Yewe yo, -mi funviige kàyuʔu juu gè
26
1 Dawuda wuʔu gī.
Yewe yo, ‑mi kàyuʔu juu gè,
nɛ́ ki cɛ́n mi nyɛ́nì tánʔa nɛ́ funviige ní
nɛ̀ mi funzɔngirɔ taʔa dè Yewe muɔ nɛ̄.
Mi tɔliyɔ yiì fíige nɛ̀ màʔaʔ.
2 Yewe, ‑mi cò ma nyaa, ma mi siʔɛ ma wéli,
ma mi fungo nɛ́ mi nàzɔn cúungo wè ma wéli.
3 Mi nɛ sɔ̀ngí nɛ tari nɛ́ muɔ bànguɔ dɛ́nigɛ ní gè,
mi nɛ tári nɛ yɛligi nɛ́ muɔ kányiʔɛ ní gè.
4 Mi sì tɛ́ni nɛ́ siɛnnɛ ní bèle bàli pe dàari nyu wèʔ,
mi wè nɛ tári nɛ́ jànvaafɔlilɔ ní bèle.
5 Kapiigbiʔilile gboli ni 'mi biɛn,
mi wè nɛ tɛ̀ní nɛ́ siɛnpiile ní bèleʔ.
6 Mi 'mi kiyɛ jíge yèa bɛ̀ mi sì kaala kpíʔile wèʔ,
kire ga buu mi‑ sìʔɛrɛ kpɔni muɔ gbùʔɔrɔdiʔɛ yafanʔa nɛ̄ gè, Yewe,
7 bèri nyu nɛ́ mi yékpoli ní lè bè puu kicɛ́nvɔli,
bèri muɔ kakpoliyo yi mìɛni nyu yè.
8 Yewe yo, saʔa ki 'mi dɛ́ni gàa gī muɔ Kòridiʔɛ gè,
nɛ́ tiʔɛ ní gè baa muɔ kpuɔmɔ pi yē bèb.
9 Fǎga mi sìi kúɔ wè nɛ́ kapiigbiʔilile ní bèleʔ;
fǎga mi kpúu nɛ́ siɛnkpuulo ní bèleʔ.
10 Peli bèle, piyē gbòboriyaʔala bèri kapiʔi kpínʔini gè,
pe kàliiye ní yè gbòboriyaʔaya
bèri yɛrɛ nùʔɔrɔ́ dè de suɔ siɛnnɛ mɛ́ bèle.
11 Nɛ̀ ki yaʔa mi wè, mi nɛ tári funviige ní.
‑Mi píle ma suɔ! Ma kpuʔɔrɔ taʔa dè mi nɛ̄ !
12 Mi 'sɔ́migɔ nɛ̀ yéri kozinge nī gè.
Yewe, m'bé kpuʔɔrɔ taʔa dè muɔ nɛ̄, gboli nī lè nàa ni 'kpúʔɔ lè.