Fètindaʔagɛlɛ tiige nɛ́ búru kpɔbilɔ wori dè
24
1 A Yewe 'ki juu Misa mɛ́ nɛ́ jo: 2 «Ma ki juu ma gbɛ̀ngɛ Isirayɛli siɛnnɛ mɛ́ bèle peri báan muɔ mɛ́ nɛ́ wolivi sùnjiilimɛ ní bè, fètindaʔagɛlɛ tiige wobo bè, bàa pe béri nii fètingele nī gèle, keri nyí súuri gèlea. 3 Arawɔn béri fètingele gbòborí gèle Kpàlidiʔɛ Kpátaʔa nī gè, baa gunbɔli fɛ̀ni yiʔɛ mɛ́ gè, fɛ̀ni ŋáà wi nyakungɛngɛ finʔɛgɛ làrigí gè, kire ga buu keri nyí súuri Yewe yiʔɛ mɛ́ gè, cɛnguʔɔ gè bè kpìɛnmɛ tuu bè.«Ti bé puu fànʔa kaala súuri yeli mɛ́ nɛ́ yeli siimɛ ní bè. 4 Fètingele gálì gīɛlɛ fètindaʔagɛlɛ tiige nɛ̄ gè, tiɛ cɛ̀nwɛ wuʔu gè, Arawɔn wi béri ke gbòborí súuri Yewe yiʔɛ mɛ́ gè.
5 «Misa, muɔ bé míifuɔnibɔ líɛ bè, bè búru kpɔbilɔ kiɛ nɛ́ siin kpúɔn; búru kpɔbiwɔ ó búru kpɔbiwɔ bé kpúɔn nɛ́ juubaanyɛni míifuɔnibɔ níb. 6 Muɔ bé pe tɛ́ngɛ bè taʔala pìye nɛ̄ gbuʔulo siin, tiɛ cɛ̀nwɛ tabali nɛ̄ wè, Yewe yiʔɛ mɛ́ gè, gboli ó gboli búru kpɔbilɔ kɔlini. 7 Muɔ bé wusuna cìiliwe tɛ́ngɛ wè búru kpɔbilɔ pe gbuʔulo siin táanni gèle, wi- puu sɔ̀ngidaa yakɔnrɔ dáà kàsun ki sórigi Yewe mɛ́ wè.
8 «Cɛndɛnigɛ cɛngɛ ó cɛndɛnigɛ cɛngɛ, pe 'yɛli bè búru kpɔbilɔ bálì gbòbori bèle bè tɛ́ngɛ Yewe yiʔɛ mɛ́ gè, lɛ̀lɛ ó lɛ̀lɛ nī. Kire bé puu nyakungɛngɛ ki fànʔa kaala Isirayɛliyé mɛ́ bèle, lɛ̀lɛ ó lɛ̀lɛ nī.
9 «Búru kpɔbilɔ pe bé puu Arawɔn nɛ́ wi jaala wuulo, kakuɔrɔ yakɔnrɔ nī dè, dàa kàsun ki sórigi dè Yewe mɛ́ wè. Pe bé búru kpɔbilɔ káa bèle tiɛwalidɛngɛgɛ káà nī, nɛ́ ki cɛ́n búru kpɔbilɔ peli yē yakaa gàa gī cɛ̀njɛngɛ wàlidɛngɛgɛ gè. Tire yē fànʔa kaala lɛ̀lɛ ó lɛ̀lɛ nī.»
Kulocɛliɛ míɛcuʔɔgɔ sàri wè
10 Nàguɔ wáà cé puu baa, wi yàa wi yé puu Isirayɛliyé wuu, wi tuu ní wè, Ezipiti kùlo wuu. A kire nàguɔ wi kɛ́nì yɛ̀ nɛ̀ pɛn Isirayɛliyé sunʔɔmɔ nī bè, nɛ̀ kɛ́nì kàsii taa nɛ́ Isirayɛliyé nàguɔ wáà ní, bùguro nī dèc. 11 Isirayɛliyé cuɔ ŋáà wi jaa wè, a wi 'Yewe míʔɛ cúʔɔ gè nɛ̀ ki faʔa. A siɛnnɛ pe sí wi cò nɛ̀ pɛn Misa mɛ́ wè. Pe 'puu nɛ wi yàa wi míʔɛ yeri gè Selomiti; Dibiri póri wi 'puu, Dan saʔa tùlugo nī gè. 12 A pe 'wi cò nɛ̀ tɛ́ngɛ nɛ wi wéli cɛ̀ngɛ, níɛ ki siri gàa Yewe bága juu gè.
13 A Yewe ń'nɛ̀ ki juu Misa mɛ́ nɛ́ jo:
14 «Ye- nàguɔ ŋáà cò wè ye yige bùguro kàduʔu mɛ́ gè. Bàli pe mìɛni pe 'ki lúʔu gàa wi 'juu gè nɛ̀ mi Yewe míʔɛ cúʔɔ gè, peli pe mìɛni bé pe kiyɛ taʔala yè wi nyùgo nɛ̄ gè, dí Isirayɛli gboli siɛnnɛ pe mìɛni sí wi wáa nɛ́ kàdari ní fúɔ wi pa kùu.
15 «Ma siɛnrɛ dáà juu dè Isirayɛliyé mɛ́ bèle: A siɛn ó siɛn 'Kulocɛliɛ míʔɛ cúʔɔ gè nɛ̀ wi faʔa wè, kire siɛn wi bé wi kolimɔ sàri taa wè. 16 Wire ŋáà wi bé Yewe míʔɛ cúʔɔ gè, kire siɛn wi bé kpúu wī. Isirayɛli gboli siɛnnɛ pe mìɛni bé wi wáa nɛ́ kàdari ní fúɔ wi ba kùu. A wi cɛ́nì nyaa nabɔnwɔ yo, kire ga laa Isirayɛliyé wuu yo, wi 'yɛli wi- kùu wī, bà wi nyɛ́nì Kulocɛliɛ míʔɛ cúʔɔ gè.
17 «A siɛn wáà 'lewiiwe kpúu wè, ki 'yɛli pe- wi míɛni kpúu wī. 18 Ŋàa míɛni wi 'yajuʔu káà kpúu gè, wi 'yɛli bè ki sìndiʔɛ kɛn gè, sìi wè, sìi sìndiʔɛ nī.
19 «Ŋàa míɛni wi 'wi siɛnnyɛni luɔ wè, pe bé ki kpíʔile wi nɛ̄ gàa wi 'kpíʔile gèd: 20 kácegaʔa, kácegaʔa sìndiʔɛ nī; nyapile, nyapile sìndiʔɛ nī; gàanna, gàanna sìndiʔɛ nī. Pe míɛni bé wi luɔ kɛnmɛ bíì nɛ̄ wi 'ŋìi luɔ wè nɛ̀ síɛ wè.
21 «Siɛn ŋáà wi 'yajuʔu káà kpúu gè, wi 'yɛli bè ki sìndiʔɛ kɛn gè, nɛ̀ ki yaʔa ŋàa wi 'lewiiwe kpúu wè, ki 'yɛli pe- wi kpúu wī.
22 «Yeli béri kàyuʔu nyu gè kanumɔ nɛ̄ nabɔnwɔ kɔli mɛ́ gè nɛ́ Isirayɛli siɛn kɔli mɛ́ gèe. Mi yē Yewe yeli Kulocɛliɛ.»
23 A Misa sí ki siɛnrɛ juu nɛ̀ gbɛ̀ngɛ Isirayɛliyé mɛ́ bèle. A pe 'nàguɔ yige wè bùguro kàduʔu mɛ́ gè, wire ŋáà wi 'Yewe míʔɛ cúʔɔ gè, nɛ̀ wi wáa nɛ́ kàdari ní, a wi 'kùu. Gàa Yewe yé juu nɛ̀ gbɛ̀ngɛ Misa mɛ́ wè, a Isirayɛli siɛnnɛ pe 'ki kpíʔile bɛ̀.