Kòridiʔɛ kpíʔilegɛnmɛ bè
26
1 A Yewe ń'nɛ̀ joa: «Muɔ bé Kòridiʔɛ kire tíimɛb kpíʔile nɛ́ fɛ̀niwɛyɛ kiɛ ní yè. Muɔ bé fɛ̀ninɛ tìin bèle nɛ́ jèsii ní ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní. Ma ki juu kpìɛndiinnɛ mɛ́ bèle, pe- seribɛnnɛ jènyigele sɔ́migɔ gèle pe kpíʔile fɛ̀ninɛ nɛ̄ bèle. 2 Fɛ̀niwɛgɛ tɔnigɛnmɛ pi bé puu kabuunyiʔɛnɛ togo nɛ́ kataanri, ki píɛlɛgɛnmɛ pi bé puu kabuunyiʔɛnɛ sicɛri. Yi mìɛni bìnɛ wi bé puu nuwɔ. 3 Pe bé fɛ̀niwɛyɛ kogunɔ líɛ bè yi jɔli dárigɛ yìi nɛ̄, yire bé puu gboli nigbe. Bɛ̀ míɛni pe bé nyìi kogunɔ kpíʔile yè. 4 Gbuʔulo gálì nī gèle, fɛ̀niwɛgɛ ó fɛ̀niwɛgɛ sɛngɛ nɛ̄ gè, muɔ bé yapuʔɔlɔ jɔli bè tárigɛ yi nyuɔyɔ nɛ̄ yè, gàli ke bé puu gàri céri dè. 5 Yapuʔɔlɔ ke nyuɔ ki bé puu togosiin nɛ́ kpɔrigɔ, gbuʔulo gálì siin nɛ̄ gèle, gboli ó gboli fɛ̀niwɛgɛ sɛngɛ nyuɔ nɛ̄ gè. Ke bé sìɛn nɛ́ kìye ní. 6 Muɔ bé yatunʔɔnɔ togosiin nɛ́ kpɔrigɔ kpíʔile, tiɛ wuʔulo gèle. Muɔ bé gbuʔulo ke mìɛni siin suʔulo gèle kìye nɛ̄ nɛ́ yatunʔɔnɔ ní gèle, kire ga buu Kòridiʔɛ ki- pínɛ bè puu nigbe.7 «Nɛ́ míɛni, muɔ bé fɛ̀niwɛyɛ kiɛ nɛ́ nigbe kpíʔile nɛ́ síkasiire ní, bèri Kòridiʔɛ kpátaʔa tɔ́ngi gè. 8 Fɛ̀niwɛgɛ ó fɛ̀niwɛgɛ tɔnigɛnmɛ pi bé puu kabuunyiʔɛnɛ togo nɛ́ kpɔrigɔ. Fɛ̀niwɛgɛ ó fɛ̀niwɛgɛ píɛlɛgɛnmɛ míɛni pi bé puu kabuunyiʔɛnɛ sicɛri. Fɛ̀niwɛyɛ kiɛ nɛ́ nigbe yè, yi mìɛni bìnɛ, tɔnigɛnmɛ nɛ́ yi píɛlɛgɛnmɛ, bé puu nubo. 9 Pe bé fɛ̀niwɛyɛ kogunɔ líɛ bè yi jɔli bè tárigɛ yìi nɛ̄, yire bé puu gboli nigbe. Gboli siinwoli lè, muɔ bé fɛ̀niwɛyɛ kɔlini jɔli bè tárigɛ yìi nɛ̄. Fɛ̀niwɛgɛ kɔliniwuʔu gè, kire bé puu bèri kpátaʔa wìile tɔ́ngi lè. 10 Gbuʔulo gálì nī gèle, fɛ̀niwɛgɛ ó fɛ̀niwɛgɛ sɛngɛ nɛ̄ gè, muɔ bé yapuʔɔlɔ togosiin nɛ́ kpɔrigɔ jɔli dárigɛ ki nɛ̄. 11 Muɔ bé yatunʔɔnɔ togosiin nɛ́ kpɔrigɔ kpíʔile, kányiɛrɛ wuʔulo. Muɔ bé gbuʔulo ke mìɛni siin suʔulo gèle kìye nɛ̄, bé kányiɛrɛ yatunʔɔnɔ líɛ gèle bè ke tùɔn yapuʔɔlɔ nɛ̄ gèle, kire ga buu gbuʔulo siin ke- pínɛ bè puu nigbe bè kpátaʔa tɔ́n gè.
12 «A muɔ kɛ́nì ki tɔ́n gè, fɛ̀niwɛgɛ tílaga káà bé kò. Kire sɛngɛ ki bé tɔni bè tuu Kòridiʔɛ kàduʔu mɛ́ gè. 13 Kòridiʔɛ kpátaʔa fɛ̀ninɛ pe sìtɔnimɔ tiɛyɛ nī yè, kabuunyɛni nigbe bé tɔni bè yiri kayɔbiyɔ yi mìɛni siin siin nɛ̄ yè, bè ki sɔ́migɔ dɔ́n.
14 «Muɔ bé sìnbapɔlilɔ sɛ̀nyɛ líɛ yè, bè yi nyɛ́nigɛ, ma yi tíʔɛ ma kpátaʔa naamɛ tɔ́n gè. Bè ní taʔa ki nɛ̄, muɔ bé fɛ̀niwɛgɛ sɛngɛ kpíʔile gè nɛ́ sɛ̀nguʔu ní, bé ki tɔ́n naamɛ gè cígini.
15 «Muɔ bé akasiya tingele kálì kpíʔile bè Kòridiʔɛ kpíʔile gè, bè ke cɔ́ri bè yérige. 16 Tinnɛ ó tinnɛ tɔnigɛnmɛ 'yɛli pi- puu kabuunyiʔɛnɛ kiɛ, nɛ́ ke píɛlɛgɛnmɛ pi 'yɛli pi- puu kabuunyɛni nigbe nɛ́ tílaga. 17 Ke tingele gálì ke bé puu nɛ́ fèriye siin siin ní, yi mìɛni bé yéri bè yìi sɔ́ligɔ. Ke mìɛni kpíʔilegɛnmɛ pi 'yɛli bè puu nubo. 18 Muɔ bé tingele celile bè Kòridiʔɛ yérige gè. Tingele togo bé puu ki cɛngɛnyɛnifolimɛ kàliige kɔli mɛ́ gè. 19 Muɔ bé walifiiwe líɛ wè bè tingele cɔ́ridiɛyɛ kpíʔile yè, nyùyɔ siin bé puu tinnɛ nigbe fèriye siin cɔ́ridiʔɛ nɛ̄ gè, nyùyɔ siin yáà bé puu tinnɛ nigbe fèriye siin cɔ́ridiʔɛ nɛ̄ gè. Nyùyɔ yi mìɛni bìnɛ wi bé puu togosiin. 20 Muɔ bé tingele togo kálì kpíʔile cígini kayɔbigɔ gíì nɛ̄ gè, Kòridiʔɛ ki cɛngɛnyɛnifolimɛ kàmɛgɛ kɔli mɛ́ gè. 21 Tingele gálì ke mìɛni nigbe nigbe bé sige bè yérige nɛ́ ke walifiiwe nyùyɔ siin siin cɔ́ridiʔɛ ní gè, bà muɔ bé nyùyɔ togosiin kpíʔile. 22 Kòridiʔɛ kàduʔu mɛ́ gè gàa gī cɛngɛnyɛnijiingɔli mɛ́ gè, muɔ bé tingele kɔlini kpíʔile. 23 Muɔ bé tingele siin siin kpíʔile gàli ke bé puu bè Kòridiʔɛ gɔ̀ninɔ kàduʔu mɛ́ tuʔɔ gè bè yérige. 24 Muɔ bé ke tingele gálì ke siin pínɛ gèle bè cɔ́ri kìye táanni bè fìʔiwe tíʔɛ wè bè ke nyuɔyɔ siin sigi yè bè yérige naamɛ gè. Bɛ̀ ki bé puu míɛni gìli siin mɛ́ gèle gàli gīɛlɛ Kòridiʔɛ gɔ̀ninɔ tiɛyɛ siin nī yè. 25 Kòridiʔɛ ki kàduʔu mɛ́ tingele, ke mìɛni bìnɛ wi bé puu kataanri. Ke mìɛni bìnɛ walifiiwe nyùyɔ siin siin tiɛyɛ yi bé nyaa kiɛ nɛ́ kɔlini.
26 «Píra ŋáà ní wè muɔ bé kàgbiiparigɛlɛ kpíʔile nɛ́ akasiya tiire ní dè, bè ke le kàgbiiyerigele nɛ̄ gèle. Muɔ bé ke kpíʔile kogunɔ, bè le Kòridiʔɛ ki lìʔɛlɛ níì nɛ̄ lè, 27 bé kàli kogunɔ kpíʔile kàgbiiyerigele gílì nɛ̄ gèle lìʔɛlɛ níì nɛ̄ lè, nɛ́ míɛni kàli kogunɔ kpíʔile kàgbiiyerigele gílì nɛ̄ gèle ki kàduʔu mɛ́ gè, cɛngɛnyɛnijiinmɛ mɛ́ bè. 28 Kàgbiiparilɛ náà nī taanriwoli lè, lire ni bé pari bè tóri kàgbiiyerigele ke sunʔɔmɔ nī bè, bàa yiri nyuɔ gíì mɛ́ gè bèri waa gíì mɛ́ gè. 29 Muɔ bé tiindugugolo nɛ́ kàgbiiparigɛlɛ tɔ́n gèle nɛ́ tiɛ ní wè. Kájingele gálì muɔ bé tárigɛ tiindugugolo nɛ̄ gèle bèri kàgbiiparigɛlɛ sùurí gèle ke nī gèle, muɔ bé ke kpíʔile míɛni nɛ́ tiɛ ní. 30 Bà muɔ bé Kòridiʔɛ cɔ́ri gè bè yérige bè yɛli nɛ́ fìɛlɛ bálì ní mi 'tìɛ muɔ nɛ̄ náʔa nyagurugo naamɛ gè.»
Gunbɔli fɛ̀ni kpíʔilegɛnmɛ bè
31 «Muɔ bé gunbɔli fɛ̀ni tìin wè nɛ́ jèsii ní ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ jèsii pìniwe ní wè. Muɔ bé ki juu kpìɛndiinnɛ mɛ́ bèle, pe- seribɛnnɛ jènyigele sɔ́migɔ kpíʔile gèle gunbɔli fɛ̀ni nɛ̄ wè. 32 Muɔ bé akasiya tiindugugolo sicɛri tɔ́n gèle nɛ́ tiɛ ní wè, bé gunbɔli fɛ̀ni tùɔn wè ke nɛ̄. Ki tiindugugolo gálì gèle, ke bé puu nɛ́ yatunʔɔnɔ ní gàli pe 'kpíʔile nɛ́ tiɛ ní wè. Tiindugugolo táanmɛ nyuɔyɔ sicɛri yi bé puu walifiiwe woyo.
33 «Muɔ bé gunbɔli fɛ̀ni tùɔn wè yatunʔɔnɔ nɛ̄ gèle.c Kire tiʔɛ nī gè, gunbɔli fɛ̀ni kàduʔu mɛ́ gè, muɔ bé nyakungɛngɛ finʔɛgɛ tɛ́ngɛ gè baa. Gunbɔli fɛ̀ni wire wi bé tiɛcɛ̀ngɛ wàlidɛngɛgɛ wàli gè bè láʔa tiɛcɛ̀njɛngɛ wàlidɛngɛgɛ nɛ̄ gèd. 34 Muɔ bé kàsulugo suɔdiʔɛ líɛ gè bè nyakungɛngɛ finʔɛgɛ tɔ́n gè nɛ́ ki ní, tiɛcɛ̀njɛngɛ wàlidɛngɛgɛ nī gè. 35 Muɔ bé tabalie líɛ wè bè tɛ́ngɛ gunbɔli fɛ̀ni yiʔɛ mɛ́ gè, Kòridiʔɛ ki cɛngɛnyɛnifolimɛ sɔrigɔ nī gè, kàmɛgɛ kɔli mɛ́. Muɔ bé fètindaʔagɛlɛ tiige líɛ gè bè ki tɛ́ngɛ tabali wi yiʔɛ mɛ́ gè, Kòridiʔɛ ki cɛngɛnyɛnifolimɛ sɔrigɔ nī gè, kàliige kɔli mɛ́.
36 «Muɔ bé fɛ̀ni wáà kpíʔile nɛ́ lɛn lagbɛnrɛ jèsii pìniwe ní wè bèri kpátaʔa wìile tɔ́ngi lè. Muɔ bé wi tìin nɛ́ jèsii ní ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè. Kire 'yɛli bè jɔli bé ki súu. 37 Muɔ bé akasiya tiindugugolo kogunɔ kpíʔile bé ke tɔ́n nɛ́ tiɛ ní wè bèri fɛ̀ni tùɔ́n wè ke nɛ̄. Tiindugugolo ke yatunʔɔnɔ gèle, muɔ bé ke kpíʔile nɛ́ tiɛ ní, bé tiindugugolo ke kogunɔ táanmɛ nyùyɔ tiɛyɛ kpíʔile yè nɛ́ kányiɛrɛ ní.»