Mi 'sɔ̀ngi nɛ̀ taa nɛ́ Kulocɛliɛ kakpiʔiligele ní gèle
77
1 Ŋúnuŋuminɔ yiɛginiwɛ Yedutuna wuʔu gī. Asafib ŋúnudanʔa gī gàa pe ŋú nɛ́ yakpuɔnrɔ ní dè.
2 Mi 'mi yékpoli wáa lè Kulocɛliɛ kúrugu wè !
Mi 'mi yékpoli wáa lè Kulocɛliɛ kúrugu
nɛ̀ wi fiɛn wi‑ líiye cáan mi mɛ́ !
3 Mi fùrɔgɔ cɛngɛ nī gè, mi nɛ̂ mi Kàfɔli caa wè,
pìlige nī gè, mi nɛ̂ mi kɔli sáʔa gè nɛ náari.
Mi nɛ̌ fùrɔ́ bè nyaaʔ. Mi wè caa pe‑ mi fìɛlɛʔ.
4 A mi gbɛ̀ni sɔ̀ngí Kulocɛliɛ ní wè, mi nìɛ cíɛn.
A mi sí gbɛ̀ni sɔ̀ngí wè, mi fungo nī gè, céri ti mìɛni nɛ kúu mi nɛ̄. Ye‑ ŋɔ́ cɛ̀.
5 Muɔ nɛ̂ cíi mi nyapikoyo yi fǎri tɔ́ngiʔ.
Mi fungo ki 'nyaʔami, mi wè nɛ nyuʔ.
6 Mi nɛ sɔ̀ngí nɛ taʔa nɛ́ faʔa faʔa cɛnyɛ ní yè, yiʔɛlɛ gálì ke 'tóri gèlec.
7 Pìlige nī gè, mi nìɛ sɔ̀ngí nɛ taʔa nɛ́ mi ŋúnugo ní gè.
Mi fungo ki nìɛ sɔ̀ngí nɛ́ ki ní, mi nɛ nìɛ yúgo:
8 «Mi Kàfɔli wi bé mi wáa lé súuri ?
Wi sǐ ní ga fɔ̀li mi nɛ̄ cígini wīʔ lé ?
9 Wi bànguɔ dɛ́nigɛ ki 'cíi nɛ̀ láʔa wī léd ?
Siɛnrɛ ní wè baa wi mɛ́ wīʔ lé, bè juu cígini kɛ̀ngɛlɛ ke mìɛni mɛ́ ?
10 Kulocɛliɛ wi 'fìʔɛ wī lé, bè ní kpuʔɔrɔ taʔa dè weli nɛ̄ ?
Wi fundanʔanigɛ kire kɛnmɛ nɛ̄ lé,
wi 'cíi wi nyinidaaguugo nɛ̄ gè lé ?» Ye‑ ŋɔ́ cɛ̀.
11 Mi sí 'nìɛ yúgo: «Gàa ki 'mi yáa gè, kire gī:
Kulocɛliɛ ŋáà wī Duniya wi Mìɛni Nyùgo nɛ̄ gè,
wi kàliige kɔli ki ní wè nɛ baara bɛ̀ faʔa tíɛlɛ gèʔ.»
12 Mi nɛ sɔ̀ngí nɛ taʔa nɛ́ Yewe kakpiʔiligele ní gèle;
ʔaan, je mi nɛ sɔ̀ngí nɛ taʔa nɛ́ muɔ faʔa kakpoliyo ní yèe.
13 Mi sɔ̀ngirɔ yē muɔ kakpoliyo yi mìɛni wuʔu nɛ̄ gè;
mi nɛ sɔ̀ngí nɛ taʔa nɛ́ muɔ ŋɔri kele ní gèle.
14 Kulocɛliɛ yo, muɔ tiɛlɛfun kakpiʔiligele ke felige wè bileʔ !
Kulocɛliɛ yo, kulocɛliɛ ŋíi wi 'kpúʔɔ bɛ̀ muɔ tíɛlɛ ?
15 Muɔ yē Kulocɛliɛ ŋáà wi kakpoliyo kpínʔini yè;
muɔ nyɛ́nì muɔ ŋɔri tìɛ dè kùlogolo siɛnfeliye nɛ̄ yè.
16 Muɔ kɔli kire ní muɔ 'muɔ siɛnnɛ suɔ nɛ̀ yige sùkulomɔ nī bè,
bàli bīɛlɛ Yakuba nɛ́ Yusufu siimɛ bèf. Ye‑ ŋɔ́ cɛ̀.
17 Kuʔɔjii luɔyɔ yi 'muɔ nyaa, Kulocɛliɛg,
kuʔɔjii luɔyɔ yi 'muɔ nyaa, a yi 'kò nɛ kɛ́ngi nɛ́ yɛ̀gí;
luʔɔ sícuuyo yi mìɛni 'kò nɛ kpúɔn nɛ nyaʔami yìi nī.
18 Kàsadibarɛ ti 'puu nɛ kàsaala tìrigí lè;
ti sunʔɔmɔ nī bè, kàsakpɛnigɛ 'puu baa,
ki kpìɛnmɛ ní bè bɛ̀ ŋaaya tíɛlɛ
nyàa yiī cɛrigɛ tiɛrɛ ti mìɛni nī dè.
19 Baa káfalijuulo nī lè, nɛ́ kàsakpɛnigɛ tùnmɔ pi yékpogbuɔlɔ nī lè,
a nyìʔɛnɛ ni nyíʔɛnimɛ pi 'duniya càanna wè,
a dàala ni 'fíige nɛ̀ cúungo.
20 Muɔ 'muɔ koligo kɔ̀n gè kuʔɔjii sunʔɔmɔ nī bèh,
nɛ́ muɔ kobile ní lè laniʔɛyɛ naamɛ yè,
nɛ̀ ki yaʔa muɔ yedanyɔgɔlɔ keli sì nyaa nɛ̀ cɛ́nʔ.
21 Muɔ 'muɔ siɛnnɛ pe yiʔɛ kíni gè bɛ̀ sìnbatogo tíɛlɛi,
nɛ́ Misa nɛ́ Arawɔn kiyɛ ní yèj.