Balaami 'diba kpíʔile wè Isirayɛliyé mɛ́ bèle
23
1 A Balaami 'ki juu Balaki mɛ́ nɛ́ jo: «-Gbùʔɔrɔdiɛyɛ yáà kɔlisiina faan náʔa gè, ma sí nɛ̀piʔɛlɛ kɔlisiin caa, nɛ́ sìnbapɛnyɛ kɔlisiin ní.»2 A Balaki 'ki kpíʔile gàa Balaami yé juu gè. A pe 'wúɔ nɛ̀ nɛ̀piʔɛlɛ kɔlisiin nɛ́ sìnbapɛnyɛ kɔlisiin kpúu yè nɛ̀ taʔa gbùʔɔrɔdiɛyɛ yi mìɛni nigbe nigbe nɛ̄ yè.
3 A Balaami 'ki juu Balaki mɛ́ wè nɛ́ jo: «Sa yéri muɔ kakuɔrɔ kaasuʔuro tiʔɛ táanni gè. Mi wè, m'bé sìʔɛrɛ cɛ̀ri. Dùʔɔ Yewe bé pɛn bè pa mi kpàli. Siɛnrɛ dáà wi bé juu m'mɛ́ dè, a ti yē kɛnmɛ ó kɛnmɛ nɛ̄, m'bé ti juu bè tìɛ muɔ nɛ̄.» A wi 'kɛ́ nɛ̀ sɛ́nì tánʔa nyagurugo káà nɛ̄, gàa gī sédali wuʔu gèʔ.
4 A Kulocɛliɛ sí wìi tìɛ Balaami nɛ̄, a Balaami sí ki juu wi mɛ́ nɛ́ jo: «Mi nyɛ́nì gbùʔɔrɔdiɛyɛ kɔlisiin faan nɛ̀ yérige, nɛ́ sí nɛ̀piʔɛlɛ kɔlisiin nɛ́ sìnbapɛnyɛ kɔlisiin kpúu yi mìɛni nigbe nigbe nɛ̄ yè.»
5 A Yewe sí siɛnrɛ nyɔ́gɔ dè Balaami nyuɔ nī gè, dàa wi 'yɛli bè juu dè, nɛ́ wi yɛ: «Koli mari waa Balaki kúrugu wè, ma sa ki juu wi mɛ́.»
6 A Balaami 'koli nɛ̀ kɛ́ Balaki kúrugu wè, nɛ́ sɛ́nì wi nyaa yériwe wi kakuɔrɔ kaasuʔuro tiʔɛ nī gè, nɛ́ Mowabi kùlo kàfɔlilɔ pe mìɛni ní bèle. 7 A Balaami 'fali nɛ̀ séli nɛ wi kanyaamijuʔulob nyu gèle nɛ́ jo:
«Balaki, wire wi 'mi kɔ́ri nɛ̀ pɛn nɛ̀ kɔ́n
Arami kùloc mɛ́ lè;
ʔaan, Mowabi kùlofɔli
wi 'mi kɔ́ri nɛ̀ kɔ́n
nyaguruyo mɛ́ yè
cɛngɛnyɛnifoligɔli
mɛ́ gè,
nɛ́ jo m'báa dɛ́ngɛ taʔa wè
Yakuba nɛ̄ wè !
‹Te báan ma pa dɛ́ngɛ taʔa wè
Isirayɛli siɛnnɛ
nɛ̄ bèle !›
8 ʔé ! Mɛni sí m'bé jáa bè dɛ́ngɛ
siɛnrɛ juu dè bè taʔa
ŋàa nɛ̄ Kulocɛliɛ sì dɛ́ngɛ
siɛnrɛ juu dè
nɛ̀ taʔa dèʔ ?
Mɛni sí m'bé pe
cúʔɔmɔ wori juu dè
siɛnnɛ bálì mɛ́ Yewe sì
cúʔɔmɔ wori juu dèʔ ?
9 Bè mi yaʔa kàdɛnigbaʔala
nyùyɔ nɛ̄ yè,
nɛ́ nyaguruyɛliyɛ naamɛ gè,
mi nɛ pe wéli.
M'bɛlɛ piyē siɛnfelige káà
gàa ki 'wàli nɛ̀ tɛ́ni
kiiyɛ gè.
Pe wè nɛ pìye wéli numinɔ
nɛ́ siɛnsɛnminɛ ní bèleʔ.
10 Ŋáa bé gbɛ̀ Yakuba
siɛnniʔɛmɛ tɔ́ri bè,
bɛ̀ pe 'niʔɛ bɛ̀ dàrimiʔɛ
tíɛlɛd gè ?
Ŋáa bé gbɛ̀ Isirayɛliyé
tílaga sicɛriwuʔu nyuɔ
tɔ́ri gè ?
Mi tíimɛ nɛ caa bè kùu
bɛ̀ siɛnsinminɛ bálì
tíɛlɛ bèle.
Ki 'yɛli mi kúɔgɛnmɛ
pi- ba nyaa pe tíɛlɛ.»
11 A Balaki wi sí ki juu Balaami mɛ́ wè nɛ́ jo: «Gáa ma kpínʔini mi nɛ̄ mmɛ gè ? Mi 'muɔ kɔ́ri nɛ̀ pɛn ma pa dɛ́ngɛ juu wè ma wáa mi leguulo nɛ̄ bèle o, á mi ń'nɛ̀ pɛ́nì ki nyaa muɔ nɛ diba kpínʔini wè pe mɛ́ !»
12 A Balaami sí ki juu wi mɛ́ nɛ́ jo: «Mi sì yɛli lé bèri Yewe siɛnrɛ tire yákuɔ nyuʔ, dàa wi 'le mi nyuɔ nī gè lé ?»
Balaami 'diba kpíʔile wè taziinwuʔu nɛ̄ gè
13 A Balaki ń'nɛ̀ wi yɛ: «Te báan we- kɛ́ tiʔɛ káà kiiyɛ nī cígini, tiʔɛ gíì nī muɔ bé siɛnnɛ bálì nyaa bèle. Kire tiʔɛ nī gè, muɔ bé sa pàli cɛ̀ri yákuɔ nyaa; muɔ sǐ ga tíi pe mìɛni nyaaʔ. Baa muɔ bé dɛ́ngɛ siɛnrɛ juu dè bè taʔa pe nɛ̄ kire tiʔɛ nī gè.»
14 A Balaki ń'nɛ̀ wi kɔ́ri nɛ̀ kɛ́ kùlo ni wélifɔlilɔ tiʔɛe káà nī gàa gī Pisiga nyagurugo naamɛ gè. A Balaki ń'nɛ̀ gbùʔɔrɔdiɛyɛ yáà kɔlisiin faan baa kire tiʔɛ nī gè, nɛ́ sí nɛ̀piʔɛlɛ kɔlisiin nɛ́ sìnbapɛnyɛ kɔlisiin kpúu yè nɛ̀ taʔa gbùʔɔrɔdiɛyɛ yi mìɛni nigbe nigbe nɛ̄ yè.
15 A Balaami 'ki juu Balaki mɛ́ wè nɛ́ jo: «Te báan ma pa yéri kakuɔrɔ kaasuʔuro tiʔɛ gáà nī gè, dí mi sí kɛ́ bàa Yewe kpàli wè.»
16 A Yewe sɛ́nì Balaami kpàli wè, nɛ́ siɛnrɛ nyɔ́gɔ dè wi nyuɔ nī gè nɛ́ jo: «Te waa Balaki kúrugu wè, ma sa ki juu wi mɛ́ dàa mi 'juu muɔ mɛ́ dè.»
17 A Balaami 'koli nɛ̀ pɛn Balaki kúrugu wè nɛ̀ pɛ́nì wi nyaa yériwe wi kakuɔrɔ kaasuʔuro tiʔɛ táanni gè nɛ́ Mowabi kùlo kàfɔlilɔ ní bèle. A Balaki 'fali nɛ̀ wi yúgo nɛ́ jo: «Gáa Yewe wi 'juu ?»
18 A Balaami ń'nɛ̀ koli nɛ wi kanyaamijuʔulo nyu gèle nɛ́ jo:
«Yɛ̀, Balaki, mari lúru !
Zipori jaa, -muɔ ngbúʔulo
múgu gèle cɛ̀ngɛ !
19 Kulocɛliɛ wi wè siɛn,
bèri finɛnɛʔ.
Wi míɛni sí wè lewiiwe
bɛ̀ weli tíɛlɛʔ, bàga jo:
‹A mi cé cɛ́n !›
Wi nɛ̂ kaala juu lé ka laa
wi nɛ̌ ni kpíʔileʔ ?
Wi 'siɛnrɛ juu lé dàa wiì kɛ́nì
fori dèʔ ?
20 Ki n'gɛ mi nyɛ́nì
wi diba siɛnrɛ taa dè
bè juu yeli mɛ́.
Wi nyɛ́nì diba taʔa wè;
mi sǐ gbɛ̀ wi láʔaʔ.
21 Cúʔɔmɔ wè nɛ báan baaʔ,
bàa pi bé Yakuba taa wè.
Fuunmɔ wè nɛ nyaʔaʔ,
bàa pi báan Isirayɛli
siɛnnɛ kúrugu bèleʔf.
Yewe pe Kulocɛliɛ wè,
wiī nɛ́ pe ní;
pe 'wi nyíɛnɛ nɛ̀ kɔ̀n
pe Kùlofɔli.
22 Kulocɛliɛ wire tíimɛ wi nyɛ́nì
pe yige Ezipiti kùlo
nī lè.
Pe ŋɔri tiī bɛ̀ nyàʔanuɔ tíɛlɛ.
23 Nɛ́ ki cɛ́n dɛ́ngɛ wè
Yakuba nɛ̄ʔ.
Kanyaajuulo sìpiile míɛni
wè Isirayɛli nɛ̄ wèʔg.
Píra ŋáà nī wè, gàa ki bé gbɛ̀
juu Yakuba wuʔu gè
nɛ́ Isirayɛli wuʔu gè:
‹Ye- ki wéli
gàa Kulocɛliɛ 'kpíʔile gè !›
24 Ki n'gɛ kùlo náà siɛnnɛ
piyē bɛ̀ jàricuɔ tíɛlɛ,
wi nɛ̂ yɛ̀ nɛ̀ yéri;
piyē nɛ yɛ̀gí bɛ̀ jàrih tíɛlɛ,
wi nɛ̌ sínɛ ka laa
wi nɛ̂ wi kaara káa dèʔ,
ka laa wi nɛ̂ wi kaaliɛlɛ
sìsiɛn gbuɔ gèʔ.»
25 A Balaki wi sí Balaami yɛ̀ wè: «A muɔ sì jáa bè dɛ́ngɛ juu wè bè wáaʔ, ma fǎga ní de diba kpínʔini wè pe mɛ́ cíginiʔ !»
26 A Balaami 'siɛnnugoro kɛn dè nɛ́ jo: «Mi sì yé ki juu muɔ mɛ́ lé nɛ́ jo: ‹Gàa Yewe bé jo mi- kpíʔile gè, kire m'bé juu lé ?› »
Balaami 'diba kpíʔile wè tadaanriwuʔu nɛ̄ gè
27 A Balaki 'ki juu Balaami mɛ́ nɛ́ jo: «Te báan, mi nɛ muɔ fiɛn wī, m'bé kɛ́ nɛ́ muɔ ní tiʔɛ káà kiiyɛ nī; dùʔɔ baa kire tiʔɛ nī gè Kulocɛliɛ bé yéri ki nɛ̄ muɔ dɛ́ngɛ siɛnrɛ juu dè ma wáa siɛnnɛ bálì nɛ̄ bèle.»
28 A Balaki wi ń'nɛ̀ Balaami kɔ́ri wè nɛ̀ kɛ́ Peyɔri nyagurugo naamɛ gè. Kire tiʔɛ nī gè siɛn cî gbɛ̀ waama kùlo ni mìɛni wéli bè nyaa.
29 A Balaami wi ń'nɛ̀ ki juu Balaki mɛ́ wè nɛ́ jo: «-Gbùʔɔrɔdiɛyɛ yáà kɔlisiin faan m'mɛ́ náʔa gè, bɛ̀ nyìi tíɛlɛ yè, ma nɛ̀piʔɛlɛ kɔlisiin nɛ́ sìnbapɛnyɛ kɔlisiin kpúu yè.»
30 A Balaki 'ki kpíʔile gàa Balaami yé juu gè. A wi 'ti kɔ̀n kakuɔrɔ kaasuʔuro, nɛ́ nɛ̀piʔɛlɛ kɔlisiin nɛ́ sìnbapɛnyɛ kɔlisiin kpúu yè nɛ̀ taʔa gbùʔɔrɔdiɛyɛ yi mìɛni nigbe nigbe nɛ̄.