Yirile 28

Kacuɔnrilɔ burudo ti jɔligɛnmɛ bè

1 A Yewe 'ki juu nɛ̀ gbɛ̀ngɛ Misa mɛ́ nɛ́ jo: «Bɛ̀ Kòridiʔɛ ki 'faan nɛ̀ kúɔ gè, ma muɔ luɔ kɔ́ri wè nɛ́ wi jaala ní bèle: Nadabi, Abiyu, nɛ́ Itamari. Muɔ bé pe wàli dɛ́ngɛ piyeyɛ siɛnnɛ nī bèle, kire ga buu peri baara kúu dè mi mɛ́.

2 «Muɔ bé burudo jɔli dè, dàa dī wàlidɛngɛrɛ dè, bè le muɔ luɔ Arawɔn nɛ̄ wè, dàa ti bé puu wi kpuɔmɔ fìɛ wè. 3 Kire nɛ̄, burujɔlilɔ bálì bīɛlɛ nɛ́ kacɛ́nnɛ ní lè pe funyɔ nī yè, bàli mɛ́ mi 'sícilige kɛn gè peri ki baara kúu dè, muɔ bé ki juu pe mɛ́ kɛnmɛ bíì nɛ̄ pe bé Arawɔn burudo jɔli dè, dàa muɔ bága le wi nɛ̄ dè bè wi wàli dɛ́ngɛ kire ga buu wiri kacuɔnrilɔ baara kúu dè. 4 Burudo tire dī dàa dè: sìndinge kpɔ̀bi wè, burubile lè, nɛ́ burugbuɔyɛligɛ gè, nɛ́ burudɔnigɔ gàa pe 'súu gè, nɛ́ ndɔ̀njɛngɛ, nɛ́ burugo màʔana. Pe bé burudo wàlidɛngɛrɛ dáà jɔli dè muɔ luɔ Arawɔn nɛ́ wi jaala mɛ́ bèle kire ga buu peri kacuɔnrilɔ baara kúu dè mi mɛ́. 5 Pe bé ti jɔli nɛ́ tiɛ jèsii ní wè, nɛ́ ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lagbɛnrɛ jèsii ní wè.»

Efodi kpíʔilegɛnmɛ bè

6 «Bà ki yē, pe bé burubile jɔli lè nɛ́ tiɛ jèsii ní wè, nɛ́ ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lagbɛnrɛ jèsii pìniwe ní wè, ŋàa kpìɛndiinnɛ pe sɔ́migɔ nɛ̀ kpíʔile wè. 7 Muɔ bé fɛ̀ni màʔaya siin jɔli, fíkɛnyɛ màʔagɛlɛ gèle, bè taʔa efodi burubile nyuɔyɔ siin nɛ̄ yè, bè ki kàduʔu nɛ́ ki yiʔɛ kpàri gè bè yérige peri ki nii fíkɛnnyuyɔ nɛ̄ yè. 8 Efodi wi màʔana ni bé pínɛ bè suʔu wi nɛ̄, màʔana náà kpìɛndiinnɛ pe sɔ́migɔ nɛ̀ kpíʔile lè. Ni bé kpíʔile kanumɔ nɛ̄: nɛ́ tiɛ jèsii ní wè, nɛ́ jèsii ŋáà wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè nɛ́ lɛn lagbɛnrɛ jèsii pìniwe ní wè. 9 Muɔ bé kàdɛniyɛliyɛ siin líɛ yè, bè jaala míɛyɛ gbógo yè bè kɔ̀n yi nɛ̄, 10 míɛyɛ kɔlini kàdɛnibelige nɛ̄ gè, míɛyɛ kɔlini siinwuʔu nɛ̄ gè, bè yɛli nɛ́ pe siidaʔagɛlɛ kɛnmɛ ní bè. 11 Muɔ bé kàdɛnitɛnwɛ wáà yeri wi- míɛyɛ gbógo yè bè kɔ̀n kàdɛniyɛ siin nɛ̄ yè, majo bɛ̀ siɛn cî fìɛ tɛ́ngɛ yakaa nɛ̄ gè. Muɔ bé tiɛ yalebigele kálì siin kpíʔile bè kàdɛniyɛ siin le yè yi nī, 12 bé sí yi jɔli dárigɛ efodi burubile fíkɛnyɛ màʔagɛlɛ nɛ̄ gèle. Kire nyáà yi bé ki yaʔa de sɔ̀ngí de taʔa nɛ́ Isirayɛli jaala ní bèle. Lɛ̀lɛ ó lɛ̀lɛ nī, a kɛ́nì efodi burubile le lè wi fíkɛnnyuyɔ siin nɛ̄ yè nɛ́ míɛyɛ ní yè, a wi 'kɛ́ nɛ́ yi ní Yewe yiʔɛ mɛ́ gè, kire bé puu Yewe mɛ́ súuri. 13 Muɔ bé tiɛ yalebigele siin kpíʔile gèle, 14 bé sí tiɛ cɛ̀nwɛ nyùʔɔbigele siin tìin bɛ̀ jèsii pìniwe tíɛlɛ bé ke suʔu yalebigele nɛ̄ gèle.»

Sìndinge kpɔ̀bi kpíʔilegɛnmɛ bè

15 «Muɔ bé ki juu kpìɛndiinnɛ mɛ́ bèle pe- sìndinge kpɔ̀bi sɔ́migɔ wè pe kpíʔile. Wire kpíʔilegɛnmɛ pi bé puu nubo nɛ́ burubile ní lè: bé wi tìin nɛ́ tiɛ jèsii ní wè, nɛ́ jèsii ŋáà wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lagbɛnrɛ jèsii pìniwe ní wè. 16 A muɔ 'sìndinge kpɔ̀bi wáa wè nɛ̀ taʔa wè, ki bé kò jifaa. Wi tɔnigɛnmɛ nɛ́ wi píɛlɛgɛnmɛ pi mìɛni bé puu nubo; wi kayɔbiyɔ yi mìɛni sicɛri yi bé puu kadaala píɛlɛgɛnmɛ nigbe. 17 Muɔ bé sí tùluyo sicɛri kpíʔile lagbɛnrɛ kàdɛniyɛ woyo. Tùlubelige nɛ̄ gè, muɔ bé sariduwani, nɛ́ topazi, nɛ́ ɛmɛrɔdi taʔa ki nɛ̄. 18 Tùluyo siinwuʔu nɛ̄ gè, muɔ bé sikaribuli, nɛ́ safiiri, nɛ́ luluu taʔa ki nɛ̄. 19 Tùluyo taanriwuʔu nɛ̄ gè, muɔ bé wopali, nɛ́ agati, nɛ́ amɛtiisi taʔa ki nɛ̄. 20 Tùluyo sicɛriwuʔu nɛ̄ gè, muɔ bé kirisoliti, nɛ́ , nɛ́ jasipi taʔa ki nɛ̄. Yire kàdɛniyɛ nyáà yè, muɔ bé yi le tiɛ yalebigele nī gèle. 21  jaala pe míɛyɛ kiɛ nɛ́ siin yi mìɛni bé gbógo bè kɔ̀n kàdɛniyɛ nyáà yi mìɛni nigbe nigbe nɛ̄ yè, saaya tùluyo kiɛ nɛ́ siinwuʔu nɛ̄ gè, majo bɛ̀ siɛn cî fìɛ kpúɔn yakaa nɛ̄ gè.

22 «Muɔ bé tiɛ cɛ̀nwɛ nyùʔɔbigele siin cùnʔɔ bè ke tìin bɛ̀ jèsii pìniwe tíɛlɛ, bè le sìndinge kpɔ̀bi nɛ̄ wè. 23 Bà míɛni muɔ bé tiɛ fìʔile siin kpíʔile, bè pe jɔli bè tárigɛ sìndinge kpɔ̀bi wi naamɛ nyuɔyɔ siin nɛ̄ yè. 24 Muɔ bé tiɛ nyùʔɔbigele siin líɛ gèle bè ke sùuri tiɛ fìʔile siin bálì nī bèle, bàli bīɛlɛ sìndinge kpɔ̀bi nyuɔyɔ nɛ̄ yè. 25 Muɔ bé sí tiɛ nyùʔɔbigele nyuɔyɔ nyíì siin líɛ yè bè yi suʔu efodi burubile tiɛ yalebigele siin nɛ̄ gèle, gàli muɔ bé suʔu burubile ni fíkɛnyɛ màʔagɛlɛ nɛ̄ gèle, sìndinge yiʔɛ mɛ́ gè. 26 Muɔ bé sí ní tiɛ fìʔile siin pálì kpíʔile, bè pe jɔli dárigɛ sìndinge kpɔ̀bi wi táanmɛ nyuɔyɔ siin nɛ̄ yè, laamɛ kayɔbigɔ nɛ̄ gè, efodi burubile kɔli mɛ́ gè. 27 Muɔ bé sí ní tiɛ fìʔile siin pálì kpíʔile bè pe jɔli dárigɛ efodi burubile yiʔɛ mɛ́ gè fíkɛnyɛ màʔagɛlɛ táanmɛ gè, nɛ́ míɛni màʔana naamɛ gè nàa ni 'sɛ̀nnɛ màʔa gèle, efodi burubile tiɛjɔlidiɛyɛ táanni yè. 28 Pe béri sìndinge kpɔ̀bi fìʔile puu bèle efodi burubile fìʔile nɛ̄ bèle, nɛ́ màʔana ní lè nàa nī gàri céri dè, kire ga buu sìndinge kpɔ̀bi wi- puu suʔuwo súuri efodi màʔana nɛ̄ lè, wi fǎga gbɛ̀ jáa bè sáʔaʔ.

29 «Bà ki bé puu a kɛ́nì jíin nī gè, sìndinge kpɔ̀bi ŋáà pe tíʔi nɛ kàyuʔu kele nyu gèle, wi bé puu sìndinge nɛ̄ gè nàzɔn yiʔɛ mɛ́ gè, bà Isirayɛli jaala míɛyɛ yi bé puu mi yiʔɛ mɛ́ gè mi de sɔ̀ngí de taʔa súuri nɛ́ pe ní. 30 Muɔ bé Urimi nɛ́ Tumimi líɛ wè bè le sìndinge kpɔ̀bi nī wè, ŋàa yeli béri tíʔi de kàyuʔu kele nyu gèle. Bɛ̀ pe bé puu Arawɔn sìndinge nɛ̄ gè nàzɔn yiʔɛ mɛ́ gè, lɛ̀lɛ ó lɛ̀lɛ a wi 'jíin tiɛcɛ̀ngɛ wàlidɛngɛgɛ nī gè mi Yewe yiʔɛ mɛ́ gè, tire bé puu wi mɛ́ baakuɔyɛrɛ bèri mi Yewe nyɛ́ni kaala cɛ́n lè kàyuʔujuuro nī dè Isirayɛliyé kɔli mɛ́ gè.

Buruzɛnrɛ ti kpíʔilegɛnmɛ wori dè

31 «Muɔ míɛni bé burugbuɔyɛligɛ tìin gè nɛ́ jèsii ní wè ŋàa wī gàri céri dè, burugbuɔyɛligɛ gáà gī nɛ́ burubile ní lè. 32 Burugbuɔyɛligɛ ki bé puu nɛ́ yétiige ní, kire ga buu nyùgo ki de jíin ki nī. Muɔ bé ki yétiige tiɛyɛ tìin yè bè ki súu màʔa, kire ga buu ki fǎga gbɛ̀ ciɛnʔ. 33 Muɔ bé burugbuɔyɛligɛ ki táanmɛ nyuɔyɔ kpíʔile yè cɛ̀nyɛ, bé yɛrɛ táà tìin bɛ̀ girenadi yasɛnrɛ tíɛlɛ dè nɛ́ jèsii ní wè ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè. Muɔ bé ti yaʔa tiri yàala burugbuɔyɛligɛ ki táanmɛ nyuɔyɔ nɛ̄ yè. Girenadi yasɛnrɛ sunʔɔmɔ nī bè, muɔ bé tiɛ wòrigbuʔulo kpíʔile bè le baa: 34 tiɛ wòrigbolo láà nigbe, girenadi yasɛngɛ nigbe, tiɛ wòrigbolo láà nigbe, girenadi yasɛngɛ nigbe, fúɔ bè burugbuɔyɛligɛ ki táanmɛ nyuɔyɔ màʔa yè bè suʔu. 35  béri burugbuɔyɛligɛ nii gè bèri wi baara kúu dè. Wòrigbuʔulo ke tùnmɔ bè, pi béri lúru lɛ̀lɛ líì nī wi 'jíin nī gè mi yiʔɛ mɛ́ gè, nɛ́ lɛ̀lɛ líì nī wi bé yiri wè; kire bé ki yaʔa wi fǎga kùuʔ.

36 «Muɔ bé tiɛ cɛ̀nwɛ wáà kpúɔn bè wi kpɔbi bɛ̀ tiige fiɛnrɛ tíɛlɛ. Muɔ bé ki gbógo kɔ̀n ki nɛ̄: ‹Wàlidɛngɛwɛ Yewe mɛ́›, majo bɛ̀ siɛn cî fìɛ taʔa yakaa nɛ̄ gè. 37 Muɔ bé ki tárigɛ nɛ́ jèsii màʔana ní lè nàa nī gàri céri dè Arawɔn ndɔ̀njɛngɛ yiʔɛ mɛ́ gè, gbɛlɛ tiʔɛ nɛ̄ gè, kire ga buu ki- kò baa súuri. 38 Kire yakpɔbigɔ gáà ki bé puu Arawɔn gbɛlɛ nɛ̄ lè, kire ga buu Arawɔn gbɛ̀ri kolimɔ kàsulugo sùlu gè, kolimɔ báà pi bé gbɛ̀ pari nyaʔa kakuɔrɔ nɛ́ yakɔnrɔ yɛrɛ nī dè dàa ní siɛnnɛ pe béri báan bè pa ti wàli dɛ́ngɛ dè. Yakpɔbigɔ gáà ki 'yɛli bè buu wi gbɛlɛ nɛ̄ lè súuri kire ga buu Yewe de fɔ̀ligi ti nɛ̄.

39 «Burugbuɔyɛligɛ nɛ́ ndɔ̀njɛngɛ ní gè, muɔ bé ti fɛ̀ni tìin wè nɛ́ lagbɛnrɛ jèsii ní wè. Burugo màʔana lire 'yɛli bè jɔli bé ni súu. 40 Muɔ bé burudɔniyɔ yáà jɔli Arawɔn jaala mɛ́ bèle, nɛ́ buruyo màʔagɛlɛ ní gèle, nɛ́ ndɔ̀ngɔlɔ ní gèle. Burujɛ̀nyɛ nyáà yi bé puu pe kpuɔmɔ fìɛ wè. 41 Muɔ Misa wè, muɔ bé bururo dáà le dè Arawɔn nɛ̄ wè nɛ́ wi jaala ní bèle, bé siɛnnyiɛnɛgɔn sùnmɔ wo bè pe nyùyɔ nɛ̄ yè, bè pe tɛ́ngɛ pe baara nɛ̄ dè bè pe wàli dɛ́ngɛ, kire ga buu peri baara kúu dè mi mɛ́. 42 Muɔ bé jàdigile kpíʔile, lagbɛnrɛ jèsii pìniwe wuulo, bè kɛn pe mɛ́ peri nii pe fìɛrɛ tiɛyɛ nɛ̄ yè. Pe tɔnigɛnmɛ pi bé líɛ sɛ̀nnɛ nɛ̄ gèle bè sa nɔ̀ kágunyɔ nɛ̄ yè. 43 Arawɔn nɛ́ wi jaala pe béri kire jàdigile nii bèle bèri jíin nī gè, nɛ́ míɛni a pe kɛ́ni sìʔɛrɛ́ nɛ waa mɛ́ gè bè sa pe baara kúɔ dè tiɛcɛ̀ngɛ wàlidɛngɛgɛ nī gè, kire ga buu pe fǎga kolimɔ kpíʔile bè kùuʔ. Dàa tire yē fànʔa kaala lɛ̀lɛ ó lɛ̀lɛ nī Arawɔn mɛ́ nɛ́ wi siimɛ pi mìɛni ní bè.»