Yewe 'jo pe- kpuʔɔrɔ kɛn pe wire Kòridiʔɛ faan gè
25
1 A Yewe 'ki juu Misa mɛ́ nɛ́ jo: 2 «-Ki juu Isirayɛli siɛnnɛ mɛ́ bèle, pe- kpuʔɔrɔ kɔ̀n pe kɔliyɛrɛ nī dè bè ti kɛn mi mɛ́. Yeli bé kpuʔɔrɔ suɔ dè siɛnnɛ mɛ́ bèle a gìi 'yɛ̀ siɛn wi fungo nī gè bè ki kpíʔile gè. 3 Ti n'dɛ kpuʔɔrɔ yɛrɛ dàa tire yeli bé suɔ pe mɛ́: tiɛ wè, nɛ́ walifiiwe wè, nɛ́ kányiɛrɛ ní dè, 4 nɛ́ jèsii ní ŋàa wī gàri céri dè, nɛ́ ŋàa wī kábebe céri dè, nɛ́ ŋàa wī nyìɛwɛ kpólokpolo wè, nɛ́ lɛn lagbɛnrɛ fɛ̀ni, nɛ́ síkasiire, 5 nɛ́ sìnbapɔli sɛ̀ngɛ gàa pe 'nyɛ́nigɛ gè, nɛ́ sɛ̀nguʔu ní, nɛ́ akasiya tiire ní, 6 nɛ́ sùnmɔ ní bàa pe nii fètingele nī gèle, nɛ́ nùdaanna yɛrɛ ní dè dàa pe líi nɛ siɛnnyiɛnɛgɔn sùnmɔ kpínʔini bè nɛ́ míɛni wusuna ní wè, 7 nɛ́ ɔnikisi kàdɛniyɛ, nɛ́ lagbɛnrɛ kàdɛniyɛ ní nyàa pe bé líɛ bè tárigɛ efodi burubilea nɛ̄ lè nɛ́ sìndinge kpɔ̀bib nɛ̄ wè. 8 Yeli bé ti mìɛni líɛ bè saawalidɛngɛgɛ káà kpíʔile m'mɛ́ kire ga buu mi- gbɛ̀ kò yeli sunʔɔmɔ nī bè. 9 M'bé mi Kòridiʔɛc ki kpíʔilegɛnmɛ tìɛ bè muɔ nɛ̄, nɛ́ míɛni yɛrɛ dáà ti mìɛni ti 'yɛli bè jíin ki nī gè. Yeli bé ki mìɛni kpíʔile bè yɛli nɛ́ kpíʔilegɛnmɛ ní bè bàa mi 'tìɛ yeli nɛ̄ bè.»Nyakungɛngɛ finʔɛgɛ kpíʔilegɛnmɛ bè
10 «Yeli bé finʔɛgɛ kpíʔile gè nɛ́ akasiya tiire ní. Ki tɔnigɛnmɛ pi bé puu kabuunyiʔɛnɛ siin nɛ́ tílaga, ki píɛlɛgɛnmɛ pi bé puu kabuunyɛni nigbe nɛ́ tílaga, ki kpàʔalagɛnmɛ pi bé puu kabuunyɛni nigbe nɛ́ tílaga. 11 Muɔ bé tiɛ cɛ̀nwɛ nyɛgɛ bè ki tɔ́n nɛ́ wi ní, ki laamɛ nī bè nɛ́ ki kàduʔu nɛ̄ gè; muɔ bé ki nyuɔyɔ màʔa yè bè suʔu nɛ́ tiɛ ní wè. 12 Muɔ bé tiɛ kájingele sicɛri kpíʔile, bè ke nɔrigi ki nyɛgɛlɛ sicɛri tiɛyɛ nī yè. 13 Muɔ bé akasiya kàgbiʔile sicɛri tɛn, bé tiɛ nyɛgɛ wè, bè ke tɔ́n. 14 Muɔ bé kàgbiʔile le gèle kájingele nī gèle finʔɛgɛ lìʔɛgɛlɛ nɛ̄ gèle, kire ga buu pe gbɛ̀ finʔɛgɛ líɛ gè. 15 Kàgbiʔile ke 'yɛli ke- kò leyaʔagɛlɛ finʔɛgɛ kájingele nī gèle; piyè yɛli bè ke yigeʔ. 16 Kire kàduʔumɛ muɔ bé nyakungɛngɛ siɛnrɛ kàdɛnitɛnyɛ líɛ yè, nyàa m'bé kɛn muɔ mɛ́ yè, bè yi le ki laamɛ nī bè.
17 «Muɔ bé finʔɛgɛ yatɔngɔ kpíʔile gè nɛ́ tiɛ cɛ̀nwɛ ní wè, ki- puu kàsulugo suɔdiʔɛd. Ki tɔnigɛnmɛ pi bé puu kabuunyiʔɛnɛ siin nɛ́ tílaga, ki píɛlɛgɛnmɛ pi bé puu kabuunyɛni nigbe nɛ́ tílaga. 18 Muɔ bé tiɛ líɛ wè bé wi kpúɔn bè nyìʔɛnɛ tundunminɔ siin faan bɛ̀ seribɛnnɛe tíɛlɛ bèle. Muɔ bé pe kóri kàsulugo suɔdiʔɛ ki nyuɔyɔ nɛ̄ yè, 19 seribɛn wáà- puu ki yiʔɛ mɛ́ nyuɔ nɛ̄ gè, wàa- sí puu ki kàduʔu mɛ́ nyuɔ nɛ̄ gè. Muɔ bé pe kpíʔile pe- puu nigbe nɛ́ kàsulugo suɔdiʔɛ ní gè, ki nyuɔyɔ siin nɛ̄ yè. 20 Pe fíkɛnyɛ yi bé yɛ̀ naamɛ gè bè kàsulugo suɔdiʔɛ tɔ́n gè bèri ki wéli. Pe bé yiɛyɛ wáa yè pìye mɛ́, bé nyùyɔ cùungu yè bèri kàsulugo suɔdiʔɛ wéli gè. 21 Muɔ bé nyakungɛngɛ siɛnrɛ kàdɛnitɛnyɛ líɛ yè bè le finʔɛgɛ laamɛ nī bè, kire kàduʔumɛ gè muɔ bé finʔɛgɛ tɔ́n gè nɛ́ yatɔngɔ ní gè gàa gī kàsulugo suɔdiʔɛ gè. 22 Kire tiʔɛ kire nī m'béri muɔ kpàlí, kàsulugo suɔdiʔɛ ki naamɛ gè, seribɛnnɛ siin sunʔɔmɔ nī bè, bàli bīɛlɛ nyakungɛngɛ finʔɛgɛ nɛ̄ gè. Kire tiʔɛ nī míɛni m'béri mi tunduro nyu dè de kanʔa Isirayɛli siɛnnɛ mɛ́ bèle.»
Búrutaʔa tabali kpíʔilegɛnmɛ bè
23 «Gàa muɔ bé ní kpíʔile gè, ma tabali kpíʔile nɛ́ akasiya tiire ní. Wi tɔnigɛnmɛ pi bé puu kabuunyiʔɛnɛ siin, wi píɛlɛgɛnmɛ pi bé puu kabuunyɛni nigbe, wi kpàʔalagɛnmɛ pi bé puu kabuunyɛni nigbe nɛ́ tílaga. 24 Muɔ bé wi mìɛni tɔ́n nɛ́ tiɛ cɛ̀nwɛ ní wè, bé wi nyuɔyɔ sɔ́migɔ yè bè kpíʔile bè yi tɔ́n nɛ́ tiɛ cɛ̀nwɛ ní wè bè wi màʔa bè suʔu. 25 Muɔ bé gbèle láà kpíʔile wi nɛ̄ bé ni kóri tabali wi nyuɔyɔ nɛ̄ yè bè wi màʔa bè suʔu. Ni píɛlɛgɛnmɛ pi bé puu kadagbege píɛlɛgɛnmɛ. Muɔ bé tiɛ cɛ̀nwɛ tíʔɛ wè bè gbèle náà tɔ́n lè bè ki màʔa bè suʔu.
26 «Muɔ bé tiɛ kájingele sicɛri kpíʔile bè ke kóri tabali wi gɔ̀ninɔ sicɛri sɔriyɔ nī yè, gɔ̀ninɔ bàli pe yē wi cìʔile sicɛri táanni gèle. 27 Ki kájingele gálì keli bé kóri tabali wi lìʔɛgɛlɛ tiɛyɛ táanni yè, nyàa yī kadagbege tiɛyɛ nī yè. Baa pe béri kàgbiʔile nii gèle bèri tabali líi wè. 28 Akasiya tiire muɔ bé líɛ bè kàgbiʔile gálì kpíʔile gèle, bé ke tɔ́n nɛ́ tiɛ cɛ̀nwɛ ní wè. Keli ke bé puu tabali wi còdiɛyɛ yè. 29 Muɔ bé tiɛ cɛ̀nwɛ líɛ wè bè yakpiʔilide kpíʔile nɛ́ wi ní, tabali wori dè: tàa bé puu tasaala, tàa bé puu tàkuuwori, tàa sí puu kàjuʔɔlɔ, taa sí puu lakuucɛngɛlɛ. Keli ní pe béri diviɛn kíri wè de ŋu bèri kakuɔrɔ kúu dè. 30 Búru kpɔbilɔ bálì pe 'kɛn pe ní tɛ́ngɛlɛ mi yiʔɛ mɛ́ gè, muɔ béri pe líi cɛngɛ ó cɛngɛ bèri pe tɛ́ngi baa tabali nɛ̄ wè, mi yiʔɛ mɛ́ gèf.»
Fètindaʔagɛlɛ tiige kpíʔilegɛnmɛ bè
31 «Muɔ bé tiɛ cɛ̀nwɛ líɛ wè bè wi kpúɔn bè fètindaʔagɛlɛ tiige kpíʔile gè, nɛ́ ki táanmɛ nyùgo ní gè, nɛ́ ki sunʔɔmɔ tiige ní gè bè ki sìɛn céwu, nɛ́ ki nɛ̀joyo ní yè bɛ̀ tiige fiɛnrɛ tíɛlɛ, nɛ́ fiɛnrɛ ti nadanʔana nɛ́ ti wɛgɛlɛ ní gèle. Ti mìɛni bìnɛ wi bé puu nigbe nɛ́ fètindaʔagɛlɛ tiige ní gè. 32 Lèye kɔlini bé puu sunʔɔmɔ tiige nɛ̄ gè; taanri bé puu kayɔbigɔ gíì mɛ́ gè, taanri sí puu kayɔbigɔ gíì mɛ́ gè. 33 Lège ó lège, nɛ̀joyo taanri bè puu ki nɛ̄. Nɛ̀jogo ó nɛ̀jogo bé puu bɛ̀ amadi tiige fiɛnrɛ tíɛlɛ dè, yafiɛnnɛ ó yafiɛnnɛ nɛ́ ni nadaanna ní, nɛ́ ni wɛgɛlɛ ní gèle. Bɛ̀ ki bé puu lèye nyáà yi mìɛni kɔlini nɛ̄ yè. 34 Ki sunʔɔmɔ tiige nɛ̄ gè, nɛ̀joyo sicɛri bé puu ki nɛ̄, nyàa yi bé puu bɛ̀ amadi tiige fiɛnrɛ tíɛlɛ dè. Yi mìɛni nigbe nigbe bé puu nɛ́ nadanʔana ní nɛ́ yi wɛgɛlɛ ní gèle. 35 Nadanʔana ke bé puu lèye kɔlini yi suʔudiɛyɛ táanmɛ gè sunʔɔmɔ tiige nɛ̄ gè: suʔudiʔɛ pélige táanmɛ gè, nadaanna nigbe; suʔudiʔɛ siinwuʔu táanmɛ gè, nadaanna nigbe; suʔudiʔɛ taanriwuʔu táanmɛ gè, nadaanna nigbe bé puu baa. 36 Fíɛnrɛ nadanʔana gèle nɛ́ lèye ní yè, ti mìɛni bé pínɛ bè puu sìnbogo nɛ́ fètindaʔagɛlɛ tiige ní gè. Muɔ bé ti mìɛni kpíʔile nɛ́ tiɛ cɛ̀nwɛ ní ŋàa pe 'kpúɔn wè.
37 «Píra ŋáà ní wè, muɔ bé fètingele kɔlisiin kpíʔile gèle bè ke taʔa fètindaʔagɛlɛ tiige nɛ̄ gè. Muɔ bé ke tɛ́ngɛ kire ga buu keri kpìɛnmɛ cáanri piri waa yiʔɛ mɛ́ gè. 38 Ke fígiyɛgɛlɛ gèle nɛ́ cúnʔɔ yalegele ní gèle, ti mìɛni bé puu tiɛ cɛ̀nwɛ. 39 A muɔ je fètindaʔagɛlɛ tiige kpíʔile gè, nɛ́ yakpiʔilide dáà ti mìɛni ní dè, muɔ bé tiɛ cɛ̀nwɛ culolo togo nɛ́ kpɔrigɔg líɛ bè ti kpíʔile.
40 «Muɔ Misa wè, ma mìɛ cò ma baara dáà kúɔ dè ma yɛli nɛ́ fìɛlɛ bálì ní bèle mi 'tìɛ muɔ nɛ̄ náʔa nyagurugo naamɛ gèh.»