Mi Kulocɛliɛ, gáa nɛ̄ muɔ 'mi cíi ?
22
1 Ŋúnuŋuminɔ yiɛginiwɛ wuʔu gī. ‑Ki ŋú nɛ̀ yɛli nɛ́ «Kpìɛnduumɛ Sùɔ» ŋúnugo ní gè. Dawuda ŋúnudanʔa gī gàa pe ŋú nɛ́ yakpuɔnrɔ ní dè.
2 Mi Kulocɛliɛ, mi Kulocɛliɛ,
gáa nɛ̄ muɔ 'mi wáaa ?
Muɔ 'kò liilige; muɔ sì pɛn nɛ̀ pɛ́nì mi suɔʔ,
nɛ̀ ki yaʔa mi nɛ kòkuugbuɔlɔ wáari lè.
3 Mi Kulocɛliɛ yo! Mi nɛ kòkuulo wáari lè cɛnvugo nɛ̄,
muɔ sì lúʔu m'mɛ́ʔ; pìlige nī gè, mi sì pìiriʔ.
4 Nɛ̀ sí ki yaʔa muɔ wī Tiɛlɛfun Kulocɛliɛ wè,
tɛ́niwɛ baa muɔ kùlofɔlilɔ kácunʔɔ nɛ̄ gè,
muɔ ŋáà wī Isirayɛliyé pe nìɛ kpóri wè.
5 Muɔ nɛ̄ weli tobilo pe yé puu nɛ pe sɔ̀ngirɔ tari dè,
pe yé pìye yaʔa muɔ kiyɛ nī, a muɔ 'pe píle nɛ̀ suɔ.
6 Pe 'kòkuʔulo wáa gèle muɔ kúrugu a muɔ 'pe suɔ,
pe 'pe sɔ̀ngirɔ taʔa dè muɔ nɛ̄, fìɛrɛ sì pe taaʔ.
7 Gàa ki 'mi kúɔ wè, mi yē tɔ̀gɔ pe nyaamɛ nɛ̄ bèb,
mi wè nàguɔʔ;
mi yē nɛ fìɛrɛ tɔ́ngi siɛnnɛ nɛ̄ bèle,
pe mìɛni nɛ pìye nyíɛnɛ mi nɛ̄.
8 Bìli pe mi nyaʔa wè, pe mìɛni nɛ mi tíʔɛ.
Pe mìɛni nɛ nyuɔyɔ mari yè níɛ nyùyɔ kóli yèc níɛ jo:
9 «Wiì jo lé wi 'wìi yaʔa Yewe mɛ́ lé ?
Wi‑ pa wi suɔ kìɛ !
Wi‑ pa wi yige pe kiyɛ nī yè,
a ki yē wi woli ni 'kpúʔɔ wi mɛ́ lèd !»
10 Nɛ̀ ki yaʔa Yewe, muɔ wī ma 'mi yige mi yàa liyɛ nī yè,
nɛ́ mi tuʔɔ a mi nyùgo 'télige gè
mi yàa yírigele nɛ̄ gèle yanyige nɛ̄.
11 Muɔ kiyɛ nī pe 'mi yaʔa bà pe 'mi sii wè;
bà mi 'tíi nɛ̀ yiri mi yàa liyɛ nī yè, muɔ 'puu mi Kulocɛliɛ.
12 Ma fǎga líili mi nɛ̄ʔ, nɛ́ ki cɛ́n wuʔɔgɔ kiī mi táanni;
siɛn wè bile bè mi sáʔaʔ.
13 Mi leguulo pe 'mi màʔa nɛ̀ suʔu bɛ̀ nɛ̀piɛniʔɛgɛlɛ tíɛlɛ.
Pe 'mi kpàri bɛ̀ Basan kùlo nɛ̀piɛliriye tíɛlɛe.
14 Piyē nɛ pe nyuɔyɔ múgulo yè bè mi cɛnminɛ,
bɛ̀ jàri tíɛlɛ ŋàa wi 'cuulo níɛ kaara píle dè nɛ sulugu dè.
15 Mi yē bɛ̀ luʔɔ tíɛlɛ gàa ki 'sùʔu nɛ̀ wo gè,
a mi káceye yi mìɛni 'yúgɔrɔ.
Mi nàzɔn wiī bɛ̀ sìnyinɛ tíɛlɛ
nàa ni nyɛgi mi laamɛ nī bè.
16 Mi yékpoganʔa ki 'waʔa bɛ̀ sísaligɛ tíɛlɛ,
mi nyinɛ ni 'tári mi ndɛbɛ nɛ̄ bèf.
Muɔ 'mi sínge nyɛdari nɛ̄ dè.
17 Pɔ̀nminɔ 'yéri mi táanni bè tuu mi nɛ̄;
kapiigbiʔilile gboli ni 'mi màʔa nɛ̀ suʔu,
pe 'mi kiyɛ nɛ́ mi tɔliyɔ fúrugi yèg.
18 Mi nyɛ́nì waʔa, m'bé gbɛ̀ mi káceye yi mìɛni tɔ́ri yè;
mi leguulo piyē nɛ mi wéli níɛ nyapigele yùbú gèle nɛ tɔ́ngi.
19 Pe 'mi burudo liɛlɛ dè pìye nɛ̄,
pe 'bìgele wáa bè ki cɛ́n ŋáa wi bé mi burugo líɛ gèh.
20 Yewe muɔ wè, ma fǎ sí líiliʔ !
ʔe, muɔ ŋáà wī mi ŋɔri dè, te báan fáari ma pa mi sáʔa !
21 Ma mi sìi suɔ wè kapiɛngbuɔn ŋɔsii mɛ́ wè;
pa mi cò ma yige pɔ̀nminɔ kamijinre nī dè.
22 ‑Mi suɔ jàri nyuɔ mɛ́ gè,
nɛ́ míɛni nyàʔanuɔ nyɛgɛlɛ mɛ́ gèle.
Cí ! Muɔ nyɛ́nì lúʔu m'mɛ́ !
23 M'béri muɔ wuʔu nyu gè mi siinyɛninɛ mɛ́ bèle,
béri muɔ gbùʔɔrɔ́ pe gboli sunʔɔmɔ nī bèi.
24 Yeli bálì ye fìʔɛ́ Yewe nɛ̄ wè, yeri wi gbùʔɔrɔ́ !
Yakuba siimɛ pi mìɛni, yeri wi kpóri,
Isirayɛli siimɛ pi mìɛni, yeri fún yeri yàʔará wi yiʔɛ mɛ́ gè.
25 Nɛ́ ki cɛ́n wiì puu nɛ nyígi fùrɔgɔfɔli nɛ̄ wè wi fùrɔgɔ lɛ̀lɛ nī lèʔ.
Wiì wi ŋɔrigɔ nɛ̀ sìʔɛrɛʔ; wiì wi yiʔɛ làrigɛ gè wi nɛ̄ʔ.
ʔmʔm: bà wi 'kòkuulo wáa lè wi kúrugu wè, a wi 'lúʔu wi mɛ́.
26 Yewe, muɔ kɛnmɛ nɛ̄
m'bé jáa bèri muɔ gbùʔɔrɔ́ gboli nī lè;
m'bé mi nyakungɛnyɛ fori yè bàli yiʔɛ mɛ́ pe fìʔɛ́ muɔ nɛ̄ wè.
27 Ki 'yɛli fuunmɔfɔlilɔ pe‑ lìi pe tín !
ʔaan, pe sí de Yewe gbùʔɔrɔ́, bàli bīɛlɛ wi wuulo bèle.
Pe sí sìi taa nìʔɛwɛ !
28 Siɛnfeliye nyáà yī duniya tiɛliiliye yi mìɛni nī yè,
pe bé koli bè pɛn bè pa pe sɔ̀ngirɔ taʔa dè Yewe nɛ̄ wè,
duniya nariyɛ yi mìɛni bé tuu bè cúbulo wi yiʔɛ mɛ́ gè.
29 Kùlofɔligɔ kiī Yewe wuʔu;
wire wī kùlogolo Kàfɔli wè.
30 Lɔrifɔlilɔ bèle, bàli pe líi nɛ tíngi bèle,
pe mìɛni bé tuu bè cúbulo wi yiʔɛ mɛ́ gè;
bàli piyē nɛ tíri dàala cúbugo nī gè bè kùu wè,
peli mìɛni bé tuu bè cúbulo,
bàli piyě cî gbɛ̀ yafiɛn kpíʔile bè kò sìi nɛ̄ wè.
31 Pe siimɛ bè, pire míɛni bé pari baara Yewe mɛ́,
peli míɛni béri Kàfɔli wi wuʔu nyu gè pe pìile mɛ́ bèle,
bàli pe báan pe kàduʔumɛ gè.
32 Peli míɛni béri Yewe sínmɛ wuʔu nyu gè,
bé ní ki juu bàli mɛ́ pe bága sii bèle
gàa Yewe 'kpíʔile wi wuulo mɛ́ bèle.