Tɔ́rilɔ 25

Isirayɛliyé pe 'Baali sun wè

1 Bà siɛnnɛ pe 'puu baa tɛ́ninɛ Sitimi tiʔɛ nī gè, a nàguɔlɔ pe 'kanuʔɔrɔ kpíʔile níɛ cɛlilɛ caa bèle. 2 A cɛlilɛ bálì pe 'kò nɛ pe yeri peri pe yasunro sungu dè. A Isirayɛli siɛnnɛ pe 'kò nɛ pe yasunro suro líi dè, a pe 'tuu nɛ̀ cúbulo yasunro ti yiʔɛ mɛ́ gè níɛ ti tobilo. 3 A Isirayɛli siɛnnɛ pe 'kɛ́ nɛ̀ sɛ́nì sun wè, a fungo ki 'sɔ́migɔ nɛ̀ yɛ̀ pe kúrugu kpuʔɔ.

4 A Yewe 'ki juu mɛ́ nɛ́ jo: «-Nàguɔlɔ cò bèle, bàli pe 'siɛnnɛ yiʔɛ kíni gè kapiile náà nī lè. Ma pe súbulo ma nɔrigi tiiye nɛ̄ yè, cɛngɛ nɛ̄ gè, Yewe yiʔɛ mɛ́ gè, kire ga buu Yewe funyɛrigɛ ki 'tìgi Isirayɛli siɛnnɛ kúrugu bèle.»

5 A Misa 'ki juu Isirayɛli kàyuʔujuufɔlilɔ mɛ́ bèle nɛ́ jo: «Ye mìɛni nigbe nigbe bèle, ye- yɛ̀ ye siɛnnɛ bálì cò bèle ye pe kpúu, bàli pe sɛ́nì Baali Peyɔri sun wè.»

6 Bè pe 'yaʔa tire nɛ̄ dè, a Isirayɛli nàguɔ wáà 'fali nɛ̀ pɛ́nì tóri pe táanni nɛ́ ní, wi siinyɛninɛ sunʔɔmɔ nī bè, nɛ́ Misa wire tíimɛ nyaamɛ nɛ̄ nɛ́ Isirayɛli tògo siɛnnɛ pe mìɛni nyaamɛ nɛ̄, bàli pe 'puu yérile nɛ nyɛni bèle wìile nɛ̄ lè.

7 Finɛyasi wè, jaa wè, ní wi tuuliʔɛ gè, a wire 'pe nyaa, a wi 'fali nɛ̀ yɛ̀ Isirayɛli tògo siɛnnɛ pe mìɛni sunʔɔmɔ nī bè, nɛ̀ sɛ́nì tàbɛ líɛ wè nɛ̀ cò wi kɔli nī gè, 8 nɛ́ taʔa Isirayɛli nàguɔ nɛ̄ wè nɛ̀ sɛ́nì jíin wi fɛ̀ni saʔa laamɛ nī bè. Kire tiʔɛ nī gè, a wi 'pe mìɛni siin súu bèle nɛ̀ fùru, a tàbɛ wi 'nàguɔ kàduʔu fùru gè nɛ̀ jíin cɛliwɛ wi liyɛ nī yè. Bà wuʔɔgbuʔɔ ki yé tuu Isirayɛli siɛnnɛ nɛ̄ bèle, a ki 'yéri. 9 Kire nɛ́ ki mìɛni siɛnnɛ bálì nyuɔ ki yé kùu wuʔɔgbuʔɔ nī gè, a ki 'nyaa siɛnnɛ siramuʔɔyɔ kɔlini (24 000).

10 A Yewe sí ki juu Misa mɛ́ nɛ́ jo: 11 «Finɛyasi wè, Eleyazari jaa wè, kacuɔnriwɔ Arawɔn ní wi tuuliʔɛ gè, wire nyɛ́nì mi fungo nyígi gè Isirayɛli siɛnnɛ kúrugu bèle, kayaʔa gáà ki 'puu wi nī mi kɔli mɛ́ gè. A kire 'ki yaʔa mi sì Isirayɛli siɛnnɛ pe mìɛni kpúuʔ, bà pe kpúu láa ki 'puu mi nɛ̄ gè, bà mi yé pe nyaa a pe 'yiɛlere dáà kpíʔile dè mi nɛ̄ mmɛ gè.

12 «Kire kɛnmɛ nɛ̄, ma ki juu wi mɛ́ ma wi yɛ, m'bé yanyige kpíʔile nɛ́ wi ní, 13 gàa ki bé puu wire nɛ́ wi siimɛ ní bè pe wuʔu gè. Kire nyakungɛngɛ gáà kire bé puu baara ti bé puu peli wori lɛ̀lɛ ó lɛ̀lɛ. Nɛ́ ki cɛ́n wire nyɛ́nì wi kayaʔa tìɛ gè wi Kulocɛliɛ kɔli mɛ́ gè. Kaala náà wi 'kpíʔile lè, wi nyɛ́nì kàsulugosuɔ baara kúɔ dè Isirayɛli siɛnnɛ mɛ́ bèle.»

14 Isirayɛliyé nàguɔ ŋáà wi cé Madiyanyé cuɔ kɔ́ri wè nɛ̀ nyɔ́gɔ saʔa nī gè á pe 'wi kpúu wè, pe 'puu nɛ wi míʔɛ yeri gè Zimiri. Wi yé puu Salu jaa, wire ŋáà wi 'puu tuufɔli kpáa káà kàfɔli, Simɛyɔ saʔa tùlugo nī gè. 15  cuɔ ŋáà pe yé kpúu wè, pe 'puu nɛ wi míʔɛ yeri gè Kozibi. Wi yé puu Zuri póri. Zuri wire 'puu wi tuuliʔɛ káà kpáafɔli, nɛ́ Madiyan saʔa tùlugo káà kàfɔli.

16 A Yewe sí ki juu Misa mɛ́ nɛ́ jo: 17 «Ye- sa tuu Madiyanyé nɛ̄ bèle ye pe kpúɔn, 18 nɛ́ ki cɛ́n pe nyɛ́nì tuu yeli nɛ̄ sìnjilige nɛ̄, Peyɔri kele nɛ̄ gèle; Kozibi sí pe yé líɛ, pe kàfɔli wáà póri wè, cɛliwɛ ŋáà yeli yé kpúu wè, wuʔɔgbuʔɔ lɛ̀lɛ nī lè, wuʔɔgbuʔɔ gáà ki yé puu Baali Peyɔri kele wuʔu gè.»