire nɛ́ ki mìɛni a pe 'Kulocɛliɛ puu wè nɛ̀ wéli,
wire ŋàa wī Duniya wi Mìɛni Nyùgo nɛ̄ gè.
ʔaan, je pe sí cíi wi nɛ̄ wī, piyè wi nyakungɛngɛ siɛnrɛ cò dèʔx.
57 Pe nyɛ́nì kàduʔu wáa wi mɛ́ nɛ́ cíi, bɛ̀ pe tobilo tíɛlɛ;,
pe 'puu bɛ̀ ŋaaya tíɛlɛ nyàa pe 'ŋɔ, yiì sìɛn yèʔ !
58 Pe 'wi fungo yɛ̀gɛ gè nɛ́ pe tiɛkpaʔaliyɛ sundiɛyɛ ní yè;
pe yasundɛnyɛ yi 'yejaʔa yɛ̀gɛ wi mɛ́.
59 Bà Kulocɛliɛ wi 'ki nyaa mmɛ gè, a wi fungo ki 'yɛ̀ kpuʔɔ,
a wi 'cíi Isirayɛli siɛnnɛ nɛ̄ bèle.
60 A wi 'wi Kòridiʔɛ yaʔa gè, gàa ki 'puu Silo kàʔa mɛ́ gèy,
kpátaʔa gàa wi 'yé kpúɔn siɛnnɛ sunʔɔmɔ nī bè.
61 Gàa ki 'puu nyakungɛngɛ finʔɛgɛ gèz, wi ŋɔri fìɛ wuʔu gè,
a wi 'ki yaʔa a wi parifɔlilɔ pe 'kɛ́ nɛ́ wi kpuɔmɔ ní bèa.
62 Wi fundanʔanigɛ ki 'yɛ̀ wi siɛnnɛ kúrugu bèle,
peli bálì pe yé puu wi kɔrigɔ gè;
a wi 'wi wuulo kɛn bèle kapiɛngbuɔnnɔ ŋuʔɔnɔ mɛ́ gèle.
63 A kàsun ki 'pe nàgapunminɔ sórigo bèle mɛ́nɛmɛnɛ,
kire nɛ̄ pe sinborilo piyè cepɔriyɔ ŋúnuyɔ taa nɛ̀ lúʔuʔ.
64 Pe kacuɔnrilɔ pe 'kùu kapiɛngbuɔn ŋɔnɔ nɛ̄ lè;
pe lakicɛlilɛ piyè gbɛ́ni jáa nɛ̀ cáàduukɔnrɔ wáa dèʔ.
65 Kire nɛ̄ a Kàfɔli wi 'fuu nɛ̀ yɛ̀ majo bɛ̀ siɛn cî puu nɛ ŋɔ́ni wè,
bɛ̀ nàgalirige tíɛlɛ gàa diviɛn 'wi cò nɛ̀ wi cáʔara wè.
66 A wi sí wi parifɔlilɔ kpúɔn bèle a pe 'fɛ̀,
nɛ́ fìɛrɛ wáa dè pe nɛ̄ lɛ̀lɛ ó lɛ̀lɛ nī.
67 A wi 'cíi Yusufu narigɛ nɛ̄ gè,
wiì sí Yusufu jaa Ɛfirayimi saʔa tùlugo nyíɛnɛ gè nɛ̀ kɔ̀nʔb.
68 Nɛ̀ ki yaʔa a wi 'Zuda saʔa tùlugo nyíɛnɛ gè nɛ̀ kɔ̀n,
nɛ́ Siyɔn nyagurugo ní gè gàa ki 'wi dɛ́ni gè.
69 A wi 'wi saawalidɛngɛgɛ tɛ́ngɛ gè ki‑ mɔgɔ bɛ̀ nyìʔɛnɛ tíɛlɛ,
bɛ̀ dàala tíɛlɛ lè, nàa wi 'tɛ́ngɛ súuri lè.
70 Wi 'wi baakuɔwɔ Dawuda nyíɛnɛ wè nɛ̀ kɔ̀n,
nɛ̀ wi píle nɛ̀ yige sìnbaduuyo nī yèc.
71 Wi yé wi láʔa wi sìnbaara kúrugu dè
bè wi kpíʔile Yakuba siɛnnɛ pe nàʔavɔli,
Isirayɛli ŋáà wī wi kɔrigɔ gè.
72 A Dawuda wi 'pe nàʔa nɛ́ funviige ní,
a wi 'pe yiʔɛ kíni gè nɛ́ sìnjilimɛ ní.