Leviiyé kàaya wori dè
35
1 Bè pe 'yaʔa baa Mowabi waama kùlo kpàanjali nɛ̄ wè Zurudɛn cáʔa táanni gè, Zeriko kàʔa yiʔɛ mɛ́ gè, a Yewe 'ki juu Misa mɛ́ nɛ́ jo: 2 «-Ki juu ma gbɛ̀ngɛ Isirayɛli siɛnnɛ mɛ́ bèle ma pe yɛ pe- tiɛyɛ yáà yaʔa pe dàala kɔrigɔ nī gè Leviiyé woyo, nyàa yi bé puu kàaya yè nyàa nī pe bé tɛ́ni yè, bé ní yajuuro nàʔadiɛyɛ kɛn pe mɛ́ kàaya táanni yèa. 3 Kàaya yire bé puu pe woyo, nyàa nī pe bé tɛ́ni yè. Kàaya tɛ́nimɛ pire bé puu yajuuro nàʔadiɛyɛ, bé ní puu pe kɔliyɛrɛ tɛ́ngɛdiɛyɛ nɛ́ yajuusɛnrɛ ní dè.4 «Yajuuro nàʔadiɛyɛ nyáà yeli bé kɛn Leviiyé mɛ́ bèle, bè ki líɛ kàʔa gungo táanni gè, yi kpúʔɔgɛnmɛ pi bé puu kabuunyiʔɛnɛ sirakogunɔ (1 000) bè kàʔa màʔa gè. 5 Yeli bé yi tɔ́nminɔ kàʔa kàduʔu mɛ́ gè. Yi píɛlɛgɛnmɛ pi mìɛni pi bé puu nubo, kayɔbiyɔ yi mìɛni nɛ̄: pi bé puu kabuunyiʔɛnɛ sirakiɛ (2 000) cɛngɛnyɛnifoligɔli mɛ́ gè, nɛ́ kabuunyiʔɛnɛ sirakiɛ (2 000) cɛngɛnyɛnifolimɛ kàliige mɛ́ gè, nɛ́ kabuunyiʔɛnɛ sirakiɛ (2 000) cɛngɛnyɛnijiingɔli mɛ́ gè, nɛ́ kabuunyiʔɛnɛ sirakiɛ (2 000) cɛngɛnyɛnijiinmɛ kàmɛgɛ mɛ́ gè. Kàʔa ki bé puu yi sunʔɔmɔ nī. Kire nàʔadiɛyɛ yi bé puu bè kàaya màʔa yè bè suʔu.
6,7 «Yeli bé kàaya togosiin nɛ́ kataanri kɛn Leviiyé mɛ́ bèle; yi mìɛni bé puu nɛ́ yajuuro nàʔadiɛyɛ ní. Kàaya nyáà nī yè, yeli bé yàa kɔlini nyíɛnɛ bè kɔ̀n yi- puu líʔirejodiɛyɛ, nyàa nī siɛnkpuuwo wi bé gbɛ̀ fɛ̀ bè jíin wè. 8 Kàaya nyáà yeli bé kɛn pe mɛ́ yè, yi bé kɔ̀n Isirayɛliyé dàala kɔrigɔ nī gè. Yeli bé líɛ nìʔɛgɛ bìli mɛ́ pe 'taa nìʔɛgɛ wè, bé sí líɛ cɛ̀ri bìli mɛ́ pe 'taa cɛ̀ri wè. Saʔa tùlugo ó saʔa tùlugo bé sí kàaya kɛn Leviiyé mɛ́ bèle bè yɛli nɛ́ kɔrigɔ ní gè gàa pe 'taa gè.»
Líʔirejo kàaya wori dè
«A yeli kɛ́nì Zurudɛn cáʔa jeli gè nɛ̀ jíin Kanaa kùlo nī lè, 11 yeli bé kàaya yáà nyíɛnɛ bè kɔ̀n nyàa yi bé puu líʔirejo woyo yè. A wàa 'siɛn kpúu a ki 'nyaa wiì ki kɔ̀rirɔ wèʔ, wi bé sa líʔire jó yi nīb. 12 Kàaya nyáà yi bé puu líʔirejodiɛyɛ bè siɛn suɔ sìsiɛn fuʔɔtɔnvɔlic mɛ́ wè, kire ga buu siɛn ŋáà wi 'siɛn wáà kpúu wè, pe fǎga wi kpúuʔ bè ki yaʔa wiì fìɛ nɔ̀ gboli nɛ̄ lèʔ pe- kàyuʔu juu gè wi nɛ̄ʔ.
13 «Kire nɛ̄ yeli bé kàaya kɔlini nyíɛnɛ bè kɔ̀n yi- puu líʔirejo kàaya. 14 Kàaya taanri bé puu Zurudɛn cáʔa lìʔɛlɛ nī lè cɛngɛnyɛnifoligɔli mɛ́ bè, nɛ́ kàaya taanri baa Kanaa kùlo nī lè. Yire bé puu líʔirejodiɛyɛ. 15 Isirayɛli siɛnnɛ nī bèle, nɛ́ nabɔnminɔ ní bèle bàli pe tòrí bèle, nɛ́ nabɔnwɔ ŋáà wī tɛ́niwɛ pe sunʔɔmɔ nī bè, siɛn ó siɛn wi 'siɛn kpúu nɛ̀ ki yaʔa wiì ki kɔ̀rirɔ wèʔ, wi bé fɛ̀ bè sa jíin yi nī. Yire kàaya nyáà kɔlini yi bé puu líʔirejodiɛyɛ.
16 «A ki sí nyaa siɛn wáà 'wàa kpúɔn nɛ́ timɔri ní dè, a ki siɛn wi 'kùu wè, kire siɛn wi nyɛ́nì ki kɔ̀rirɔ nɛ̀ siɛn kpúu wī. Pe bé wi kpúu míɛni.
17 «A ki sí nyaa siɛn wáà 'kàdɛnigɛ líɛ gàa ki bɛ̀ gbɛ̀ siɛn kpúu wè, nɛ̀ wàa kpúɔn a wi 'kúu wè, kire siɛn wi nyɛ́nì ki kɔ̀rirɔ nɛ̀ siɛn kpúu wī. Pe bé wi kpúu míɛni.
18 «A ki sí nyaa siɛn wáà 'wàa kpúɔn nɛ́ tiige yɛgɛ ní gàa ki bé gbɛ̀ siɛn kpúu wè, a ki siɛn wi 'kùu wè, kire siɛn wi nyɛ́nì ki kɔ̀rirɔ nɛ̀ siɛn kpúu wī. Pe bé wi kpúu míɛni. 19 Siɛn ŋáà wī sìsiɛn fuʔɔtɔnvɔli wè, kire siɛn wire wi bé wi kpúu a wi kɛ́nì wi nyaa wè. Wire wi bé wi kpúu.
20 «A ki sí nyaa wi 'ki kɔ̀rirɔ nɛ̀ wi siɛnnyɛni ŋɔrigɔ wè bɛ̀ wi 'wi biɛn wè, á kire bɛ̀ʔ a wi 'ki kɔ̀rirɔ nɛ̀ wi wáa nɛ́ yakaa ní, a siɛn 'wi kùu wè, 21 á kire bɛ̀ʔ a wi 'ki kɔ̀rirɔ nɛ̀ wi kpúɔn nɛ́ wi kɔli ní gè, a ki siɛn wi 'kùu wè, kire siɛn wi nyɛ́nì ki kɔ̀rirɔ nɛ̀ siɛn kpúu wī. Sìsiɛn fuʔɔtɔnvɔli, wire ŋáà wi kpɔni kpúu nɛ̄ wè, wi bé wi kpúu a wi kɛ́nì wi nyaa wè.
22 «Á kire bɛ̀ʔ gè, a ki sí nyaa wi 'fuu nɛ̀ siɛn ŋɔrigɔ wè, nɛ̀ ki yaʔa wiì ki kɔ̀rirɔ wèʔ, kire ga laa a wi 'yakaa wáa nɛ̀ ki yaʔa wiì ki kɔ̀rirɔ wèʔ, 23 á kire bɛ̀ʔ a wi 'kàdɛnigɛ wáa a ki sɛ́nì tuu wi nɛ̄ nɛ̀ wi kpúu wè, nɛ̀ ki yaʔa wiì wi nyaaʔ, a ki siɛn wi 'kùu wè, nɛ̀ ki yaʔa wiì puu wi leguu wèʔ, wiì puu nɛ caa bè kapiʔi kpíʔile wi nɛ̄ wèʔ, 24 gboli ni bé kàyuʔu juu gè nɛ́ ŋàa ní wi 'wi kpúɔn wè nɛ́ sìsiɛn fuʔɔtɔnvɔli ní wè, wire ŋáà wī kpɔni kpúu nɛ̄ wè, nɛ̀ yɛli nɛ́ kàyuʔujuu kele ní gèle. 25 Bà gboli ni bé wi píle bè suɔ sìsiɛn fuʔɔtɔnvɔli wi kɔli nī gè, bé koli wi tórigo líʔirejo kàʔa mɛ́ gè gàa mɛ́ wi yé fɛ̀ nɛ̀ kɛ́ gè. Wi bé kò baa ki nī fúɔ bè taa kacuɔnrilɔ kàfɔli ŋáà pe 'nyíɛnɛ nɛ̀ kɔ̀n nɛ́ sùnmɔ wàlidɛngɛbɛ ní bè, wire pa kùu.
26 «A ki sí nyaa kire siɛn wè, ŋàa wi sì ki kɔ̀rirɔ nɛ̀ siɛn kpúu wèʔ, a wi 'yiri nɛ̀ tóri líʔirejo kàʔa ki láʔagɛlɛ nɛ̄ gèle gàa nī wi fɛ̀ nɛ̀ jíin gè, 27 á sìsiɛn fuʔɔtɔnvɔli wi 'ki nyaa a wi 'tóri líʔirejo kàʔa ki láʔagɛlɛ nɛ̄ gèle, a wi 'wi kpúɔn nɛ̀ kpúu wè, kire bè nyaa wiì kolimɔ kpíʔile nɛ̀ siɛn kpúuʔ. 28 Kire nɛ̄ ŋàa wiì ki kɔ̀rirɔ nɛ̀ siɛn kpúu wèʔ, wi 'yɛli bè kò líʔirejo kàʔa nī gè fúɔ bè taa kacuɔnrilɔ kàfɔli wi pa kùu. Wire kùulo lire kàduʔumɛ yákuɔ wi bé nɛ́ gbɛ̀ kɛ́ wi tiʔɛ mɛ́ gè.
29 «Dàa tire dī fànʔa kele nɛ́ kàyuʔujuulo wori dè, yeli mɛ́ nɛ́ kɛ̀ngɛlɛ ke mìɛni ní, tiɛyɛ yi mìɛni nī baa yeli bé tɛ́ni wè.
30 «Gàa ki 'siɛnkpuu wori kúɔ dè, pe bé siɛn kpúu wè yákuɔ wī ŋàa wi 'wàa kpúu wè a siɛnnɛ 'ti juu nɛ́ jo kányiʔɛ gī wè. Kiì yɛli pe- kàyuʔu juu siɛn wáà nɛ̄, bè wi kpúu siɛn nigbe siɛnjuuro nɛ̄ʔd. 31 Yeli sǐ ga tíi fɔ̀li ki nɛ̄ʔ bè ki yaʔa siɛnkpuuwo wi 'wi sìi suɔ wè nɛ́ wali níʔ, a ki yē wi 'ki kɔ̀rirɔ nɛ̀ wi kpúu wī; ki 'yɛli pe- wi kpúu wī. 32 Yeli sǐ ga tíi ki yaʔa siɛn ŋáà wi 'wi siɛnnyɛni kpúu wè nɛ̀ sɛ́nì jíin líʔirejo kàʔa nī gèʔ, wi- wali sàri bè koli bè kɛ́ wi kòridiʔɛ nī gè sɛ́ni kacuɔnrilɔ kàfɔli wi 'kùu wèʔ. 33 Yeli sǐ ga tíi kùlo núʔɔ lè Yewe yiʔɛ mɛ́ gèʔ nàa nī yeli yē tɛ́ninɛ bèleʔ.