Tɔ́rilɔ 14

Isirayɛliyé piyè sori nɛ̀ jíin nyakungɛngɛ kùlo nī lèʔ

1 A Isirayɛli tògo siɛnnɛ pe 'pínɛ nɛ̀ yékpuʔulo wáa gèle, a siɛnnɛ pe 'nyɛni kire pìlige nī gè. 2 A tògo siɛnnɛ pe mìɛni nɛ́ sànʔa wè, nɛ́ jo: «A weli yé cɛ́nì kùu baa kùlo nī lè, kire ga laa waama kùlo nī lè o ! 3 Gáa kɛnmɛ nɛ̄ 'weli kɔ́ri nɛ̀ pɛn náʔa kùlo náà nī lè, kire ga buu pe- pa weli kpúu nɛ́ kapiɛngbuɔn ŋuʔɔnɔ ní gèle, bé sí weli cɛlilɛ nɛ́ weli pìile líɛ bèle bè taa kapiɛnnɛ tɔ̀ni ? Kiì pɔ́riʔ lé, weli 'koli bèri waa Ezipiti kùlo mɛ́ lè ?»

4 A pe 'fali nɛ ki nyu nɛ mári pìye mɛ́ nɛ́ jo: «Ye- tí we- yiɛginiwɛ wáà nyíɛnɛ we kɔ̀n, we sí koli weri waa Ezipiti kùlo mɛ́ lè !»

5 A Misa nɛ́ Arawɔn 'fali nɛ̀ tuu nɛ̀ yiɛyɛ cúbulo yè dàala nɛ̄ lè, Isirayɛli tògo siɛnnɛ pe mìɛni yiʔɛ mɛ́ gè, bàli pe 'puu gbuʔulilo bèle.

6 A Nuni jaa wè, wè, nɛ́ Yefunɛ jaa wè, Kalɛbi wè, peli bálì pe 'puu nɛ́ tundunminɔ ní bèle bàli Misa cé tun bèle a pe sɛ́nì kùlo saanri lè nɛ̀ wéli lè, a peli 'fali nɛ̀ pe burudo píle dè nɛ̀ cɛnminɛ, 7 nɛ́ fali nɛ̀ ki juu Isirayɛli tògo siɛnnɛ pe mìɛni mɛ́, nɛ́ jo: «Kùlo náà weli sɛ́nì saanri nɛ̀ wéli lè, kùlo náà ni tɔ̀ni yē cɛ̀nnɛ. Kùlo náà ni tɔ̀ni nɛ̀ sɔ́migɔ nɛ̀ nyuɔ, weli wuulo ! 8 A Yewe sí ki nyaa wi bé kacɛ̀ngɛ kpíʔile weli mɛ́ wè o, wi bé weli kɔ́ri bè kɛ́ kùlo náà mɛ́ lè bè ni kɛn weli mɛ́ lè o, kùlo náà nī nɛ̀yirimɛ nɛ́ sárigɛ kiī nɛ fúu gè.

9 «Gìi sí gī baa gè, kiì yɛli weli cíi Yewe nɛ̄ wèʔ. We fǎga de fìʔɛ́ kùlo náà ni siɛnnɛ nɛ̄ bèleʔ; pe cɛ́ni yē sipiɛlɛ wī weli mɛ́. Weli bé cɛ pe jáa wī. Pe kulocɛlɛlɛ nyúmɔ pi cɛ́nì láʔa pe nɛ̄; gàa sí ki weli kúɔ gè, Yewe yē nɛ́ weli ní. Ye fǎga tí weri fìʔɛ́ pe nɛ̄ʔ.»

10 A Isirayɛli tògo siɛnnɛ pe mìɛni 'fali nɛ ki nyu nɛ́ jo: «Ye- tí we- pe wáa nɛ́ kàdari ní !»

A Yewe cɛ̀nmɛ nɛ́ wi kpuɔmɔ pi 'fali nɛ̀ tìgi nɛ̄ gè.

Misa 'Yewe náari wè wi- ki yaʔa Isirayɛliyé nɛ̄ bèle

11 A 'ki juu mɛ́ nɛ́ jo: «Fúɔ lɛ̀lɛ jori nī siɛnnɛ bálì pe bé cíi mi nɛ̄ wè ? Fúɔ lɛ̀lɛ jori nī pe bé cíi bè tɛ́ngɛ mi nɛ̄ wè, nɛ̀ sí ki taa mi bálì kpíʔile bèle pe sunʔɔmɔ nī bè ? 12 M'bé pe kpúɔn nɛ́ káfaligɛ yaama ní bè, bè pe yérige piyě kùlo taa lè kɔrigɔʔ. M'bé sí ki kpíʔile kùpolo láà bé yiri muɔ nī nàa siɛnnɛ pe 'niʔɛ nɛ̀ tóri pe nɛ̄ bèle, nɛ́ míɛni ni ŋɔri ti 'kpúʔɔ nɛ̀ tóri pe nɛ̄ bèle.»

13 A Misa 'ki juu Yewe mɛ́ nɛ́ jo: « siɛnnɛ pe 'ki cɛ́n muɔ nyɛ́nì siɛnnɛ bálì yige bèle peli sunʔɔmɔ nī bè nɛ́ muɔ ŋɔri ní dè. 14 Pe nyɛ́nì ki juu Kanaa kùlo siɛnnɛ mɛ́ bèle a pe 'ki lúʔu nɛ́ jo muɔ wè, Yewe, muɔ yē pe sunʔɔmɔ nī, nɛ́ míɛni muɔ Yewe wè, muɔ nyɛ́nì mìɛ tìɛ pe nɛ̄ a pe 'muɔ nyaa. Muɔ kàsadibagɛ ki nɛ̂ yéri pe nyùgo nī gè nɛ̀ pe yiʔɛ kíni gè, kàsadibagɛ sìtɔnigɔ nī gàa ki 'cùungu cɛngɛ nī gè, nɛ́ kàsadibagɛ kàsun sìtɔnigɔ ní pìlige nī gè.

15 «Kire nɛ̄ a muɔ siɛnnɛ bálì pe mìɛni pínɛ nɛ̀ kpúu bɛ̀ siɛn nigbe tíɛlɛ wè, kùlogolo gálì ke 'muɔ wori lúʔu dè, pe bé jo: 16 ‹Ŋɔri sì puu Yewe mɛ́ʔ bè jáa bè pe nyɔ́gɔ kùlo nī lèʔ nàa wuʔu nɛ̄ wi yé nɛ̀ kɛn pe mɛ́ wè. Kire kɛnmɛ nɛ̄ wi 'pe kɔ́ri nɛ̀ pɛn waama kùlo náà nī lè nɛ̀ pɛ́nì pe kpúu náʔa.›

17 «Kire nɛ̄ mi nɛ muɔ náari mi , -ki yaʔa muɔ fànʔa ki- kìi tìɛ nɛ́ muɔ ŋɔri ti mìɛni ní dè. Ma ki kpíʔile ma yɛli nɛ́ dàa ní muɔ yé juu dè: 18 ‹Yewe fungo kiì yɛ̀ madɛniʔ; wi bànguɔ dɛ́nigɛ ki 'kpúʔɔ nɛ̀ tóri. Wiī nɛ kolimɔ nɛ́ tuudiʔɛlɛ yɛri gèle siɛnnɛ nɛ̄ bèle, nɛ̀ ki yaʔa wi wè tànʔa kanʔa siɛn mɛ́ʔ ŋàa wī kolimɔfɔli wèʔ. Wi nɛ̂ tuufɔlilɔ pe kolimɔ tɔ́ri bè pe pìile kúrugu bèle, fúɔ bè taa kɛ̀ngɛlɛ taanriwoli nɛ́ sicɛriwoli nɛ̄ lè.› 19 Kire kɛnmɛ nɛ̄ mi nɛ muɔ náari, ma siɛnnɛ bálì pe kolimɔ yaʔa bè pe nɛ̄ nɛ̀ yɛli nɛ́ muɔ bànguɔ dɛ́nigɛ kpúʔɔgɛnmɛ ní bè, majo bɛ̀ muɔ 'ki yaʔa siɛnnɛ bálì nɛ̄ bèle nɛ̀ ki séli Ezipiti kùlo nī lè fúɔ nɛ̀ pɛ́nì nɔ̀ náʔa gè.»

Bàli pe 'cíi Yewe nɛ̄ wè piyě ga tíi kùlo nyaa lèʔ

20 A wi 'jo: «M'bé ki yaʔa pe nɛ̄ majo bɛ̀ muɔ 'ki náari gè. 21 Kire nɛ́ ki míɛni bɛ̀ mi yē wiiwe wè, á mi kpuɔmɔ pi 'dàala nyì lè, 22 bàli pe mìɛni pe yé mi kpuɔmɔ nyaa bè nɛ́ bílì mi 'kpíʔile bèle kùlo nī lè nɛ́ waama kùlo nī lè, a pe 'mi puu nɛ̀ wéli fúɔ nɛ̀ taa tɔliyɔ kiɛ yè nɛ́ cíi piyè mi siɛnrɛ lúʔu dèʔ, 23 peli pe mìɛni bèle, wàa nigbe sǐ ga tíi jíin baa kùlo náà nī lèʔ, lire náà nɛ̄ mi nɛ́ pe tobilo mɛ́ bèle; bàli pe mìɛni bīɛlɛ pe 'cíi mi nɛ̄ wè, piyě ga tíi ni nyaaʔ.

24 «Nɛ̀ yiri Kalɛbi nigbe nī, mi baakuɔwɔ wè, wire ŋáà wi 'sɔ̀ngijɛnrɛ taa dè, nɛ́ taʔa mi nɛ̄ nɛ́ sínnɛ ní lè, wire wè, m'bé wi nyɔ́gɔ kùlo nī lè nàa wi yé saanri nɛ̀ wéli lè. Wi pìile pe bé kùlo taa lè kɔrigɔ.

25 «Bà siɛnnɛ piyē baa jùlɔgɔ nī gè yeli yiʔɛ mɛ́ gè, kire nɛ̄ mbànʔa gè ye- yiʔɛ yè koli yeri waa waama kùlo mɛ́ lè kɔli mɛ́ gè.»

26 A Yewe sí fali nɛ̀ ki juu nɛ́ mɛ́ nɛ́ jo: 27 «ʔé ! Lɛ̀lɛ jori nī mi 'yɛli bè ní tògo siɛnnɛ bálì kpàri bèle bè cò ? Siɛnpiile bálì bèle, bàli pe mi sànʔá nɛ mári bèle, siɛnpiire dáà pe 'juu mi wori dè, mi nyɛ́nì ti lúʔu.

28 «-Ki juu pe mɛ́ ma pe yɛ: ‹Yewe wi 'ki juu nɛ́ jo: Mi nyɛ́nì kàli nìɛ nɛ̄, mi ŋáà wī wiiwe wè, m'bé yeli cò bè yɛli nɛ́ sànʔara dáà ní yeli juu dè, dàa mi 'lúʔu dè yeli mɛ́ dè. 29 Yeli bé kùu náʔa gè waama kùlo náà nī lè; yeli kúbilo pe bé kò náʔa gè, siɛnnɛ bálì pe mìɛni pe yé tɔ́ri bèle nɛ̀ pe míɛyɛ sɛbɛ yè baa waama kùlo nī lè, á pe mìɛni bìnɛ ní wè nɛ yiʔɛlɛ togo taa gèle nɛ̀ liɛ nɛ̀ tóri keli nɛ̄ gèle, nɛ́ ki cɛ́n yeli nyɛ́nì mi sànʔa. 30 Mi nyɛ́nì kɔli yɛ̀gɛ gè nɛ̀ nɛ́ jo yeli sǐ ga tíi bé jíin kùlo náà nī lèʔ, nàa nyuɔ mi yé kún nɛ̀ kɛn yeli mɛ́ lè. Bàli yákuɔ pe bé jíin kùlo náà nī lè, peli bīɛlɛ: Yefunɛ jaa wè, Kalɛbi wè, nɛ́ Nuni jaa wè, wè.

31 « ‹Nɛ̀ ki yaʔa, gàa ki 'yeli pìile wuʔu kúɔ gè, á yeli 'jo pìile bálì bèle pe bága pe cò bèle kapiɛnnɛ nī lè, m'bé peli yiʔɛ kíni peli bé sa jíin kùlo nī lè nàa nɛ̄ yeli 'cíi lè. 32 Gàa ki 'yeli kúɔ bèle, yeli bè kùu náʔa gè waama kùlo náà nī lè. 33 Yeli jaala, peli bé kò bèri fáala de mári waama kùlo nī lè, fúɔ bè taa yiʔɛlɛ togosiin. Pe bé wuʔɔ yeli kolimɔ kɛnmɛ nɛ̄ bè, bɛ̀ yeli wè nɛ síngi wè mi kɔli mɛ́ gèʔ, fúɔ bè taa yeli bàli ye 'mi sànʔa wè, yeli kúbilo nyuɔ ki ba nyì waama kùlo nī lè ! 34 Yeli nyɛ́nì kùlo saanri lè nɛ̀ wéli cɛnyɛ togosiin, kire kɛnmɛ nɛ̄ yeli míɛni bé wuʔɔgɔ taa bè yɛli nɛ́ yeli kolimɔ ní bè fúɔ bè taa yiʔɛlɛ togosiin, kire 'jo cɛngɛ ó cɛngɛ, nɛ́ ki yiɛlɛ. Bà yeli bé ki cɛ́n, a siɛn mi 'cíi wè, gàa ki bé wi taa wè.

35 « ‹Mi Yewe wè, mi mi 'jo bɛ̀ ! Bà m'bé ki kpíʔile kányiʔɛ nɛ̄ siɛnpiile bálì kɔli mɛ́ gè, bàli bīɛlɛ pe 'gbuʔulo nɛ́ mi wori juu dè. Pe bé kùu bè cɛrigɛ náʔa waama kùlo náà nī lè; bile sí pe mìɛni bé kùu !› »

36 Nàguɔlɔ bálì Misa cé nyíɛnɛ nɛ̀ kɔ̀n bèle nɛ́ pe tun pe sa kùlo wéli lè, a pe 'koli nɛ̀ pɛ́nì Isirayɛli tògo siɛnnɛ céri kpúu dè nɛ́ pe siɛnjuupiire ní dè, á pe 'cíi Yewe nɛ̄ wè, 37 peli bèle, a Yewe 'pe kpúɔn nɛ́ wuʔɔgbuʔɔ ní, a peli pe mìɛni 'kùu, bàli pe yé pɛ́nì kùlo kɛnmɛ juu bè nɛ̀ tìɛ bèle. 38 Nuni jaa wè, Yesuwe wè, nɛ́ Yefunɛ jaa wè, Kalɛbi wè, peli yákuɔ pe yé kò sìi nɛ̄ siɛnnɛ bálì pe mìɛni nī bèle, bàli pe yé kɛ́ nɛ̀ sɛ́nì kùlo saanri lè nɛ̀ wéli lè.

Isirayɛliyé pe 'cíi nɛ̀ kapiɛnnɛ kpúɔn lè

39 Bà 'koli nɛ̀ pɛ́nì siɛnrɛ dáà juu dè mɛ́ bèle, a ki 'kò pe mɛ́ funbiɛnrɛ kpuʔɔ. 40 Ki kpìɛnduu sínbinimɛ táanni bè, a pe 'yɛ̀ nɛ̀ tánʔa nyaguruyo naamɛ yè nɛ́ jo: «Weli bálì we bé tánʔa bè kɛ́ tiʔɛ nī gè gàa wi yé tìɛ gè, kányiʔɛ gī, weli nyɛ́nì kapiile kpíʔile !»

41 A Misa sí jo: «Gáa nɛ̄ yeli nɛ cìʔí Yewe siɛnrɛ nɛ̄ dè ? Kiǐ ga tíi nyuɔ yeli nɛ̄ʔ ! 42 Ye fǎga tánʔa baaʔ ! Nɛ́ ki cɛ́n Yewe wi wè yeli sunʔɔmɔ nī bèʔ. A yeli kɛ́ baa yeli leguulo pe bé sa yeli jáa ! 43  wuulo ní bèle piyē baa yeli yiʔɛ mɛ́; yeli bé tuu bè kùu pe kapiɛngbuɔn ŋuʔɔnɔ láara gèle. Nɛ́ ki cɛ́n yeli nyɛ́nì cíi nɛ̀ láʔa Yewe nɛ̄ wè; Yewe wiǐ je puu nɛ́ yeli níʔ.»

44 Kire nɛ́ ki mìɛni a pe 'cíi, piyè lúʔuʔ, a pe 'tánʔa nyaguruyo naamɛ gè, nɛ̀ ki yaʔa Yewe gè nɛ́ Misa ní wè, peli sì cɛ́nì yiri bùguro nī dèʔ. 45 A Amalɛkiyé nɛ́ Kanaa siɛnnɛ ní bèle, peli bálì pe 'puu tɛ́ninɛ nyaguruyo nyáà nɛ̄ yè, a peli 'tìgi pe kúrugu nɛ̀ pe jáa kapiɛnnɛ nɛ̄ lè, nɛ̀ pe kpúɔn nɛ̀ cɛrigɛ fúɔ nɛ̀ sɛ́nì nɔ̀ Worima kàʔa nɛ̄ gè.