Cɛliwɛ kɔrigɔ nɛ́ wi nàgaʔa kele wori dè
36
1 Manase jaa Makiiri wè, wi jaa Galaadi wi siimɛ pi nariyɛ kàfɔlilɔ, peli bálì pe 'puu Yusufu tùlugo wuulo bèle, a peli 'sìʔɛrɛ nɛ̀ kpɔni Misa nɛ̄, nɛ́ Isirayɛli siɛnnɛ pe nariyɛ kàfɔlilɔ ní bèle.2 A pe 'jo: «Kàfɔli Misa, Yewe 'ki juu nɛ̀ gbɛ̀ngɛ muɔ mɛ́ nɛ́ jo ma kùlo kɛn lè kɔrigɔ Isirayɛli siɛnnɛ mɛ́ bèle, ma ni liɛlɛ nɛ́ bìgele ní gèle. Nɛ́ míɛni Yewe 'ki juu nɛ̀ gbɛ̀ngɛ muɔ mɛ́ nɛ́ jo ma kɔrigɔ kɛn weli siinyɛni Selofiyadi pórilo mɛ́ bèlea. 3 Nɛ̀ sí ki yaʔa a pe kɛ́nì kò nàguɔlɔ pálì piyeyɛ mɛ́ bèle, bàli bīɛlɛ Isirayɛli saʔa tùlugo káà kiiyɛ gè, cɛlilɛ pe kɔrigɔ ki bé yiri weli tobilo kɔrigɔ nī gè; ki bé fàri pe pɔlilɔ saʔa tùlugo wuʔu nɛ̄ gè. Bà weli kɔrigɔ gáà weli taa nɛ́ bìgele ní gèle, kàa bé yiri ki nī. 4 A Kàkpaanya Wíi yiɛlɛb ni kɛ́nì nɔ̀ lè Isirayɛli siɛnnɛ mɛ́ bèle, cɛlilɛ bálì pe dàala kɔrigɔ ki bé fàri pe pɔlilɔ saʔa tùlugo wuʔu nɛ̄ gè yire nyáà nī pe yē wè; pe kɔrigɔ ki bé yiri weli saʔa tùlugo nī gè.»
5 Kire nɛ̄ a Misa sí Yewe tunduro juu dè Isirayɛli siɛnnɛ mɛ́ bèle, nɛ̀ yɛli nɛ́ dàa Yewe 'juu wi mɛ́ dè, nɛ́ pe yɛ: «Kányiʔɛ gī dàa Yusufu saʔa tùlugo siɛnnɛ pe 'juu dè. 6 Ti n'dɛ dàa Yewe 'juu nɛ̀ gbɛ̀ngɛ Selofiyadi pórilo wori nɛ̄ dè: pe bé gbɛ̀ cepɔrigɔ kpíʔile pe nyɛ́ni nàguɔlɔ mɛ́ bàli pe 'pe dɛ́ni bèle, wi- taa puu nàguɔ wáà ŋàa wi 'kɔ́n pe tuu wi saʔa tùlugo narigɛ káà nī. 7 Bà sí ki bé puu dàala kɔrigɔ káà sǐ ga tíi yiri saʔa tùlugo káà nīʔ bè jíin saʔa tùlugo káà kiiyɛ nīʔ Isirayɛliyé sunʔɔmɔ nī bèʔ, nɛ́ ki cɛ́n Isirayɛli saʔa tùlugo ó saʔa tùlugo bé kò puʔɔ wi dàala kɔrigɔ nɛ̄ gè.
8 «A ki sí pɛ́nì nyaa cɛliwɛ wáà 'dàala kɔrigɔ taa Isirayɛli saʔa tùlugo káà nī wè, wi 'yɛli wi- puu nàguɔ mɛ́ ŋàa wi 'kɔ́n cɛliwɛ wi saʔa tùlugo narigɛ káà nī gè. Bà ki bé kpíʔile Isirayɛli siɛn ó siɛn kɔrigɔ bé kò wi tuu kpáa nī gè. 9 Kɛnmɛ báà pire nɛ̄ ki bé puu dàala kɔrigɔ kiǐ de nyaʔami de jiin saaya tùluyo yáà nī yèʔ; Isirayɛli saʔa tùlugo ó saʔa tùlugo bé kò puʔɔ ki dàala kɔrigɔ nɛ̄ gè.»
10 A Selofiyadi pórilo pe 'ki kpíʔile gàa Yewe juu nɛ̀ gbɛ̀ngɛ Misa mɛ́ wè. 11 A Mala, nɛ́ Nɔwa, nɛ́ Wogila, nɛ́ Milika, nɛ́ Tirisa, a peli 'pɔri pe nàana jaala mɛ́ bèle. 12 Pe pɔlilɔ pe 'puu Yusufu jaa Manase nariyɛ nī yè, bà ki 'kpíʔile a cɛlilɛ bálì pe kɔrigɔ ki 'kò pe tuu wi saʔa tùlugo nī gè.
13 Kele gálì keli yē kajuudiʔɛlɛ nɛ́ kàyuʔujuu kele majo bɛ̀ Yewe yé tóri Misa mɛ́ wè, nɛ́ ki juu nɛ̀ gbɛ̀ngɛ gè Isirayɛli siɛnnɛ mɛ́ bèle, baa Mowabi waama kùlo kpàanjali nɛ̄ wè Zurudɛn cáʔa táanni gè, Zeriko kàʔa yiʔɛ mɛ́ gè.