M'bé lèbaanna le, bɛ̀ Yewe nɛ mi wéli wè
27
1 Dawuda wuʔu gī.
Yewe yē mi kpìɛnmɛ nɛ́ ní mi suɔfɔli.
Ŋáa nɛ̄ m'bé ní de fìʔɛ́ ?
Yewe yē mi sìi wi làridiʔɛ bɛ̀ gunliriye tíɛlɛ.
Ŋáa nɛ̄ m'bé ní de fìʔɛ́ ?
2 A siɛnpiile pe 'pɛn mi kúrugu bèle
bè pa mi kabari bè mi céri káa dè,
mi leguulo nɛ́ mi parifɔlilɔ, peli bīɛlɛ pe bé kúrugo bè tuu !
3 A kapiɛngbuɔnnɔ pe pɛ́nì mi màʔa nɛ̀ suʔu bèle,
miǐ ga tíi bé fíɛ mi fungo nī gèʔ.
A ki cɛ́nì nyaa kapiɛnnɛ 'yɛ̀ mi kúrugu wè,
m'bé mi sɔ̀ngirɔ taʔa dè Yewe nɛ̄ wè.
4 Kaala nigbe mi nyɛ́nì náari Yewe mɛ́, lire yákuɔ mi nɛ caa:
bè kò Yewe saʔa nī gè mi sìi cɛnyɛ yi mìɛni nī
bè Yewe cɛ̀nmɛ nyaa bè,
bèri ki caa bè puu wi yiʔɛ mɛ́a wi Gbùʔɔrɔsaʔa nī gè.
5 Nɛ́ ki cɛ́n yawuʔɔ cɛngɛ nī gè wi bé mi nyɔ́gɔ wi nyúmɔ nī bèb,
wi bé mi làrigɛ wi fɛ̀ni saʔa laamɛ nī bè,
wi bé mi tárigɛ kàdɛnigbaala naamɛ gè.
6 Píra ŋáà nī wè, mi 'kpúʔɔ nɛ̀ tóri
mi leguulo nɛ̄ bèle, bàli pe 'mi màʔa bèle !
M'bé yajuʔu káà kpúu bè kɛn Yewe mɛ́ wi fɛ̀ni saʔa nī gè,
béri fundaanra yékpuʔulo wáari gèle;
m'béri ŋú béri yakpuɔnrɔ kpúɔn dè, bè Yewe gbùʔɔrɔ wè.
7 Yewe yo, mi nɛ muɔ yeri ! ‑Mi kòkuulo lúʔu lè !
‑Kpuʔɔrɔ taʔa dè mi nɛ̄, ma mi náarigɛ cò gè !
8 Mi fungo ki 'muɔ siɛnrɛ lúʔu dè, Yewe,
a muɔ 'joc: «Te báan ma pa mi yiʔɛ caa !»
Ao, Yewe, mi nɛ báan bè pa muɔ yiʔɛ caa gè.
9 Fǎga muɔ yiʔɛ làrigɛ gè mi nɛ̄ʔ !
Fǎga mi ŋɔrigɔ nɛ́ nàʔa níʔ, mi ŋáà wī muɔ baakuɔwɔ wè !
Muɔ yē mi sáʔafɔli. Fǎga núgo mi táanniʔ, fǎga mi yaʔaʔ,
Kulocɛliɛ, muɔ ŋáà ma 'mi suɔ wè !
10 A mi tuu nɛ́ mi yàa pe 'mi cíi wè, Yewe bé mi kɔ́ri.
11 Yewe yo, ‑mi tɛnmɛ muɔ koligo nɛ̄ gè,
‑mi nàʔa kozinge nī gè mi palilɛfɔlilɔ peli kɛnmɛ nɛ̄.
12 Fǎga ki yaʔa gàa mi parifɔlilɔ pe sɔ̀ngí gè ki‑ foriʔ !
Nɛ́ ki cɛ́n siɛnnɛ nyɛ́nì yɛ̀ mi kúrugu nɛ̀ finɛ nɛ̀ taʔa mi nɛ̄,
bàli pe kpìlikpili nyu wè, nɛ̀mɛfɔlilɔ bèle.
13 Mɛni mi cî ga puu
a mi sì yé mi sɔ̀ngirɔ taʔa dè Yewe kacɛ̀ngɛ nɛ̄ gèʔ,
duniya ŋáà nī siɛnnɛ pe yē sìi nɛ̄ wè ?
14 Bɛ̀ ki yē gè, yéri ma Yewe sige wè,
ma gbɛ̀nmɛ le, ma lèbaanna líɛ !
ʔaan, yéri ma Yewe sige wè !