Kulocɛliɛ wi 'kàyuʔu juu gè nìɛnyiɛnigɛfɔlilɔ nɛ̄ bèle
75
1 Ŋúnuŋuminɔ yiɛginiwɛ ŋúnugo gī. Pe 'ki ŋú nɛ́ yékpoli ní nàa ni 'jo: «Fǎga ki cúʔɔ gèʔa.» Asafi ŋúnudanʔa gī gàa pe ŋú nɛ́ yakpuɔnrɔ ní dè.
2 Kulocɛliɛ yo, weli nɛ muɔ gbùʔɔrɔ́ níɛ muɔ síɛri,
nɛ́ ki cɛ́n muɔ nyɛ́nì kpɔni weli nɛ̄;
siɛnnɛ piyē nɛ muɔ kakpoliyo nyu yè.
3 Kulocɛliɛ 'job: «Lɛ̀lɛ náà mi 'nyíɛnɛ nɛ̀ kɔ̀n lè,
a ni kɛ́nì nɔ̀ wè, m'bé kàyuʔu juu gè nɛ́ sínmɛ níc.
4 A dàala ni kɛ́ni cúungu lèd nɛ́ ni siɛnnɛ pe mìɛni ní bèle,
mi wè, m'bé ni cò bè yérige ni kàkpuɔnnɔ nɛ̄ bèlee. Ye‑ ŋɔ́ cɛ̀.
5 Mi 'ki juu nìɛnyiɛnigɛfɔlilɔ mɛ́ bèle nɛ́ jo:
‹Ye fǎri fungboliyo kpínʔini yèʔ !›
nɛ́ ki juu siɛnpiile mɛ́ bèle:
‹Ye fǎga yeli yiɛyɛ waʔa yèʔ !
6 Ye fǎga yiɛyɛ waʔa yè bè tóri mmɛ gèʔ !
Ye fǎga de nyu bèri yìye nyíɛnɛʔ !› »
7 Nɛ́ ki cɛ́n, cɛngɛnyɛnifoligɔli mɛ́ bɛ̀ʔ,
nɛ́ cɛngɛnyɛnijiingɔli mɛ́ bɛ̀ʔ, nɛ́ míɛni waama kùlo nī bɛ̀ʔf,
kpuɔmɔ piī nɛ kɔ́ngiʔ.
8 Kulocɛliɛ wire nigbe wi kàyuʔu nyu gè:
wi nɛ̂ wàa tìrige, níɛ̀ wàa yɛ̀gɛg.
9 Nɛ́ ki cɛ́n nɛ̀jogo kiī Yewe kɔli nī gè; diviɛn tanʔaniwɛ ŋáà pe 'nyaʔami wè, wiī ki nī.
Wiī nɛ ki kàyuʔujuu diviɛn ŋu wè dàala siɛnpiile nɛ̄ bèle;
pe mìɛni 'yɛli bè wi gbuɔ fúɔ bè sa nɔ̀ nɛ̀jogo táanmɛ gèh.
10 Gàa ki 'mi kúɔ wè, m'béri ki nyu súuri,
m'béri yakpuɔnrɔ kpúɔn dè
bèri Yakuba Kulocɛliɛ gbùʔɔrɔ́ wè.
11 A Kulocɛliɛ 'joi:
«M'bé siɛnpiile nyɛgɛlɛ ke mìɛni kabari gèlej;
bé siɛnsinminɛ peli kpúʔɔ.»