Yewe yo, -tànʔa kɛn m'mɛ́ !
7
1 Dawuda funbiɛnrɛ ŋúnugoa gī, gàa wi 'ŋú Yewe mɛ́ Kusib wuʔu nɛ̄ gè, ŋàa wi 'kɔ́n Bɛnzamɛ saʔa tùlugo nī gè.
2 ʔé Yewe mi Kulocɛliɛ, muɔ láara mi 'fɛ̀ nɛ̀ làri.
‑Mi suɔ pe kɔli nī, bàli pe mìɛni pe mi cìrá bèle, ‑mi suɔ pe mɛ́ !
3 Á kire bɛ̀ʔ gè, pe bé mi cɛnminɛ
majo bɛ̀ jàri wí cî yajuʔu cɛnminɛ gè,
m'bé kò kaanyigele; siɛn sǐ taa bè mi cò bè mi suɔ pe mɛ́ʔ.
4 Yewe mi Kulocɛliɛ, a ki 'nyaa mi nyɛ́nì ki kpíʔile gàa pe nyu gè,
a mi kiyɛ yi 'kapiʔi kpíʔile gè,
5 a ki 'nyaa mi 'koli mi kàdɔnwɔ wáà mɛ́,
á mi 'ki yaʔa a mi piɛn wi 'fɛ̀ nɛ̀ suɔ tànʔa fùn wèc,
6 ‑ki kpíʔile mi leguulo pe‑ mi cìra jò,
bè mi tánʔana tárigɛ nī gè bè mi fulolo wiiwe,
bé mi míʔɛ cúʔɔ gè bè màʔa. Ye‑ ŋɔ́ cɛ̀.
7 ʔé Yewe, yɛ̀ nɛ́ muɔ funyɛrigɛ ní gè !
Yɛ̀ ma yéri mi piɛnnɛ pe fundanʔanigɛ kúrugu gè !
Yɛ̀, Yewe mi Kulocɛliɛ, mi kɛnmɛ nɛ̄; ma mi sáʔa,
muɔ ŋáà ma 'kàyuʔujuuro sɔ́migɔ dè nɛ̀ tɛ́ngɛ dè.
8 Ki 'yɛli kùlogolo gboli ni‑ muɔ màʔa bè suʔu;
muɔ wè, dí muɔ sí tɛ́ni pe naamɛ gè.
9 Yewe yo, muɔ wī kùlogolo ke 'kàyuʔujuuwo wè.
‑Tànʔa kɛn m'mɛ́ mi sínmɛ pire kɛnmɛ nɛ̄,
bɛ̀ mi yē kolimɔ fùn muɔ yiʔɛ mɛ́ gè !
10 Ma siɛnpiiwe wi kakpiʔiligele yérige gèle,
má lìrimɛ le siɛnsinwɛ nī wè, muɔ ŋáà wī Kulocɛliɛ sínwɛ wè,
muɔ ŋáà ma funyɔ nɛ́ sɔ̀ngirɔ siʔɛ dè nɛ wéli dèd.
11 Kulocɛliɛ wiī mi timɔzigege,
wire wiī nɛ siɛnsinminɛ suu bèle.
12 Kulocɛliɛ yē kàyuʔujuuwo ŋáà wi síngi wè.
Kulocɛliɛ fungo kiī nɛ tanʔana cɛngɛ ó cɛngɛ siɛnpiile kúrugu bèle.
13 A siɛn ŋíì 'cíi nɛ́ jo wiǐ láʔa wi kapiʔile nɛ̄ gèleʔ,
Kulocɛliɛ nɛ̂ wi kapiɛngbuɔn ŋɔsii juɔ wèe
níɛ̀ wi sandali gbòbori gè nɛ̀ yaʔa.
14 Wiī nɛ yakpuɔnrɔ gbòborí nɛ yɛri dàa ti yɛrɛ kpúu dè,
nɛ́ kàsun ŋaayaf ní yè.
15 Ye‑ ki wéli: ŋàa wi sɔ̀ngibiire sɔ̀ngí dè,
wi 'kolimɔ laala taa lè nɛ̀ káfinɛrɛ sii dè.
16 Wiī nɛ kàwiʔi túru gè nɛ ki cùugí,
wire tíimɛ nɛ̂ koli nɛ̀ tuu ki kàwiʔi nī gè.
17 Kolimɔ kaala náà wi gbòborí lè, ni nɛ̂ koli nɛ̀ tuu wi nyùgo nī gè.
Fungbɛngɛ kele gálì wi kpínʔini gèle,
ke nɛ̂ koli nɛ̀ tuu wi kànyaa nɛ̄ gè.
18 M'béri Yewe síɛri wè wi sínmɛ pire kɛnmɛ nɛ̄,
m'béri wi míʔɛ ŋú gè: Yewe wè,
wire ŋáà wī Duniya wi Mìɛni Nyùgo nɛ̄ gè.